ବାରାଣାସୀ ଗଙ୍ଗା ଘାଟରେ ଜମିଛି ମାଟିର ବଳୟ, ପିତୃ ପୁରୁଷ ଶ୍ରାଦ୍ଧ ନେଇ ବଢିଲା ଚିନ୍ତା

ଉତ୍ତରପ୍ରଦେଶ ବାରାଣାସୀରେ ପ୍ରବଳ ବର୍ଷା ଯୋଗୁଁ ଗଙ୍ଗା ଘାଟରେ ବର୍ଷା ପାଣି ଜମିରହିଥିଲା । ବର୍ତ୍ତମାନ ଧିରେ ଧିରେ ପାଣି ଶୁଖିବା ପରେ ମାଟିର ଗଦାରେ ଘାଟ ଭରି ରହିିଛି । ଆଗକୁ ଘାଟରେ ପିତୃ ପୁରୁଷ ଶ୍ରାଦ୍ଧ ନେଇ ଶ୍ରଦ୍ଧାଳୁଙ୍କ ଭିଡ ରହିବ।

Published: Tuesday, September 6, 2022, 21:34 [IST]

ବାରାଣାସୀ : ବାରାଣାସୀରେ ପ୍ରବଳ ବର୍ଷା ପରେ ଗଙ୍ଗା ଘାଟରେ ପାଣି ଜମି ରହିଥିଲା । ବର୍ତ୍ତମାନ ଧିରେ ଧିରେ ପାଣି ଶୁଖିବା ଆରମ୍ଭ କରିବା ପରେ ଘାଟରେ ମାଟି ପରସ୍ତ ପରସ୍ତ ହୋଇ ଜମି ରହିଛି ।ଆଗକୁ ଆସୁଛି ପିତୃପୁରୁଷ ଶ୍ରାଦ୍ଧର ମାସ । ଗଙ୍ଗା କୂଳରେ ଜମିବ ପର୍ଯ୍ୟଟକଙ୍କ ବିଡ । ଏହି ମାଟି ବର୍ତ୍ତମାନ ପୁରୋହିତ ଓ ପର୍ଯ୍ୟଟକଙ୍କ ଲାଗି ସମସ୍ୟା ପାଲଟିଛି। ବାରଣାସୀର 84ଟି ଘାଟରେ ଏହି ମାଟି ଏବେ ମୁଖ୍ୟ ସମସ୍ୟା। ଘାଟ ଉପରେ ନିର୍ଭର କରି ପେଟ ପୋଷୁଥିବା ଲୋକ ବି ମାଟି ଯୋଗୁ ହନ୍ତସନ୍ତ ହେଉଛନ୍ତି। ପ୍ରତିଟି ଘାଟରେ ପ୍ରାୟ 5 ଫୁଟ ବହଳର ମାଟି ମାଡି ରହିଛି ।

ଫଳରେ କୂଳରେ ପାଦ ପକେଇବା କଷ୍ଟକର ହେଉଛି । ଏଥିରେ ପ୍ରସିଦ୍ଧ ଘାଟମାନଙ୍କରେ ପରିସ୍ଥିତି କଥା ନକହିବା ଆହୁରି ଭଲ । ଦଶ୍ୱାସମେଧ ଘାଟ, ଶୀତଲା ଘାଟ, ରାଜେନ୍ଦ୍ର ପ୍ରସାଦ ଘାଟ, କେଦାରଘାଟ, ଅଶି ଘାଟ, ରବିଦାସଘାଟ ଆଦିରେ ଲୋକେ କାଦୁଅ ପଚପଚ ହୋଇ ନିଜର ପରିବାର ପାଇଁ କାମରେ ଲାଗିଥିବା ଦେଖିବାକୁ ମିଳିଛି । ଫଳରେ ନିରାଶ ହେଉଛନ୍ତି ଦେଶ ବିଦେଶରୁ ଆସିଥିବା ପର୍ଯ୍ୟଟକ । ଖୁସିରେ ବାରାଣାସୀ ବୁଲି ଆସିଥିବା ଲୋକଙ୍କୁ ବ୍ୟଥିତ କରିଛି ଘାଟର ପରିବେଶ ।

ବର୍ଷା ପାଣି ଜମି ରହିଥିବା ଯୋଗୁଁ କିଛି ଦିନ ପାଇଁ ଘାଟକୁ ଯିବାକୁ ପର୍ଯ୍ୟଟକଙ୍କୁ ଅନୁମତି ମିଳୁନଥିଲା । ବର୍ତ୍ତମାନ ଅନୁମତି ତ ମିଳିଛି , କିନ୍ତୁ ଘାଟର ମଜା ନେଇ ପାରୁ ନାହାନ୍ତି ପର୍ଯ୍ୟଟକ । ସକାଳ ସଂଧ୍ୟାର ଆଳତୀରେ ବି ଦେଖାଦେଇଛି ସମସ୍ୟା ।

ମାଟି ଜମିବା ଯୋଗୁଁ ଲୋକେ ଘାଟ ପର୍ଯ୍ୟନ୍ତ ବୁଲିବା ପାଇଁ ଆସୁଥିଲେ ମଧ୍ୟ ଡଙ୍ଗା ଆଦିରେ ବସି ଗଙ୍ଗା ବୁଲିବା ସମ୍ଭବପର ହେଉନାହିଁ । କେହି ଘାଟ ତଳକୁ ଓହ୍ଲାଉ ନଥିବା ବେଳେ ଡଙ୍ଗା ଚାଳକଙ୍କ ପେଟକୁ ଲାତ ସଦୃଶ ସ୍ଥିତି ହୋଇଛି । ଆଗକୁ କିପରି ପିତୃପକ୍ଷରେ ଲୋକେ ଅସ୍ତି ବିସର୍ଜନ ଲାଗି ଡଙ୍ଗାରେ ସଙ୍ଗମକୁ ଯିବେ, ସେନେଇ ଚିନ୍ତା ବଢିବାରେ ଲାଗିଛି। କିଭଳି ଏହି ମାଟି ଶୁଖିବ , କେବେ ଘାଟର ଅବସ୍ଥା ସୁଧୁରିବ ତାହାକୁ ଅପେକ୍ଷା ରହିଛି ।

Published On September 6, 2022