ୟୁନିଫର୍ମ ସିଭିଲ କୋଡ ପ୍ରୟୋଗ କରିବା, ଆର୍ଟିକିଲ ୩୭୦ ପ୍ରତ୍ୟାହାର କରିବା ପରି ସହଜ ନୁହେଁ: ଗୁଲାମ ନବୀ ଆଜାଦ

Published: Saturday, July 8, 2023, 14:20 [IST]

ୟୁନିଫର୍ମ ସିଭିଲ କୋଡ଼କୁ ନେଇ ମତ ରଖିଛନ୍ତି ଗୁଲାମ ନବୀ ଆଜାଦ। ସେ କହିଛନ୍ତି ଯେ, ୟୁନିଫର୍ମ ସିଭିଲ କୋଡ ପ୍ରୟୋଗ କରିବା, ଆର୍ଟିକିଲ ୩୭୦ ପ୍ରତ୍ୟାହାର କରିବା ପରି ସହଜ ନୁହେଁ। ଏହା ସମସ୍ତ ଧର୍ମ ଉପରେ ପ୍ରଭାବ ପକାଇବ ବୋଲି ସେ କହିଛନ୍ତି।

କିଛି ଦିନ ତଳେ ଜଣାଶୁଣା ଅର୍ଥନୀତିଜ୍ଞ ତଥା ନୋବେଲ ପୁରସ୍କାର ପ୍ରାପ୍ତ ଅମର୍ତ୍ତ୍ୟ ସେନ୍ ଏହାକୁ ନେଇ ଏକ ବଡ଼ ଟିପ୍ପଣୀ କରିଥିଲେ । ଏହି ପଦକ୍ଷେକୁ ମୁର୍ଖତାପୂର୍ଣ୍ଣ କହିବା ସହ ୟୁନିଫର୍ମ ସିଭିଲ କୋଡ (ୟୁସିସି) ଲାଗୁ କରିବା ଚେଷ୍ଟା ନିନ୍ଦନୀୟ ବୋଲି କହିଥିଲେ। ଏହି ପ୍ରୟାସ ନିଶ୍ଚିତ ଭାବରେ 'ହିନ୍ଦୁ ରାଷ୍ଟ୍ର' ର ଚିନ୍ତାଧାରା ସହ ଜଡିତ, ଯାହାକି ମୁର୍ଖତାପୂର୍ଣ୍ଣ ବୋଲି ସେ କହିଥିଲେ।

ତେବେ ୟୁନିଫର୍ମ ସିଭିଲ କୋଡ଼ ଲାଗୁ ହେଲେ ସବୁ ଧର୍ମ ସମାନ ବୋଲି ସମ୍ବିଧାନରେ ରହିଥିବା ମୌଳିକ ନୀତିକୁ ଏହା ଅଧିକ ସୁଦୃଢ କରିବ । ଏହା ସମ୍ବିଧାନରେ ଉଲ୍ଲେଖ ଥିବା ସର୍ବ ଧର୍ମ ସମନ୍ଵୟ ନୀତିକୁ ଅଧିକ ପ୍ରାମାଣିକ ତଥା ବାସ୍ତବିକ ସ୍ୱରୂପ ଦେବା ନିମନ୍ତେ ଏକ ଅମୋଘ ଆଇନ ସାବ୍ୟସ୍ତ ହେବ । ମହିଳା ମାନଙ୍କୁ ବିବାହ, ଛାଡପତ୍ର, ଉତ୍ତରାଧିକାରୀ, ପୋଷ୍ୟ ସନ୍ତାନ ଗ୍ରହଣ ଇତ୍ୟାଦି କ୍ଷେତ୍ରରେ ଧାର୍ମିକ ଜଟିଳତା ଯୋଗୁଁ ରହିଥିବା ସମସ୍ୟାରୁ ମୁକ୍ତି ଦେବା ସହିତ ଅଧିକ ସାମାଜିକ ସୁରକ୍ଷା ପ୍ରଦାନ କରିବ ।

ନାଗରିକମାନେ ଦେଇପାରିବେ ନିଜର ମତାମତ:
ଦେଶର ଲ' କମିଶନଦ୍ଵାରା ଏହି ପ୍ରସ୍ତାବିତ ବିଧେୟକ ଉପରେ ମତାମତ ଜଣାଇବା ପାଇଁ ଭାରତୀୟ ନାଗରିକଙ୍କୁ ଆହ୍ଵାନ କରାଯାଇଛି । ଜୁଲାଇ ମାସ ୧୪ ତାରିଖ ପର୍ଯ୍ୟନ୍ତ ଏହା ଉପରେ ମତାମତ ପ୍ରଦାନ କରିବା ପାଇଁ କମିଶନ ପକ୍ଷରୁ ସୁଯୋଗ ପ୍ରଦାନ କରାଯିବ ।

Published On July 8, 2023