ସୁଷମା ସ୍ବରାଜଙ୍କ ସ୍ବାମୀ ସ୍ବରାଜ କୌଶଲଙ୍କ ପରଲୋକ

ସ୍ବର୍ଗତଃ ଭାଜପା ନେତ୍ରୀ ସୁଷମା ସ୍ବରାଜଙ୍କ ସ୍ବାମୀ ସ୍ବରାଜ କୌଶଳଙ୍କ ପରଲୋକ ଘଟିଛି। ତାଙ୍କୁ ୭୩ ବର୍ଷ ବୟସ ହୋଇଥିଲା। କିଛି ଦିନ ଧରି ଅସୁସ୍ଥ ଥିଲେ। ତାଙ୍କର ଜନ୍ମ ୧୨ ଜୁଲାଇ ୧୯୫୨ରେ ହିମାଚଳ ପ୍ରଦେଶର ସୋଲାନରେ ହୋଇଥିଲା। ସୁପ୍ରିମକୋର୍ଟର ବରିଷ୍ଠ ଆଇନଜୀବୀ ତଥା ମିଜୋରାମର ପୂର୍ବତନ ରାଜ୍ୟପାଳଙ୍କ ଆକସ୍ମିକ ମୃତ୍ୟୁ ରାଜନୈତିକ ମହଲରେ ଶୋକ ସୃଷ୍ଟି କରିଛି।

ସ୍ବରାଜ କୌଶଳ ଦେଶର ଜଣେ ପ୍ରସିଦ୍ଧ ଓକିଲ ଥିଲେ। ସେ ମିଜୋରାମର ରାଜ୍ୟପାଳ ଭାବରେ ମଧ୍ୟ କାର୍ଯ୍ୟ କରିଥିଲେ। ସ୍ବରାଜଙ୍କ ଝିଅ ବାଂସୁରୀ ସ୍ବରାଜ ନୂଆଦିଲ୍ଲୀ ନିର୍ବାଚନମଣ୍ଡଳୀର ଭାଜପା ଏମ୍‌ପି। ତାଙ୍କ ପିତାଙ୍କ ମୃତ୍ୟୁ ପରେ, ଭାଜପା ଏବଂ ଅନ୍ୟାନ୍ୟ ଦଳର ନେତାମାନେ ତାଙ୍କ ଘରେ ଏକତ୍ରିତ ହୋଇଛନ୍ତି।

ବାଂସୁରୀ ଇନଷ୍ଟାଗ୍ରାମରେ ପୋଷ୍ଟ କରି ଲେଖିଛନ୍ତି, ପାପା ସ୍ବରାଜ କୌଶଳ ଜୀ, ଆପଣଙ୍କ ସ୍ନେହ, ଶୃଙ୍ଖଳା, ସରଳତା, ଦେଶପ୍ରେମ ଏବଂ ଅପାର ଧର୍ଯ୍ୟ ମୋ ଜୀବନର ଆଲୋକ ଯାହା କେବେ ମଳିନ ହେବ ନାହିଁ। ଆପଣଙ୍କ ବିୟୋଗ ମୋ ହୃଦୟରେ ସବୁଠାରୁ ଗଭୀର ଯନ୍ତ୍ରଣା ଭାବରେ ଆସିଛି, କିନ୍ତୁ ମୋର ମନ ଏହି ବିଶ୍ୱାସକୁ ଧରି ରଖିଛି ଯେ, ଆପଣ ଏବେ ମାଆଙ୍କ ସହିତ, ଈଶ୍ୱରଙ୍କ ଉପସ୍ଥିତିରେ ଅନନ୍ତ ଶାନ୍ତିରେ ପୁନଃମିଳନ ହୋଇଛନ୍ତି। ଆପଣଙ୍କ ଝିଅ ହେବା ମୋ ଜୀବନର ସର୍ବଶ୍ରେଷ୍ଠ ସମ୍ମାନ ଏବଂ ଐତିହ୍ୟ, ମୂଲ୍ୟବୋଧ। ଆପଣଙ୍କ ଆଶୀର୍ବାଦ ମୋ ଭବିଷ୍ୟତ ଯାତ୍ରାର ମୂଳଦୁଆ ହେବ।

ସ୍ବରାଜ କୌଶଳ ଦିଲ୍ଲୀ ବିଶ୍ୱବିଦ୍ୟାଳୟ ଏବଂ ପଞ୍ଜାବ ବିଶ୍ୱବିଦ୍ୟାଳୟରେ ଅଧ୍ୟୟନ କରିଥିଲେ। ତାଙ୍କୁ ସୁପ୍ରିମକୋର୍ଟର ଜଣେ ପ୍ରମୁଖ ଓକିଲ ଭାବରେ ବିବେଚନା କରାଯାଏ। ସେ ପ୍ରାୟ ଛଅ ବର୍ଷ ଧରି ରାଜ୍ୟସଭା ଏମ୍‌ପି ଭାବରେ କାର୍ଯ୍ୟ କରିଥିଲେ। ପରେ ସେ ମିଜୋରାମର ରାଜ୍ୟପାଳ ଭାବରେ କାର୍ଯ୍ୟ କରିଥିଲେ। ସ୍ବରାଜ କୌଶଳ ରାଜ୍ୟପାଳ ପଦବୀରେ ଥିବା ସର୍ବକନିଷ୍ଠ ବ୍ୟକ୍ତି ହୋଇଥିଲେ।

ସ୍ବରାଜ କୌଶଳ ୧୯୭୫ ମସିହାରେ ସୁଷମା ସ୍ବରାଜଙ୍କୁ ବିବାହ କରିଥିଲେ। ତାଙ୍କ ପତ୍ନୀ ସୁଷମା ସୱରାଜ ଭାଜପାର ଜଣେ ପ୍ରମୁଖ ନେତ୍ରୀ ଥିଲେ। ୨୦୧୪ ମସିହାରେ, ସେ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଏନଡିଏ ସରକାରରେ ବୈଦେଶିକ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ୨୦୧୯ ଅଗଷ୍ଟରେ ସୁଷମାଙ୍କ ଦେହାନ୍ତ ହୋଇଥିଲା। ସେ ଦିଲ୍ଲୀର ମୁଖ୍ୟମନ୍ତ୍ରୀ ଭାବରେ ମଧ୍ୟ କାର୍ଯ୍ୟ କରିଥିଲେ।