ଆଜି ୭୫ ତମ 'ସେନା ଦିବସ', ପ୍ରଥମ ଥର ଦିଲ୍ଲୀ ବାହାରେ ପାଳନ ହେଲା 'ଆର୍ମି ଡେ'

ଆଜି ୭୫ ତମ 'ସେନା ଦିବସ', ପ୍ରଥମ ଥର ଦିଲ୍ଲୀ ବାହାରେ ପାଳନ ହେଲା 'ଆର୍ମି ଡେ' । ୭୫ତମ 'ସେନା ଦିବସ' ପ୍ରଥମ ଥର ନୂଆଦିଲ୍ଲୀ ବଦଳରେ ବେଙ୍ଗାଲୁରୁରେ ପାଳନ କରାଯାଉଛି । ୧୯୪୯ରେ ପ୍ରଥମ ଥର 'ଆର୍ମି ଡେ' ଦିଲ୍ଲୀରେ ପାଳନ କରାଯାଇଥିଲା ।

Updated: Sunday, January 15, 2023, 14:15 [IST]

ନୂଆଦିଲ୍ଲୀ: ଆଜି ଜାନୁଆରୀ ୧୫ରେ ଦେଶ ୭୫ତମ 'ସେନା ଦିବସ' ପାଳନ କରୁଛି । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମସ୍ତ ବୀର ଯବାନ ଏବଂ ସେମାନଙ୍କ ପରିବାରବର୍ଗଙ୍କୁ ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ ଟ୍ୱିଟ୍ କରି ଲେଖିଛନ୍ତି ଯେ, 'ସେନା ଦିବସରେ ମୁଁ ସମସ୍ତ ଯବାନ ଏବଂ ସେମାନଙ୍କ ପରିବାରବର୍ଗଙ୍କୁ ମୋର ଶୁଭେଚ୍ଛା ଜଣାଉଛି । ପ୍ରତ୍ୟେକ ଭାରତୀୟ ଆମ ଯବାନଙ୍କ ପାଇଁ ଗର୍ବିତ ଏବଂ ଆମର ଯବାନମାନଙ୍କ ପାଇଁ ସର୍ବଦା କୃତଜ୍ଞ ରହିବେ । ସେମାନେ ସର୍ବଦା ଆମ ଦେଶକୁ ସୁରକ୍ଷିତ ରଖିଛନ୍ତି । ସଙ୍କଟ ସମୟରେ ତାଙ୍କର ସେବାକୁ ସାରା ଦେଶ ପ୍ରଶଂସା କରିଛି ।

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ସେନା କର୍ମଚାରୀ ଏବଂ ସେମାନଙ୍କ ପରିବାରକୁ ଅଭିନନ୍ଦନ ଜଣାଇଛନ୍ତି। ସେ ଟ୍ୱିଟ୍ କରି ଲେଖିଛନ୍ତି, "ସେନା ଦିବସରେ ସମସ୍ତ ଭାରତୀୟ ସେନା କର୍ମଚାରୀ ଏବଂ ସେମାନଙ୍କ ପରିବାରକୁ ଅଭିନନ୍ଦନ। ଦେଶ ସେମାନଙ୍କର ଅଦମ୍ୟ ସାହସ, ବୀରତ୍ୱ, ବଳିଦାନ ଏବଂ ସେବାକୁ ନମନ କରୁଛି । ଦେଶକୁ ସୁରକ୍ଷିତ ରଖିବା ପାଇଁ ଭାରତୀୟ ସେନାର ଉଦ୍ୟମକୁ ନେଇ ଆମେ ଗର୍ବିତ' । ସେହିପରି କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମଧ୍ୟ ଟୁଇଟ୍ କରି ଶୁଭେଚ୍ଛା ଜଣାଇଛନ୍ତି ।

ତେବେ ୭୫ତମ 'ସେନା ଦିବସ' ପ୍ରଥମ ଥର ନୂଆଦିଲ୍ଲୀ ବଦଳରେ ବେଙ୍ଗାଲୁରୁରେ ପାଳନ କରାଯାଉଛି । ୧୯୪୯ରେ ପ୍ରଥମ ଥର 'ଆର୍ମି ଡେ' ଦିଲ୍ଲୀରେ ପାଳନ କରାଯାଇଥିଲା । ହେଲେ ଚଳିତ ବର୍ଷ ପ୍ରଥମ ଥର ବେଙ୍ଗାଲୁରୁର ଗୋବିନ୍ଦାସ୍ୱାମୀ ଡ୍ରିଲ୍ ଗ୍ରାଉଣ୍ତରେ ଭାରତୀୟ ସେନା ଦିବସ ପାଳିତ ହୋଇଛି । ଏହି ଅବସରରେ ସେନା ମୁଖ୍ୟ ଜେନେରାଲ ମନୋଜ ପାଣ୍ତେ କହିଛନ୍ତି, ଭାରତର ସୀମାବର୍ତ୍ତୀ ଅଞ୍ଚଳରେ ଭିତିଭୂମି ସୁଦୃଢ ହେଉଛି । ଭାରତୀୟ ସେନାର ଦୃଢ ପ୍ରତିରକ୍ଷା ଆଭିମୁଖ୍ୟ ଜାରି ରହିଛି । ଯେ କୌଣସି ପିରିସ୍ଥିତିର ମୁକାବିଲା କରିବା ପାଇଁ ଆମେ ପ୍ରସ୍ତୁତ ଅଛୁ ।

୧୫ ଜାନୁଆରୀରେ ସେନା ଦିବସ ପାଳନ କରାଯାଏ କାରଣ ଏହି ଦିନ ୧୯୪୯ ରେ ଭାରତୀୟ ସେନା ବ୍ରିଟିଶ ସୈନ୍ୟବାହିନୀରୁ ସମ୍ପୂର୍ଣ୍ଣ ମୁକ୍ତ ହୋଇଥିଲା । ଏହା ପରେ, ପ୍ରଥମ ଥର ପାଇଁ ଲେଫ୍ଟନାଣ୍ଟ ଜେନେରାଲ୍ କେ.ଏମ୍ କରିଆପ୍ପା ପ୍ରଥମ ଭାରତୀୟ ଭାବରେ କମାଣ୍ଡର-ଇନ୍-ଚିଫ୍ ହୋଇଥିଲେ । ସ୍ୱାଧୀନ ଭାରତର ପ୍ରଥମ ସେନା ମୁଖ୍ୟ ଥିଲେ କରିଆପ୍ପା । କେଏମ୍ କରିଆପ୍ପା "କିପର" ଭାବରେ ମଧ୍ୟ ଜଣାଶୁଣା ।