ହିନ୍ଦୁଙ୍କୁ ଏକାଠି ହେବାକୁ ଆହ୍ବାନ ଦେଲେ RSS ମୁଖ୍ୟ ମୋହନ ଭାଗବତ
ହିଂସାରେ ଜଳୁଛି ବାଂଲାଦେଶ। ହିନ୍ଦୁମାନଙ୍କ ଉପରେ ବଢୁଛି ଅତ୍ୟାଚାର। ପଡ଼ୋଶୀ ଦେଶରେ ହିନ୍ଦୁମାନଙ୍କୁ ଆକ୍ରମଣ କରାଯିବାକୁ ନେଇ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆର୍ଏସ୍ଏସ୍)ର ମୁଖ୍ୟ ମୋହନ ଭାଗବତ ଜୋରଦାର ନିନ୍ଦା କରିଛନ୍ତି । ଏହି ପରିପ୍ରେକ୍ଷୀରେ ବାଂଲାଦେଶରେ ରହୁଥିବା ହିନ୍ଦୁମାନଙ୍କୁ ଏକଜୁଟ ହେବାକୁ ସେ ଆହ୍ୱାନ ଦେଇଛନ୍ତି । ଭାଗବତ କହିଛନ୍ତି, ବାଂଲାଦେଶରେ ହିନ୍ଦୁମାନେ ସଂଖ୍ୟାଲଘୁ ଥିବାରୁ ସେମାନଙ୍କ ସ୍ଥିତି ଖରାପ ହୋଇଯାଇଛି । ଏଭଳି ସ୍ଥିତିର ମୁକାବିଲା ଲାଗି ସେମାନେ ଏକାଠି ହେବା ଜରୁରି । ଏମିତି କି ବିଶ୍ୱବ୍ୟାପୀ ହିନ୍ଦୁମାନେ ସେମାନଙ୍କୁ ସହାୟତା ଯୋଗାଇବା ଆବଶ୍ୟକ । ଆର୍ଏସ୍ଏସ୍ର ୧୦୦ ବର୍ଷ ପୂର୍ତ୍ତି ଅବସରରେ କୋଲକାତାରେ ରବିବାର ଆୟୋଜିତ କାର୍ଯ୍ୟକ୍ରମରେ ଉଦ୍ବୋଧନ ଦେଇ ଭାଗବତ ଏହି ଟିପ୍ପଣୀ ଦେଇଛନ୍ତି ।
ଆର୍ଏସ୍ଏସ୍ ମୁଖ୍ୟ କହିଛନ୍ତି ଯେ, ଭାରତକୁ ନିଜ ସୀମା ମଧ୍ୟରେ ରହି ଯେତିକି ହୋଇପାରିବ ସହାୟତା ଯୋଗାଇବା ଆବଶ୍ୟକ। ଯାହା ଆମେ କରିପାରିବା, ତାହା ନିଶ୍ଚିତ କରିବାକୁ ପଡ଼ିବ । କାରଣ ଭାରତ ହିଁ ହିନ୍ଦୁମାନଙ୍କ ପାଇଁ ଏକମାତ୍ର ଦେଶ । ଭାରତ ସରକାର ଏ ଦିଗରେ ଧ୍ୟାନ ଦେବା ଜରୁରି । କିଛି ବି ପଦକ୍ଷେପ ନେବାକୁ ହେବ । ଏହାଛଡ଼ା ହିନ୍ଦୁ ସମାଜ ଏକଜୁଟ ହେଲେ ବେଙ୍ଗଲରେ ସ୍ଥିତି ବଦଳିବାକୁ ସମୟ ଲାଗିବ ନାହିଁ । ତେବେ ରାଜନୈତିକ ପରିବର୍ତ୍ତନ ବାବଦରେ ଚିନ୍ତା କରିବା ମୋର କାମ ନୁହେଁ । ଆମେ କେବଳ ସାମାଜିକ ପରିବର୍ତ୍ତନ ପାଇଁ କାମ କରୁଛୁ । ହିନ୍ଦୁସ୍ତାନ ଏକ ହିନ୍ଦୁ ରାଷ୍ଟ୍ର । ଏହାକୁ ପ୍ରମାଣ କରିବା ଆବଶ୍ୟକ ନାହିଁ । ଯେମିତି କି ସୂର୍ଯ୍ୟ ପୂର୍ବ ଦିଗରେ ଉଦୟ ହୁଅନ୍ତି । ଏହା କେବେଠୁ ଚାଲିଛି ଆମକୁ ଜଣା ନାହିଁ । କିନ୍ତୁ ଏହା ସତ୍ୟ ।
