ପ୍ରଥମ ଗସ୍ତରେ ଆସି ମୋଦୀଙ୍କୁ ପ୍ରତିଶ୍ରୁତି ଦେଲେ ଶ୍ରୀଲଙ୍କା ରାଷ୍ଟ୍ରପତି, କହିଲେ....

ନୂଆଦିଲ୍ଲୀ: ଭାରତ ଗସ୍ତରେ ଆସିଛନ୍ତି ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାର ଡିସାନାୟକେ। ସୋମବାର ଦିଲ୍ଲୀର ହାଇଦ୍ରାବାଦ ହାଉସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଉଭୟ ପକ୍ଷ ଅର୍ଥନୈତିକ ଭାଗିଦାରୀର ଅଂଶ ଭାବରେ ପୁଞ୍ଜିନିବେଶ ଭିତ୍ତିକ ବିକାଶ ଏବଂ ଯୋଗାଯୋଗ ଉପରେ ଗୁରୁତ୍ୱ ଦେବାକୁ ନିଷ୍ପତ୍ତି ନେଇଛନ୍ତି।

ଭୌତିକ, ଡିଜିଟାଲ, ଶକ୍ତି ସଂଯୋଗ ଆମ ସହଯୋଗର ପ୍ରମୁଖ ସ୍ତମ୍ଭ ହେବ ବୋଲି ଆମେ ନିଷ୍ପତ୍ତି ନେଇଛୁ। ଦୁଇ ଦେଶ ପାୱାର ଗ୍ରୀଡ୍ ସଂଯୋଗ ସ୍ଥାପନ ପାଇଁ କାର୍ଯ୍ୟ କରିବେ ଏବଂ ଶ୍ରୀଲଙ୍କାର ପାୱାର ପ୍ଲାଣ୍ଟକୁ ଏକ ମଲ୍ଟି ପ୍ରଡକ୍ଟ ପେଟ୍ରୋଲିୟମ ପାଇପଲାଇନ ଏବଂ ତରଳ ପ୍ରାକୃତିକ ଗ୍ୟାସ (ଏଲଏନଜି) ଯୋଗାଇ ଦିଆଯିବ ବୋଲି ମୋଦୀ କହିଛନ୍ତି।

ଦୁଇ ଦେଶ ମଧ୍ୟରେ ଯୋଗାଯୋଗରେ ଉନ୍ନତି ଆଣିବା ପାଇଁ ରାମେଶ୍ୱରମ୍ ଏବଂ ତାଲାଇମନ୍ନାର ମଧ୍ୟରେ ଏକ ଫେରି ସେବା ଆରମ୍ଭ କରାଯିବ ବୋଲି ମୋଦୀ ଘୋଷଣା କରିଥିଲେ। ଆମେ ଦୁହେଁ ଏକମତ ଯେ ଆମର ସୁରକ୍ଷା ସ୍ୱାର୍ଥ ପରସ୍ପର ସହ ଜଡ଼ିତ। ଆମେ ଖୁବ୍ ଶୀଘ୍ର ପ୍ରତିରକ୍ଷା ସହଯୋଗ ଚୁକ୍ତିକୁ ଚୂଡ଼ାନ୍ତ ରୂପ ଦେବାକୁ ନିଷ୍ପତ୍ତି ନେଇଛୁ।

'ହାଇଡ୍ରୋଗ୍ରାଫି'ରେ ସହଯୋଗ ପାଇଁ ଏକ ଚୁକ୍ତିନାମା ମଧ୍ୟ ସ୍ୱାକ୍ଷରିତ ହୋଇଛି। ଆଲୋଚନା ସମୟରେ ମତ୍ସ୍ୟଜୀବୀଙ୍କ ବିବାଦୀୟ ପ୍ରସଙ୍ଗ ଉପରେ ମଧ୍ୟ ଆଲୋଚନା ହୋଇଥିଲା। ରାଷ୍ଟ୍ରପତି ହେବା ପରେ ଏହା ମୋର ପ୍ରଥମ ବିଦେଶ ଯାତ୍ରା ବୋଲି କହିଛନ୍ତି ଡିସାନାୟକେ। ମୁଁ ମୋର ପ୍ରଥମ ବିଦେଶ ଗସ୍ତରେ ଦିଲ୍ଲୀ ଆସିଥିବାରୁ ବହୁତ ଖୁସି।

ସେ କହିଛନ୍ତି ଯେ ମୁଁ ଭାରତର ପ୍ରଧାନମନ୍ତ୍ରୀଙ୍କୁ ସ୍ପଷ୍ଟ ଭାବେ କହିଛି ଯେ ଆମ ଜମିକୁ ଭାରତ ବିରୁଦ୍ଧରେ କୌଣସି କ୍ଷତିକାରକ ଉପାୟରେ ବ୍ୟବହାର କରିବାକୁ ଦେବୁ ନାହିଁ। ଭାରତ ସହିତ ସହଯୋଗ ନିଶ୍ଚିତ ଭାବେ ବୃଦ୍ଧି ପାଇବ ଏବଂ ମୁଁ ଭାରତ ପାଇଁ ଆମର ନିରନ୍ତର ସମର୍ଥନ ନିଶ୍ଚିତ କରିବାକୁ ଚାହୁଁଛି।