କମିଲା ଟମାଟୋ ଦର: ମାତ୍ର ୧୪ ଟଙ୍କା ମିଳୁଛି ଟମାଟୋ; ଜାଣନ୍ତୁ, କେଉଁଠି ?

Updated: Monday, August 28, 2023, 13:49 [IST]

ନୂଆଦିଲ୍ଲୀ: କମିଲା ଟମାଟୋ ଦର । ଏବେ ଟମାଟୋ କିଲୋ ମାତ୍ର ୧୪ ଟଙ୍କା । ଆଜ୍ଞା ହଁ.. ଆପଣ ଠିକ୍ ଶୁଣିଛନ୍ତି, ଏବେ ମାତ୍ର ୧୪ ଟଙ୍କାରେ ମିଳୁଛି ଟାମାଟୋ । ଆକାଶ ଛୁଆଁ ହୋଇଥିଵା ଟମାଟୋର ଦର ଏଵେ ନିୟନ୍ତ୍ରଣକୁ ଆସିଛି । କିଛିଦିନ ତଳେ ବଜାରରେ ୧୮୦ରୁ ୨୦୦ ଟଙ୍କାରେ ବିକ୍ରି ହେଉଥିବା ଟମାଟୋ ଏବେ ମାତ୍ର ୧୪ ଟଙ୍କାରେ ମିଳୁଛି ।

ମହିଶୁରର ଏପିଏମସିରେ ଟମାଟୋ ମୂଲ୍ୟ ୧୪ ଟଙ୍କାକୁ ଖସିଛି । ଯାହା ଶନିବାର ଦିନ ୨୦ ଟଙ୍କା ଥିଲା । ସେହିପରି ବେଙ୍ଗାଲୁରୁରେ ଟମାଟୋର ଖୁଚୁରା ମୂଲ୍ୟ ରବିବାର କିଲୋଗ୍ରାମ ପ୍ରତି ୩୦ରୁ ୪୦ ଟଙ୍କାରେ ବିକ୍ରି ହେଉଛି ।

ତେବେ ନେପାଳରୁ ଟମାଟୋ ଆମଦାନୀ ହେତୁ ଟମାଟୋ ଦରରେ ହ୍ରାସ ଘଟିଛି । ତେବେ ଆଗାମୀ ଦିନରେ ଆକଳନ କରାଯାଉଛି ଯେ, ହୋଲସେଲ ବଜାରରେ ମୂଲ୍ୟ କିଲୋଗ୍ରାମ ପ୍ରତି ୧୦ରୁ ୫ ଟଙ୍କା ହ୍ରାସ ହୋଇପାରେ।

ଅନାବଶ୍ୟକ ବର୍ଷା ଓ ଫସଲ ହାନି କାରଣରୁ ଟମାଟୋର ଅମଳ ବାଧା ପ୍ରାପ୍ତ ହୋଇ ଦରଦାମ ବୃଦ୍ଧି ହୋଇଥିଲା । ପରେ ନେପାଳି ଟମାଟୋ ଭାରତୀୟ ବଜାରରେ ଟମାଟୋର ଭାଉ ନିୟନ୍ତ୍ରଣକୁ ଆଣିଥିଲା । ନେପାଳୀ ଟମାଟୋ ଆମଦାନୀ ପରେ ଏବେ ଦକ୍ଷୀଣ ଭାରତରେ ଅମଳ ହେଉଥିବା ଟମାଟୋ ଉତ୍ତର ଭାରତକୁ ରପ୍ତାନୀ ହେଉ ନାହିଁ ।