ଉତ୍ତରାଖଣ୍ଡରେ ଚଳିତ ମାସରେ ଲାଗୁ ହେବ UCC

ବରେଲି: ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ଗୁରୁବାର କହିଛନ୍ତି ଯେ ଚଳିତ ମାସରେ ଦେବଭୂମି ଉତ୍ତରାଖଣ୍ଡରେ ସମାନ ନାଗରିକ ସଂହିତା (ୟୁସିସି) ଲାଗୁ ହେବ। ଉତ୍ତରାଖଣ୍ଡ ଦେଶର ପ୍ରଥମ ରାଜ୍ୟ ହେବ ଯେଉଁଠାରେ ଏହା ଲାଗୁ ହେବ ।

୨୦୨୫ ଜାନୁଆରି ପହିଲାରୁ ଧାମି ସରକାର ରାଜ୍ୟରେ ୟୁସିସି ଲାଗୁ କରିବେ ବୋଲି ବିଶ୍ୱାସ କରାଯାଉଥିଲା। ତେବେ ପୌର ନିର୍ବାଚନ ନେଇ ବିଜ୍ଞପ୍ତି ପ୍ରକାଶ ପାଇଥିବାରୁ ଜାନୁଆରି ୨୩ ତାରିଖ ପର୍ଯ୍ୟନ୍ତ ସରକାର କୌଣସି ନିଷ୍ପତ୍ତି ନେଇପାରିବେ ନାହିଁ। ଏଭଳି ସ୍ଥିତିରେ ଉତ୍ତରାଖଣ୍ଡର ଧାମି ସରକାର ୨୬ ଜାନୁଆରୀ ୨୦୨୫ରୁ ୟୁସିସି ଲାଗୁ କରିବାକୁ ଘୋଷଣା କରିପାରନ୍ତି ବୋଲି ଅନୁମାନ କରାଯାଉଛି।

ମୁଖ୍ୟମନ୍ତ୍ରୀ ଧାମୀ କହିଛନ୍ତି ଯେ ଦେବଭୂମି ଉତ୍ତରାଖଣ୍ଡରେ ଭକ୍ତ ଏବଂ ପର୍ଯ୍ୟଟକଙ୍କ ଆଗମନ କ୍ରମାଗତ ଭାବରେ ବୃଦ୍ଧି ପାଉଛି । ହରିଦ୍ୱାର ଓ ଋଷିକେଶରେ ଆମେ ଗଙ୍ଗା କରିଡର ନିର୍ମାଣ କରିବୁ। ଶାରଦା ନଦୀ ଉପରେ ମଧ୍ୟ କରିଡର ନିର୍ମାଣ କରାଯାଉଛି, ଏହା ଉପରେ ଅନେକ କାମ ଆରମ୍ଭ ହୋଇଛି । ୨୯ତମ ଉତ୍ତରାୟଣୀ ମେଳାକୁ ଉଦଘାଟନ କରିବାକୁ ଆସିଥିବା ଧାମି କହିଛନ୍ତି ଯେ ଉତ୍ତରାଖଣ୍ଡରେ ଅନେକ ଉନ୍ନୟନମୂଳକ କାର୍ଯ୍ୟ ଚାଲିଛି।

ବାବା କେଦାରନାଥରେ ପୁନଃନିର୍ମାଣ ଚାଲିଛି ବୋଲି ସେ କହିଛନ୍ତି। ଉପନିର୍ବାଚନ ହୋଇଥିଲା ଏବଂ ସେଠାରେ ବିଜେପି ବିଜୟୀ ହୋଇଥିଲା। ବଦ୍ରିନାଥ ଧାମରେ ମାଷ୍ଟର ପ୍ଲାନ୍ ଅନୁଯାୟୀ କାମ ଚାଲିଛି। କୁମାଉଁ ଅଞ୍ଚଳର ସମସ୍ତ ମନ୍ଦିରର ସୌନ୍ଦର୍ଯ୍ୟକରଣ ଓ ପୁନଃନିର୍ମାଣ କାର୍ଯ୍ୟ ନିରନ୍ତର ଚାଲିଛି ବୋଲି ସେ କହିଛନ୍ତି।