ପାକିସ୍ତାନକୁ ପ୍ରଧାନମନ୍ତ୍ରୀଙ୍କ ଚେତାବନୀ,କହିଲେ ଆତଙ୍କବାଦର କଣ୍ଟାକୁ କାଢ଼ିକି ହିଁ ରହିବୁ

ଅପରେଶନ ସିନ୍ଦୂର ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଥମ ଥର ପାଇଁ ଗୁଜରାଟ ଗସ୍ତରେ ଅଛନ୍ତି। ସେ ମଙ୍ଗଳବାର ସକାଳେ ଗାନ୍ଧୀ ନଗରରେ ପହଞ୍ଚିଥିଲେ। ପ୍ରଧାନମନ୍ତ୍ରୀ ଏଠାରେ ଏକ ରୋଡ ଶୋ' କରିଥିଲେ ଏବଂ ତା'ପରେ ଜନସାଧାରଣଙ୍କୁ ସମ୍ବୋଧିତ କରିଥିଲେ। ପ୍ରଧାନମନ୍ତ୍ରୀ ମୋଦି ଗୁଜରାଟରୁ ପାକିସ୍ତାନକୁ ଏକ କଡ଼ା ବାର୍ତ୍ତା ଦେଇଥିଲେ ଏବଂ କହିଥିଲେ ଯେ ଆମେ ଏହି କଣ୍ଟାକୁ ଦୂର କରିବୁ। ସେ କହିଥିଲେ ଯେ ଇଟାର ଜବାବ ପଥରରେ ଦିଆଯିବା ଉଚିତ। ପ୍ରଧାନମନ୍ତ୍ରୀ ପାକିସ୍ତାନ ଅଧିକୃତ କଶ୍ମୀରର ମଧ୍ୟ ଉଲ୍ଲେଖ କରିଥିଲେ।

ଜନସାଧାରଣଙ୍କୁ ସମ୍ବୋଧିତ କରିବା ସମୟରେ ପ୍ରଧାନମନ୍ତ୍ରୀ ମୋଦି କହିଥିଲେ, "ଶରୀର ଯେତେ ସୁସ୍ଥ ହେଉନା କାହିଁକି, ଗୋଟିଏ କଣ୍ଟା ସମଗ୍ର ଶରୀରକୁ ଯନ୍ତ୍ରଣା ଦିଏ। ତେଣୁ ଆମେ ନିଷ୍ପତ୍ତି ନେଇଛୁ, ଆମେ ଏହି କଣ୍ଟାକୁ ନିଶ୍ଚିତ ଭାବେ ବାହାର କରିବୁ।"

ପାକିସ୍ତାନକୁ ତୀବ୍ର ଆକ୍ରମଣ କରି ପ୍ରଧାନମନ୍ତ୍ରୀ କହିଛନ୍ତି, "୧୯୪୭ରେ ମା' ଭାରତୀର ଖଣ୍ଡବିଖଣ୍ଡନ ହୋଇଥିଲା । ଜଞ୍ଜୀର କାଟିବା ଉଚିତ ଥିଲା, କିନ୍ତୁ ବାହୁ କଟାଗଲା। ଦେଶକୁ ତିନୋଟି ଖଣ୍ଡରେ ବିଭାଜିତ କରାଗଲା ଏବଂ ସେହି ରାତିରେ କଶ୍ମୀର ଭୂମିରେ ପ୍ରଥମ ଆତଙ୍କବାଦୀ ଆକ୍ରମଣ ହେଲା। ମା' ଭାରତୀର ଏକ ଅଂଶ ଆତଙ୍କବାଦୀ ଓ ମୁଜାହିଦ୍ଦୀନଙ୍କ ବଳରେ ପାକିସ୍ତାନ ହସ୍ତଗତ କରିନେଲା। ଯଦି ସେହି ଦିନ ଏହି ମୁଜାହିଦ୍ଦୀନମାନଙ୍କୁ ମୃତ୍ୟୁ ଦିଆଯାଇଥାନ୍ତା ଏବଂ ସରଦାର ପଟେଲଙ୍କ କଥା ମାନି ନିଆଯାଇଥାନ୍ତା, ତେବେ ୭୫ ବର୍ଷ ଧରି ଚାଲିଆସୁଥିବା ଏହି ଘଟଣାକ୍ରମ ଦେଖିବାକୁ ମିଳିନଥାନ୍ତା।"

