ପହଲଗାମ ଆତଙ୍କବାଦ ଆକ୍ରମଣ ଉପରେ ଶୁଣାଣି କଲେନି ସୁପ୍ରିମକୋର୍ଟ

Supreme Court: ଜମ୍ମୁ ଏବଂ କାଶ୍ମୀରର ପହଲଗାମରେ ଏପ୍ରିଲ ୨୨ ତାରିଖରେ ହୋଇଥିବା ଆତଙ୍କବାଦୀ ଆକ୍ରମଣର ନ୍ୟାୟିକ ତଦନ୍ତ ଦାବିରେ ହୋଇଥିବା ଜନହିତକର ଆବେଦନର ଶୁଣାଣି କରିବାକୁ ସୁପ୍ରିମକୋର୍ଟ ସ୍ପଷ୍ଟ ଭାବରେ ମନା କରିଦେଇଛନ୍ତି।

ପହଲଗାମ ଆତଙ୍କବାଦ ଆକ୍ରମଣର ଶୁଣାଣି କଲେ ନାହିଁ ସୁପ୍ରିମକୋର୍ଟ । ଏହା ସହିତ, ଆବେଦନକୁ ଖାରଜ କରାଯାଇଛି । ଜଷ୍ଟିସ ସୂର୍ଯ୍ୟକାନ୍ତ ଏବଂ ଜଷ୍ଟିସ ଏନ. କୋଟିଶ୍ୱର ସିଂହଙ୍କ ଖଣ୍ଡପୀଠ ଆବେଦନକାରୀଙ୍କୁ କହିଛନ୍ତି, ବର୍ତ୍ତମାନ ପିଟିସନ୍ କରିବାର ସମୟ ନୁହେଁ, ଆତଙ୍କବାଦ ବିରୋଧରେ ଏକଜୁଟ ହେବାର ସମୟ । ସେନା ମନୋବଳ ଦୁର୍ବଳ କରନାହିଁ ବୋଲି ମଧ୍ୟ କହିଲେ ସୁପ୍ରିମକୋର୍ଟ ।

ସୁପ୍ରିମକୋର୍ଟ ଶୁଣାଣି କରିବା ପାଇଁ ମନା କରିବା ସହ କହିଛନ୍ତି, ଦୟାକରି ଏପରି ପଦକ୍ଷେପ ନିଅନ୍ତୁ ନାହିଁ ସେନା ମନୋବଳ ଦୁର୍ବଳ ହୋଇଯାଇ ପାରେ । ଖଣ୍ଡପୀଠ ଆହୁରି କହିଛନ୍ତି ଯେ ଅବସରପ୍ରାପ୍ତ ବିଚାରପତିମାନେ ଆତଙ୍କବାଦ ଭଳି ବିଷୟର ବିଶେଷଜ୍ଞ କି? ଦୟାକରି ଦାୟିତ୍ୱ ଦେଖାନ୍ତୁ ଏବଂ ଦେଶ ପ୍ରତି ଆପଣଙ୍କର କର୍ତ୍ତବ୍ୟ ବୁଝନ୍ତୁ। ଆମେ ଏହି ଆବେଦନ ଉପରେ ବିଚାର କରିବୁ ନାହିଁ। ଏହି ମନ୍ତବ୍ୟ ପରେ, ଆବେଦନକାରୀ ଫତେହ କୁମାର ସାହୁଙ୍କୁ ଆବେଦନ ପ୍ରତ୍ୟାହାର କରିବାକୁ ଅନୁମତି ଦିଆଯାଇଥିଲା।

ଫତେହ କୁମାର ସାହୁ, ମହମ୍ମଦ ଜୁନୈଦ ଏବଂ ଭିକି କୁମାରଙ୍କ ଦ୍ୱାରା ଦାୟର ଆବେଦନରେ ଆକ୍ରମଣର ନିରପେକ୍ଷ ତଦନ୍ତ କରିବା ଏବଂ ପର୍ଯ୍ୟଟନ ସ୍ଥଳୀରେ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଏକ ଠୋସ୍ କାର୍ଯ୍ୟ ଯୋଜନା ପ୍ରସ୍ତୁତ କରିବା ପାଇଁ ଏକ ସ୍ୱତନ୍ତ୍ର ତଦନ୍ତ ଦଳ (SIT) ଗଠନ କରିବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେବାକୁ ଅନୁରୋଧ କରାଯାଇଥିଲା।

ଉଲ୍ଲେଖନୀୟ ଯେ ଏପ୍ରିଲ ୨୨ ତାରିଖରେ ପହଲଗାମ ନିକଟସ୍ଥ ବୈସାରଣ ଅଞ୍ଚଳରେ ଆତଙ୍କବାଦୀ ଆକ୍ରମଣରେ ଜଣେ ସ୍ଥାନୀୟ ଲୋକଙ୍କ ସମେତ ମୋଟ ୨୬ ଜଣ ପର୍ଯ୍ୟଟକ ପ୍ରାଣ ହରାଇଥିଲେ। ଏହି ଘଟଣା ସାରା ଦେଶରେ ଚିନ୍ତା ଏବଂ କ୍ରୋଧର କାରଣ ସାଜିଛି ।ବର୍ତ୍ତମାନ ଏହି ଘଟଣା ପରେ ସାରା ବିଶ୍ୱର ନଜର ରହିଛି ।