ଯୌନ ନିର୍ଯାତନା: ସ୍ୱାମୀ ଅଭିମୁକ୍ତେଶ୍ୱରାନନ୍ଦଙ୍କ ନାଁରେ ମାମଲା ରୁଜୁ ନିର୍ଦ୍ଦେଶ

ବଢିଲା ଜ୍ୟୋତିଷ ପୀଠର ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ଅଡୁଆ। ଯୌନ ନିର୍ଯାତନା ଅଭିଯୋଗରେ ଛନ୍ଦି ହୋଇପଡିଥିବା ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀଙ୍କୁ ନେଇ ଆସିଲା ବଡ ରାୟ। ପ୍ରୟାଗରାଜର ସ୍ୱତନ୍ତ୍ର ଅତିରିକ୍ତ ଜିଲ୍ଲା ଜଜ୍ (ବଳାତ୍କାର ଏବଂ POCSO) କୋର୍ଟ ଦ୍ୱାରା ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦିଆଯାଇଛି। ଅତିରିକ୍ତ ଜିଲ୍ଲା ଜଜ୍ (POCSO) ବିନୋଦ କୁମାର ଚୌରାସିଆ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ ଏବଂ ତାଙ୍କ ଶିଷ୍ୟ ମୁକୁନ୍ଦାନନ୍ଦ ଗିରିଙ୍କ ବିରୋଧରେ ଏଫଆଇଆର (FIR) ପଞ୍ଜିକରଣ କରିବାକୁ ନିର୍ଦ୍ଦେଶ ଦେଇଛନ୍ତି। କୋର୍ଟ ପୋଲିସକୁ ମାମଲା ପଞ୍ଜିକରଣ କରି ତଦନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି।

କୋର୍ଟଙ୍କ ନିର୍ଦ୍ଦେଶ ପରେ, ଏବେ ଝୁନସି ପୋଲିସ ଷ୍ଟେସନରେ ଏକ ମାମଲା ପଞ୍ଜିକରଣ କରାଯିବ। ଶାକୁମ୍ଭାରୀ ପୀଠାଧୀଶ୍ୱର ଆଶୁତୋଷ ବ୍ରହ୍ମଚାରୀ ମହାରାଜ ଭାରତୀୟ ଦଣ୍ଡ ସଂହିତାର ଧାରା ୧୭୩ (୪) ଅନୁଯାୟୀ ଏକ ଆବେଦନ ଦାଖଲ କରିଥିଲେ, ଯେଉଁଥିରେ ଏଫଆଇଆର ପଞ୍ଜିକରଣ ଏବଂ କଠୋର କାର୍ଯ୍ୟାନୁଷ୍ଠାନ ଦାବି କରାଯାଇଥିଲା। ଅଭିଯୋଗ କରିଥିବା ଦୁଇ ନାବାଳିକାଙ୍କ ବୟାନ ଫେବୃଆରୀ ୧୩ ତାରିଖରେ କୋର୍ଟରେ ରେକର୍ଡ କରାଯାଇଥିଲା । ଏହାର ଭିଡିଓଗ୍ରାଫି ମଧ୍ୟ କରାଯାଇଥିଲା। କୋର୍ଟ ପୋଲିସ ରିପୋର୍ଟକୁ ମଧ୍ୟ ବିଚାର କରିଥିଲେ ଏବଂ ଶୁଣାଣି ପରେ ନିଷ୍ପତ୍ତି ସଂରକ୍ଷିତ ରଖିଥିଲେ। କୋର୍ଟଙ୍କ ନିର୍ଦ୍ଦେଶ ଆଧାରରେ ବର୍ତ୍ତମାନ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଆଶୁତୋଷ ବ୍ରହ୍ମଚାରୀ ଦାବି କରିଛନ୍ତି ଯେ, ସେ କଥିତ ଘଟଣା ସମ୍ପର୍କିତ ଏକ ସିଡି କୋର୍ଟରେ ଦାଖଲ କରିଛନ୍ତି। ସେ କହିଛନ୍ତି ଯେ, ତାଙ୍କୁ ନ୍ୟାୟ ମିଳିଛି ଏବଂ ସେ ଜନସାଧାରଣଙ୍କ ନିକଟରେ ସତ୍ୟ ଉପସ୍ଥାପନ କରିବା ପାଇଁ ପ୍ରୟାଗରାଜରୁ ବିଦ୍ୟା ମଠ, ବାରାଣସୀ ପର୍ଯ୍ୟନ୍ତ ପଦଯାତ୍ରାରେ ସନାତନ ଯାତ୍ରା କରିବେ। ଏହି ଘଟଣା ଧାର୍ମିକ ଏବଂ ସାମାଜିକ ମହଲରେ ତୀବ୍ର ଆଲୋଚନା ଆରମ୍ଭ କରିଛି। କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ପୋଲିସ ଏବେ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରିବ।

ଶ୍ରୀକୃଷ୍ଣ ଜନ୍ମଭୂମି ମୁକ୍ତି ନିର୍ମାଣ ଟ୍ରଷ୍ଟ ଏବଂ ଶାକୁମ୍ଭାରୀ ପୀଠାଧୀଶ୍ୱରଙ୍କ ସଭାପତି ଆଶୁତୋଷ ବ୍ରହ୍ମଚାରୀ ଅଭିଯୋଗ କରିଥିଲେ ଯେ ମାଘ ମେଳା ସମୟରେ ଜଣେ ନାବାଳିକା ଏବଂ ଜଣେ ସାବାଳିକା (ନାବାଳିକା ବେଳେ ଦୁଷ୍କର୍ମ) ତାଙ୍କ ପାଖକୁ ଆସି ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ବିରୁଦ୍ଧରେ ଯୌନ ଦୁଷ୍କର୍ମର ଗମ୍ଭୀର ଅଭିଯୋଗ ଆଣିଥିଲେ। ସେ ଅଭିଯୋଗ କରିଥିଲେ ଯେ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ଶିଷ୍ୟ ମାନେ ସେମାନଙ୍କ ଗୁରୁଙ୍କ ସେବା କରିବା ନାମରେ ଏହି ପିଲା ମାନଙ୍କୁ ଯୌନ ସମ୍ପର୍କ ପାଇଁ ଚାପ ଦେଇଥିଲେ ।