ପ୍ରଧାନମନ୍ତ୍ରୀ ଆହୁରି କହିଛନ୍ତି,''ପାକିସ୍ତାନକୁ ଆମେ ଯୁଦ୍ଧରେ ୩ ଥର ହରାଇଛୁ । ଶରୀର ଯେତେ ସୁସ୍ଥ ଥାଉ ଗୋଟିଏ କଣ୍ଟା ଫୁଟିଗଲେ ଶରୀରକୁ କଷ୍ଟ ହୁଏ । ତେଣୁ ଆମେ କଣ୍ଟାକୁ କାଢିକି ହିଁ ରହିବୁ । ଇଟାର ଜବାବ୍‌ ପଥରରେ ଦେବୁ । ଭାରତ ବୀର ଯବାନଙ୍କ ମାଟି । ସେମାନେ (ପାକିସ୍ତାନ) ଜାଣିଛନ୍ତି ଯୁଦ୍ଧରେ ଜିତିବେ ନାହିଁ । ୧୯୬୦ ସିନ୍ଧୁ ଜଳ ଚୁକ୍ତି ପଢିଲେ ଆଶ୍ଚର୍ଯ୍ୟ ହେବେ । ତଳ ଡ୍ୟାମ ଗୁଡିକ ବନ୍ଦ କରିଦିଆଯାଇଥିଲା । ଜମ୍ମୁ ନଦୀ ଉପରେ ନିର୍ମିତ ଡ୍ୟାମ ସଫା କରାଯିବନି ବୋଲି ନିଷ୍ପତ୍ତି ହୋଇଥିଲା । ୬୦ ବର୍ଷ ହେବ ଗେଟ୍ ଗୁଡିକ ଖୋଲା ଯାଇନଥିଲା । ଡ୍ୟାମ ସଫା ପାଇଁ ଛୋଟ ଡ୍ୟାମ ଖୋଲିଛୁ ଫଳରେ ପାକିସ୍ତାନରେ ବନ୍ୟା ଆସିଛି । ବିଦେଶୀ ସାମଗ୍ରୀ ବ୍ୟବହାର ବନ୍ଦ କଲେ ହିଁ ଅପରେସନ୍‌ ସିନ୍ଦୂର ସଫଳ ହେବ ।''

ଆତଙ୍କୀ କାର୍ଯ୍ୟକଳାପ ପ୍ରକ୍ସି ୱାର ନୁହେଁ- ଆତଙ୍କୀ ଆଡ୍ଡାକୁ ମାଟିରେ ମିଶାଇଥିଲୁ । ସବୁକୁ କ୍ୟାମେରାରେ କଏଦ କରିଥିଲୁ । କାରଣ ଯେପରି କେହି ଆମକୁ ପ୍ରମାଣ ନମାଗୁ । କାରଣ ସର୍ଜିକାଲ ଷ୍ଟ୍ରାଇକ ଏବଂ ଏୟାରଷ୍ଟ୍ରାଇକର ପ୍ରମାଣ ସରକାରଙ୍କୁ ମାଗିଥିଲେ । ଏଥର କ୍ୟାମେରା ବ୍ୟବସ୍ଥା କରିଥିଲୁ । ୨୨ ମିନିଟରେ ଆତଙ୍କୀ ଠିକଣାକୁ ଧ୍ୱଂସ କରିଦେଇଥିଲୁ । ଆତଙ୍କୀ କାର୍ଯ୍ୟକଳାପ କେବଳ ପ୍ରକ୍ସି ୱାର ନୁହେଁ । ମେ ୬ ପରେ ଯେଉଁ ଦୃଶ୍ୟ ଦେଖିଥିଲୁ ଏହାପରେ ଆଉ ଏହାକୁ ପ୍ରକ୍ସି ୱାର କହିପାରିବା ନାହିଁ ବୋଲି କହିଛନ୍ତି ପ୍ରଧାନମନ୍ତ୍ରୀ ।

ପ୍ରଧାନମନ୍ତ୍ରୀ ମଙ୍ଗଳବାର ଗାନ୍ଧୀନଗରରେ ଏକ ରୋଡ ଶୋ' କରିଥିଲେ ଏବଂ ଏହି ସମୟରେ ବହୁ ସଂଖ୍ୟକ ଲୋକ ତାଙ୍କୁ ସ୍ବାଗତ କରିବାକୁ ଆସିଥିଲେ। ପ୍ରଧାନମନ୍ତ୍ରୀଙ୍କ ଦୁଇ ଦିନିଆ ଗୁଜରାଟ ଗସ୍ତ ସମୟରେ ଏହା ତାଙ୍କର ଚତୁର୍ଥ ରୋଡ ଶୋ'। ୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବରେ ଭାରତର ସାମରିକ କାର୍ଯ୍ୟାନୁଷ୍ଠାନ ଅପରେଶନ ସିନ୍ଦୂର ପରେ ଏହା ମୋଦିଙ୍କ ନିଜ ରାଜ୍ୟକୁ ପ୍ରଥମ ଗସ୍ତ।