ତେଜ ପ୍ରତାପଙ୍କ ବଡ଼ ଘୋଷଣା, ସ୍ବାଧୀନ ପ୍ରାର୍ଥୀ ଭାବେ ଲଢ଼ିବେ ନିର୍ବାଚନ

ବିହାରର ସବୁଠାରୁ ବଡ଼ ବିରୋଧୀ ଦଳ ଆରଜେଡିରୁ ବହିଷ୍କୃତ ବିଧାୟକ ତେଜ ପ୍ରତାପ ଯାଦବ ଶନିବାର ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ, ସେ ମହୁଆ ବିଧାନସଭା ଆସନରୁ ସ୍ୱାଧୀନ ପ୍ରାର୍ଥୀ ଭାବରେ ନିର୍ବାଚନ ଲଢ଼ିବେ । ସେ ଟିମ୍ ତେଜ ପ୍ରତାପ ଗଠନ କରିଛନ୍ତି । ଜୁଲାଇ ୩୧ରେ ବୈଶାଳୀ ଜିଲ୍ଲାର ମହୁଆରେ ମଧ୍ୟ ଏକ କାର୍ଯ୍ୟକ୍ରମ ଅନୁଷ୍ଠିତ ହେବ ।

ତେଜ ପ୍ରତାପ ଯାଦବ ନିଜର ନିର୍ବାଚନୀ ଅଭିଯାନକୁ ଆଗେଇ ନେବା ପାଇଁ 'ଟିମ୍ ତେଜ ପ୍ରତାପ' ନାମକ ଏକ ମଞ୍ଚ ଗଠନ କରିଛନ୍ତି। ଏହି ଟିମ୍ ତାଙ୍କ ନିର୍ବାଚନ ପ୍ରଚାର ଓ ରଣନୀତି ପରିଚାଳନା କରିବ। ସେ କହିଛନ୍ତି, "ଏହା ଏକ ଓପନ୍ ପ୍ଲାଟଫର୍ମ, ଯେଉଁଠାରେ ସମସ୍ତେ ଯୋଗଦେଇ ଜନତାଙ୍କ ସେବା କରିପାରିବେ।" ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଏହା କୌଣସି ନୂଆ ରାଜନୈତିକ ଦଳ ନୁହେଁ, ବରଂ ଜନତାଙ୍କ ସହ ସଂଯୋଗ ସ୍ଥାପନ କରିବାର ଏକ ମାଧ୍ୟମ। ତେଜ ପ୍ରତାପଙ୍କ ଅନୁଯାୟୀ, ଏହି ଟିମ୍ ମାଧ୍ୟମରେ ସେ ଅନ୍ୟ ପ୍ରାର୍ଥୀମାନଙ୍କୁ ମଧ୍ୟ ସମର୍ଥନ ଦେବେ, ଯେପରି ଶାହପୁରରୁ ମଦନ କୁମାରଙ୍କୁ।

ଏହା ପୂର୍ବରୁ ଜୁଲାଇ ୨୫ ତାରିଖରେ ତେଜ ପ୍ରତାପ ଯାଦବ ତାଙ୍କ ସୋସିଆଲ ମିଡିଆ ଆକାଉଣ୍ଟରୁ ତାଙ୍କ ଭଉଣୀ ମିସା ଭାରତୀ, ରାଜଲକ୍ଷ୍ମୀ ଏବଂ ହେମା ଯାଦବଙ୍କୁ ଅନଫଲୋ କରିଥିଲେ। ସେ ଆରଜେଡିର ଅଫିସିଆଲ୍ ଆକାଉଣ୍ଟକୁ ମଧ୍ୟ ଅନଫଲୋ କରିଛନ୍ତି ଏବଂ ଏବେ ତାଙ୍କର ନୂତନ ଦଳ ଗଠନ କରି, ତେଜ ପ୍ରତାପ ଯାଦବ ପରିବାରଠାରୁ ନିଜକୁ ଦୂରେଇ ରଖିଛନ୍ତି ।