ତିରୁପତି ମନ୍ଦିରର ୧୮ କର୍ମଚାରୀଙ୍କୁ ବିଦା କଲା ପ୍ରଶାସନ,ଜାଣନ୍ତୁ କାହିଁକି?

ତିରୁପତି: ଆନ୍ଧ୍ର ପ୍ରଦେଶର ତିରୁପତି ବାଲାଜୀ ମନ୍ଦିର ପରିଚାଳନା କମିଟି ୧୮ ଜଣ କର୍ମଚାରୀଙ୍କୁ ବହିଷ୍କାର କରିବାକୁ ପ୍ରସ୍ତୁତ ହେଉଛି। ସମସ୍ତେ ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି)ର ନିୟମ ବିରୁଦ୍ଧରେ କାମ କରିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଛନ୍ତି। ଅଧ୍ୟକ୍ଷ ବି.ଆର. ନାଇଡୁଙ୍କ ନେତୃତ୍ୱରେ ଟିଟିଡି ବୋର୍ଡ ପୂର୍ବରୁ କହିଥିଲେ ଯେ କେବଳ ହିନ୍ଦୁ କର୍ମଚାରୀମାନେ ଟିଟିଡିରେ କାମ କରିପାରିବେ। ତଥାପି, ଏହି ୧୮ ଜଣ କର୍ମଚାରୀ ଅଣ-ହିନ୍ଦୁ ପରମ୍ପରା ପାଳନ କରୁଥିବା ଜଣାପଡିଛି, ଯାହା ଫଳରେ ସେମାନଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଟିଟିଡି ବୋର୍ଡର ନିଷ୍ପତ୍ତି ଅନୁଯାୟୀ, ଏହି କର୍ମଚାରୀମାନଙ୍କୁ ଟିଟିଡି ମନ୍ଦିର ଏବଂ ସମ୍ପୃକ୍ତ ବିଭାଗଗୁଡ଼ିକରେ ସେମାନଙ୍କର ବର୍ତ୍ତମାନର ଭୂମିକାରୁ ବାହାର କରାଯିବ। ସେମାନଙ୍କୁ କୌଣସି ହିନ୍ଦୁ ଧାର୍ମିକ କାର୍ଯ୍ୟକ୍ରମ କିମ୍ବା କର୍ତ୍ତବ୍ୟରେ ଅଂଶଗ୍ରହଣ କରିବାରୁ ମଧ୍ୟ ନିଷେଧ କରାଯାଇଛି। ଏହି ଅଣହିନ୍ଦୁ କର୍ମଚାରୀମାନଙ୍କୁ ଦୁଇଟି ବିକଳ୍ପ ଦିଆଯାଇଛି। ଅନ୍ୟ ସରକାରୀ ବିଭାଗକୁ ବଦଳି କିମ୍ବା ସ୍ୱେଚ୍ଛାକୃତ ଅବସର(VRS) ପାଇଁ ଆବେଦନ। ଯଦି ସେମାନେ ଏପରି ନ କରନ୍ତି ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।