ପୁଣିଥରେ ଶିରୋମଣି ଅକାଳୀ ଦଳର ସଭାପତି ହେଲେ ସୁଖବୀର ସିଂ ବାଦଲ

ସୁଖବୀର ସିଂ ବାଦଲ ପୁଣିଥରେ ଶିରୋମଣି ଅକାଳୀ ଦଳର ସଭାପତି ଭାବରେ ନିର୍ବାଚିତ ହୋଇଛନ୍ତି। ଆଜି ଅର୍ଥାତ୍ (ଶନିବାର) ଅମୃତସରର ସ୍ୱର୍ଣ୍ଣ ମନ୍ଦିର ପରିସରରେ ଥିବା ତେଜା ସିଂହ ସମୁଦ୍ରୀ ହଲରେ ଦଳର ସାଂଗଠନିକ ନିର୍ବାଚନ ସମୟରେ ସର୍ବସମ୍ମତିକ୍ରମେ ଏହି ନିଷ୍ପତ୍ତି ନିଆଯାଇଛି। ଏହି ସମୟରେ କାର୍ଯ୍ୟକାରୀ ସଭାପତି ବଲବିନ୍ଦର ସିଂହ ଭୂଦଣ୍ଡ, ସୁଖବୀର ବାଦଲଙ୍କ ନାମ ପ୍ରସ୍ତାବ ଦେଇଥିଲେ।

ପଞ୍ଜାବ ଏବଂ ଅନ୍ୟାନ୍ୟ ରାଜ୍ୟର ୫୨୪ଜଣ ଅକାଳୀ ଦଳର ପ୍ରତିନିଧି ତାଙ୍କୁ ଏହି ପଦବୀ ପାଇଁ ନିର୍ଦ୍ୱନ୍ଦ୍ୱରେ ନିର୍ବାଚିତ କରିଥିଲେ। ପ୍ରକାଶ ସିଂହ ବାଦଲଙ୍କ ପରେ ସୁଖବୀର ବାଦଲ ପ୍ରଥମେ ୨୦୦୮ ମସିହାରେ ଶିରୋମଣି ଅକାଳୀ ଦଳର ସଭାପତି ନିର୍ବାଚିତ ହୋଇଥିଲେଫ ସେବେଠାରୁ ସେ ୨୦୨୪ ପର୍ଯ୍ୟନ୍ତ ଦଳର ମୁଖ୍ୟ ପଦରେ ରହିଥିଲେ। ଧାର୍ମିକ ଦଣ୍ଡ ପାଳନ କରିବା ପାଇଁ ସେ ଗତ ବର୍ଷ ତାଙ୍କ ପଦରୁ ଇସ୍ତଫା ଦେଇଥିଲେ।

ଦଳ ଭିତରର ବ୍ୟକ୍ତିମାନେ ପ୍ରକାଶ କରିଛନ୍ତି ଯେ, ସୁଖବୀର ଏହି ପଦବୀ ପାଇଁ ପ୍ରିୟ ଏବଂ ଏକମାତ୍ର ପ୍ରାର୍ଥୀ ଥିଲେ। ଅକାଳୀ ଦଳର ତିନି ମାସ ଧରି ଚାଲିଥିବା ସଦସ୍ୟତା ଅଭିଯାନର ସମାପ୍ତି ପରେ ଅମୃତସରରେ ସାଂଗଠନିକ ନିର୍ବାଚନ ଅନୁଷ୍ଠିତ ହୋଇଥିଲା। ଅକାଲ ତଖ୍‌ତ ଦ୍ୱାରା 'ତନଖାଇୟା' (ଧାର୍ମିକ କଦାଚାର ପାଇଁ ଦୋଷୀ) ଘୋଷଣା କରାଯିବା ପରେ ସୁଖବୀର ବାଦଲ ନଭେମ୍ବର ୧୬, ୨୦୨୪ରେ ଶିରୋମଣି ଅକାଳୀ ଦଳର ସଭାପତି ପଦରୁ ଇସ୍ତଫା ଦେଇଥିଲେ।