ଡିଜିଟାଲ ଆରେଷ୍ଟର ଆତଙ୍କ, ୩ ମାସରେ ମହିଳା ଡାକ୍ତରଙ୍କଠାରୁ ୧୯ କୋଟି ଟଙ୍କା ଲୁଟ୍

ଗୁଜରାଟର ଗାନ୍ଧୀନଗରରେ ରହୁଥିବା ଜଣେ ମହିଳା ଡାକ୍ତରଙ୍କୁ ମାର୍ଚ୍ଚ ୧୫ ତାରିଖରେ ଏକ ଫୋନ ଆସିଲା । ଏହି କଲରେ ଦାବି କରାଗଲା ଯେ ତାଙ୍କ ଫୋନରେ ଆପତ୍ତିଜନକ ସାମଗ୍ରୀ ମିଳିଛି। କଲ୍ କରିଥିବା ବ୍ୟକ୍ତି ତାଙ୍କ ଫୋନ ସଂଯୋଗ ବିଚ୍ଛିନ୍ନ କରିବା ଏବଂ ତାଙ୍କ ବିରୁଦ୍ଧରେ ମନି ଲଣ୍ଡରିଂ ମାମଲା ରୁଜୁ କରିବାର ଧମକ ଦେଇଥିଲେ।ଏହା ଥିଲା ଠକେଇ ପାଇଁ ଏକ ଯୋଜନାବଦ୍ଧ କଲ୍ । ଗୁଜରାଟର ଗାନ୍ଧୀନଗରରେ ଦେଶର ସବୁଠୁ ବଡ଼ ଡିଜିଟାଲ୍‌ ଆରେଷ୍ଟ ମାମଲା ସାମ୍ନାକୁ ଆସିଛି । ଠକଙ୍କ ଶିକାର ହୋଇଛନ୍ତି ଜଣେ ଡାକ୍ତରାଣୀ । ତାଙ୍କ ନିକଟରୁ ସାଇବର ଠକମାନେ ୩ ମାସ ମଧ୍ୟରେ ପ୍ରାୟ ୨୦ କୋଟି ଠକି ନେଇଛନ୍ତି । ଠକମାନେ ତାଙ୍କୁ ଏପରି ଭୟଭୀତ କରିଥିଲେ ଯେ ସେମାନଙ୍କୁ ଟଙ୍କା ଦେବା ଲାଗି ଡାକ୍ତରାଣୀ ସୁନା ଋଣ ବି କରିଥିଲେ ।

ଏହି ମାମଲାରେ ପୁଲିସ ସୁରଟରୁ ଲାଲଜୀଭାଇ ବଲଦାନିୟା ନାମକ ଜଣେ ବ୍ୟକ୍ତିଙ୍କୁ ଗିରଫ କରିଛି । ବଲଦାନିୟାଙ୍କ ଖାତାକୁ ମଧ୍ୟ ଏକ କୋଟି ଟଙ୍କା ଟ୍ରାନ୍ସଫର କରାଯାଇଥିଲା । ସୂଚନା ଅନୁସାରେ ଗାନ୍ଧୀନଗରରେ ରହୁଥିବା ବରିଷ୍ଠ ଡାକ୍ତରାଣୀଙ୍କ ନିକଟକୁ ଚଳିତବର୍ଷ ମାର୍ଚ୍ଚ ମାସରେ ଦୂରସଞ୍ଚାର ବିଭାଗରୁ ଜ୍ୟୋତି ବିଶ୍ୱନାଥ ନାମକ ଜଣେ ବ୍ୟକ୍ତିଙ୍କର ଫୋନ୍‌ ଆସିଥିଲା । ଏହାପରେ ତାଙ୍କୁ ଜଣେ ପୁଲିସ ଇନ୍‌ସପେକ୍ଟର ଓ ଜଣେ ସରକାରୀ ଓକିଲଙ୍କ ସମେତ ଅନେକ ନାଁରୁ ଫୋନ୍‌ ଆସିଥିଲା । ଫୋନ୍‌ରେ ଡାକ୍ତରାଣୀଙ୍କୁ ଧମକ ଦିଆଯାଇଥିଲା । ତାଙ୍କ ମୋବାଇଲ୍‌ ନମ୍ବରରୁ ଅନେକ ଲୋକଙ୍କୁ ବାରମ୍ବାର ଅପମାନଜନକ ମେସେଜ୍‌ ପଠାଯାଉଥିବା ଦର୍ଶାଇ ତାଙ୍କ ବିରୋଧରେ ଏଫ୍‌ଆଇଆର କରାଯିବାର ଭୟ ଦେଖାଯାଇଥିଲା ।

ଏହି କଲଗୁଡ଼ିକ ଡାକ୍ତରଙ୍କ ମନରେ ଭୟ ସୃଷ୍ଟି କରିବା ଓ ତାଙ୍କୁ ବାଧ୍ୟ କରିବା ପାଇଁ କରାଯାଇଥିଲା । ମହିଳା ଜଣକ ଏତେ ଭୟଭୀତ ଥିଲେ ଯେ, ସେ ବିଭିନ୍ନ ଉପାୟରେ ଟଙ୍କା ଦେଇ ଚାଲିଥିଲେ। ମହିଳା ଟଙ୍କା ଦେବା ପାଇଁ ନିଜ ସୁନା ଗହଣା ମଧ୍ୟ ବିକ୍ରି କରିଥିଲେ। ସେ ସୁନା ଗହଣା ବନ୍ଧକ ରଖି ଋଣ ନେଇଥିଲେ, ଏଫଡି ଭାଙ୍ଗିଥିଲେ ଓ ସେୟାର ମଧ୍ୟ ବିକ୍ରି କରି ଦେଇଥିଲେ। ଏହିପରି ଭାବେ ବିଭିନ୍ନ ଆଳରେ ସାଇବର ଠକ ମାନେ ମହିଳାଙ୍କଠାରୁ ମୋଟ ୧୯.୨୪ କୋଟି ଟଙ୍କା ଲୁଟି ନେଇଥିଲେ।

ଶେଷରେ ଅଜାଣତରେ ଡାକ୍ତର ତାଙ୍କ ଜୀବନଯାକର ସଞ୍ଚୟ ଏବଂ ସମ୍ପତ୍ତିରୁ ୧୯.୨୪ କୋଟି ଟଙ୍କା ତିନି ମାସ ମଧ୍ୟରେ ଦେଇଦେଲେ । ସେ ୩୫ଟି ଭିନ୍ନ ବ୍ୟାଙ୍କ ଆକାଉଣ୍ଟକୁ ଟଙ୍କା ଟ୍ରାନ୍ସଫର୍ କରିଥିଲେ। ବାରମ୍ୱାର ଧମକ ପରେ ଡାକ୍ତରଜଣକ ଘରୁ ବାହାରିବା ସମୟରେ ଭିଡିଓ କଲ ଜରିଆରେ ତାଙ୍କ ଅବସ୍ଥାନ ବିଷୟରେ ଦୁର୍ବୃତ୍ତଙ୍କୁ ଜଣାଉଥିଲେ।

ଏହି ମାନସିକ ନିର୍ଯାତନା ତୀବ୍ର ଥିଲା। ସେ ଚିନ୍ତାଗ୍ରସ୍ତ ହୋଇପଡିଥିଲେ । ତେବେ କିଛି ଦିନ ପରେ ଅଚାନକ ଦିନେ ଡାକ୍ତରାଣୀଙ୍କୁ ଭିଡିଓ କଲ୍‌ କିମ୍ବା କୌଣସି ପ୍ରକାର କଲ୍‌ ଆସିବା ବନ୍ଦ ହୋଇଗଲା । ତାଙ୍କୁ ସନ୍ଦେହ ହେବାରୁ ସେ ବିଦେଶରେ ରହୁଥିବା ଦୁଇ ଝିଅଙ୍କ ସହ ଆଲୋଚନା କରିଥିଲେ । ଏହାପରେ ସେ ସାଇବର ଠକେଇର ଶିକାର ହୋଇଥିବା ଜାଣିବାରୁ ସାଇବର ବିଭାଗରେ ମାମଲା ରୁଜୁ କରାଇଥିଲେ । ପ୍ରାଥମିକ ତଦନ୍ତରୁ ଏହି ମାମଲାରେ କାମ୍ବୋଡିଆ ଓ ଭାରତର ଏକ ଗ୍ୟାଙ୍ଗ୍‌ ସାମିଲ ଥିବା ସିଆଇଡି ଜାଣିବାକୁ ପାଇଛି ।