ତିରୁପତିସ୍ଥିତ ଇସ୍କନ୍ ମନ୍ଦିରକୁ ବୋମା ଧମକ

Tirupati ISKCON Temple Gets Bomb Threat: ତିରୁପତିସ୍ଥିତ ଇସ୍କନ୍ ମନ୍ଦିରକୁ ବୋମାରେ ଉଡାଇବାର ମିଳିଲା ଧମକ । ରବିବାର ଇମେଲ ମାଧ୍ୟମରେ ଏହି ଧମକ ମିଳିଥିବା ନେଇ ସୂଚନା ରହିଛି । ଏନେଇ ମନ୍ଦିର ପ୍ରଶାସନ ପକ୍ଷରୁ ପୋଲିସ ନିକଟରେ ଅଭିଯୋଗ କରାଯାଇଛି । ଏହି ଅଭିଯୋଗ ଅନୁସାରେ, ଆଇଏସଆଇଏସ ଆତଙ୍କବାଦୀମାନେ ମନ୍ଦିରକୁ ଉଡ଼ାଇବା ପାଇଁ ଧମକ ଦେଇଛନ୍ତି ।

ସୂଚନା ପାଇବା ମାତ୍ରେ ତିରୁପତି ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ମନ୍ଦିରରେ ପରିସରରେ ଯାଞ୍ଚ ଆରମ୍ଭ ହୋଇଯାଇଛି । ବିସ୍ଫୋରକ ସାମଗ୍ରୀର ତଦନ୍ତ ପାଇଁ ସ୍ଥାନୀୟ ପୋଲିସ ବୋମା ନିଷ୍କାସନ ସ୍କ୍ୱାଡ ମଧ୍ୟ ଘଟଣାସ୍ଥଳରେ ପହଞ୍ଚିଛି। ହେଲେ ମନ୍ଦିର ପରିସରରୁ କୌଣସି ବିସ୍ଫୋରକ କିମ୍ବା ଅନ୍ୟ କୌଣସି ଆପତ୍ତିଜନକ ମିଳି ନାହିଁ ।

ସର୍କଲ ଇନ୍ସପେକ୍ଟର ଶ୍ରୀନିବାସୁଲୁ କହିଛନ୍ତି ଯେଉଁମାନେ ଏପରି ଧମକ ଦେଇଛନ୍ତି ସେମାନଙ୍କୁ ଚିହ୍ନଟ କରିବା ପାଇଁ ସମସ୍ତ ପ୍ରକାରର ଚେଷ୍ଟା ଜାରି ରହିଛି । ତେବେ ଏହା ଏକ ନକଲି ମେଲ ବୋଲି ପୋଲିସ ସନ୍ଦେହ କରୁଛି। ଗତ ତିନି ଦିନ ମଧ୍ୟରେ ଏହା ତିରୁପତିସ୍ଥିତ ମନ୍ଦିରକୁ ମେଳିଥିବା ଚତୁର୍ଥ ନକଲି ମେଲ୍ ।ପୂର୍ବରୁ ଏକ ଇମେଲରେ ମଧ୍ୟ ମନ୍ଦିରକୁ ବୋମାରେ ଉଡାଇବାରେ ଧମକ ମିଳିଥିଲା ।

ଏହାପୂର୍ବରୁ ଶନିବାର ଦିନ ଦୁଇଟି ହୋଟେଲକୁ ମଧ୍ୟ ବୋମା ଧମକ ମିଳିଥିଲା ଏହା ମଧ୍ୟ ଏକ ଗୁଜବ ବୋଲି ସୂଚନା ରହିଥିଲା । ଏହି ଘଟଣା ପୂର୍ବରୁ ମଧ୍ୟ ସହରର ଅନ୍ୟ ତିନୋଟି ହୋଟେଲରେ ବୋମା ଧମକ ଦିଆଯାଇଥିଲା। ଲଗାତାର ଧମକ ଯୋଗୁଁ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି।