100 ରୁ 150 ମାର୍କ ରଖି ବିହାର ଛାତ୍ର ଭାଇରାଲ

ବିହାରର ଲଲିତ ନାରାୟଣ ମିଥିଲା ବିଶ୍ବବିଦ୍ୟାଳୟ ଏବେ ଚର୍ଚ୍ଚାରେ । ପରିକ୍ଷାରେ ଧାର୍ଯ୍ୟ ନମ୍ବରରୁ ଅଧିକ ନମ୍ବର ରଖିଛନ୍ତି ଜଣେ ଛାତ୍ର ।

ପାଟଣା: ଏବେ ଚାଲିଛି ପରୀକ୍ଷା ଋତୁ। ପିଲାମାନେ କରିଥିବା ପରିଶ୍ରମର ଫଳ ଜାଣିବା ପାଇଁ ପରୀକ୍ଷା ଫଳକୁ ଅପେକ୍ଷା କରିଥାନ୍ତି। କିଏ 100 ରୁ 99 ନମ୍ବର ରଖି ଟପ୍ କରୁଚି ତ କିଏ 60 ପ୍ରତିଶତରେ ବି ଖୁସି ହେଉଛନ୍ତି। କିନ୍ତୁ ମୋଟ୍ ନମ୍ବରରୁ କେହି ଅଧିକ ରଖିଥିବା କଥା କେବେ ଆପଣ ଶୁଣିଛନ୍ତି କି? କିନ୍ତୁ ଏଭଳି ଏକ ଅଜବ ଘଟଣା ଘଟିଛି ବିହାରର ଲଲିତ ନାରାୟଣ ମିଥିଲା ବିଶ୍ଵବିଦ୍ୟାଳୟରେ। ଯାହାକୁ ନେଇ ଏବେ ସାଧାରଣରେ ଖୁବ୍ ଚର୍ଚ୍ଚା ହେଉଛି।

ସୂଚନା ଅନୁସାରେ, ବିଶ୍ଵବିଦ୍ୟାଳୟର ଛାତ୍ର ଜଣଙ୍କ ହେଉଛି ଅନମୋଲ କୁମାର, ସେ ରାଜନୀତି ବିଜ୍ଞାନ ଅନର୍ସରେ ଯୁକ୍ତ ତିନିର ତୃତୀୟ ବର୍ଷର ଛାତ୍ର । କିଛିଦିନ ପୂର୍ବେ ପରୀକ୍ଷା ହୋଇଥିବା ବେଳେ ଜୁନ 30ରେ ଫଳାଫଳ ପ୍ରକାଶ ପାଇଥିଲା ଯେଉଁଥିରେ ଅନମୋଲ ଅନର୍ସର ଚତୁର୍ଥ ପେପରରେ ମୋଟ 100 ନମ୍ବରରୁ 150 ନମ୍ବର ରଖିଥିଲେ । ଯାହା ଦେଖି ସେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ । କେବଳ ଏତିକିରେ ସାରି ନଥିଲା ଅନମୋଲଙ୍କ ରେଜଲ୍ଟର ଚର୍ଚ୍ଚା। ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି ମୋଟ 420 ନମ୍ବର ରଖିଥିଲେ ଅନମୋଲ। କିନ୍ତୁ ସେ ଫେଲ ହୋଇଥିଲେ । ତେବେ ଏହି ମାର୍କସିଟ୍‌ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

କିନ୍ତୁ ଏପଟେ ଏତେ ନମ୍ବର ରଖିବା ପରେ ମଧ୍ୟ ସେ କେମିତି ଫେଲ ହେଲେ ସେନେଇ ଅନମୋଲ୍ ଅନୁସନ୍ଧାନ କରିଥିଲେ । ଇଣ୍ଟର କଲେଜର ଅଧ୍ୟକ୍ଷଙ୍କୁ ଏହି ବିଷୟରେ ଅଭିଯୋଗ କରିଥିଲେ ଏହି ଛାତ୍ର ଜନଙ୍କ । ଏହାପରେ ବିଶ୍ୱବିଦ୍ୟାଳୟର ବରିଷ୍ଠ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ । ଏହି ମାମଲା ସାମ୍ନାକୁ ଆସିବା ପରେ ବିଶ୍ୱବିଦ୍ୟାଳୟ ପ୍ରଥମେ ଏହାର ଅଫିସିଆଲ୍ ୱେବସାଇଟରୁ ମାର୍କ ସିଟ୍ ହଟାଇ ଦେଇଛି । ତେବେ ଟାଇପିଂ ତ୍ରୁଟି ଯୋଗୁ ଏପରି ହୋଇଥିଲା କଲେଜର ଜଣେ ଅଧିକାରୀ ସଫେଇ ଦେଇଛନ୍ତି । ତ୍ରୁଟି ସଂଶୋଧନ କରିବା ପରେ ନୂତନ ମାର୍କସିଟ୍ ପ୍ରଦାନ କରାଯାଇଥିଲା ।

English summary

University student scored 150 out of total mark 100 in Bihar. Marksheet goes viral in social media .