ସୂଚନା ଥାଉକି, ବାଂଲାଦେଶରେ ୩ ଦିନ ପୂର୍ବେ ଢାକା ନିକଟବର୍ତ୍ତୀ ଭାଲୁକା ଅଞ୍ଚଳରେ ଧର୍ମକୁ ଅପମାନ ଅଭିଯୋଗରେ ଜଣେ ହିନ୍ଦୁ ଯୁବକଙ୍କୁ ପିଟି ହତ୍ୟା କରାଯାଇଥିଲା । ଏହାପରେ ଉଲଗ୍ନ କରି ଗଛରେ ଟାଙ୍ଗି ନିଆଁ ଲଗାଇ ପୋଡ଼ି ଦିଆଯାଇଥିଲା । ମୃତକଙ୍କ ନାମ ଦୀପୁ ଚନ୍ଦ୍ର ଦାସ । ପୁଲିସ ଅନୁସାରେ ଗୁରୁବାର ରାତିରେ ଭାଲୁକାରେ ଏହି ଅଘଟଣ ଘଟିଥିଲା । ବାଂଲାଦେଶରେ ଧର୍ମ ନାମରେ ଆଉ ଜଣେ ହିନ୍ଦୁ ଯୁବକଙ୍କ ଉପରେ ଆକ୍ରମଣ ହୋଇଛି । ଖୁଲନା ଡିଭିଜନର ଝେନାଇଦା ଜିଲ୍ଲାରେ ଉପଦ୍ରବକାରୀମାନେ ଜଣେ ହିନ୍ଦୁ ରିକ୍ସା ଚାଳକଙ୍କୁ ପ୍ରବଳ ମାଡ଼ ମାରି ଲହୁଲୁହାଣ କରି ପକାଇଛନ୍ତି । ପୀଡ଼ିତଙ୍କ ନାମ ଗୋବିନ୍ଦ ବିଶ୍ୱାସ । ତାଙ୍କ ହାତରେ ନାଲି ସୂତା ବନ୍ଧା ହୋଇଥିବା ଦେଖି ସେମାନେ ତାଙ୍କୁ ଆକ୍ରମଣ କରିଥିଲେ । ହିନ୍ଦୁ ଧର୍ମରେ ହାତରେ ନାଲି ଫିତା ବାନ୍ଧିବା ସାଧାରଣ ଘଟଣା ।
ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ଗୋବିନ୍ଦ ବିଶ୍ୱାସ ଭାରତର ଗୁଇନ୍ଦା ଏଜେନ୍ସି ର' ସହ ଜଡ଼ିତ ଥିବା ନେଇ ଗୁଜବ ହୋଇଥିଲା । ଏହା ଜାଣିନେବା ପରେ ଉପଦ୍ରବକାରୀ ସେଠାରେ ପହଞ୍ଚି ତାଙ୍କୁ ପଚରାଉଚରା କରିଥିଲେ । ଏହାପରେ ତାଙ୍କୁ ଆକ୍ରମଣ କରିଥିଲେ । ଜିଲ୍ଲା ମ୍ୟୁନିସିପାଲିଟି ସାମ୍ନାରେ ତାଙ୍କୁ ମାଡ଼ କରାଯିବା ପରେ ପୁଲିସକୁ ହସ୍ତାନ୍ତର କରାଯାଇଥିଲା । ତାଙ୍କ ଛାତି ଓ ବେକରେ ଆଘାତ ଲାଗିଛି । ଏ ନେଇ ସୋସିଆଲ ମିଡିଆରେ ଭିଡିଓ ସାମ୍ନାକୁ ଆସିଛି । ଭିଡିଓରେ ଗୋବିନ୍ଦ କହୁଛନ୍ତି ଯେ ସେ କେବଳ ଜଣେ ରିକ୍ସା ଚାଳକ । ତେଣୁ ତାଙ୍କୁ ଛାଡ଼ି ଦିଆଯିବା ଉଚିତ । ପରେ ତାଙ୍କୁ ଝେନାଇଦା ସଦର ଥାନାରେ ଅଟକ ରଖାଯାଇଥିଲା ।
Click it and Unblock the Notifications
Sign in with Google