୨୯ ନିର୍ବାଚନ ଉପରେ ଗଡ଼କରୀଙ୍କ ମନ୍ତବ୍ୟ, କହିଲେ ‘ପିକଚର ଏବେ.....

ଯାହା ଏ ପର୍ଯ୍ୟନ୍ତ ଦେଖିଛନ୍ତି ତାହା ସବୁ ରିଲ୍ ଥିଲା, ପ୍ରକୃତ ସିନେମା ତ ଏବେ ବାକି ରହିଛି। ଏହା ଶନିବାର କହିଛନ୍ତି କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ। ୨୦୨୯ ଲୋକସଭା ନିର୍ବାଚନରେ ତାଙ୍କ ଭୂମିକା ବିଷୟରେ ପଚରାଯିବାରୁ ସେ କହିଛନ୍ତି ଗତ ୧୧ ବର୍ଷ ମଧ୍ୟରେ ଯାହା ଦେଖାଯାଇଛି ତାହା କେବଳ ଏକ ଖବର ରିଲ୍ ଥିଲା ଏବଂ ପ୍ରକୃତ ସିନେମା ଆସିବାକୁ ବାକି ଅଛି।

ପୂର୍ବତନ ଭାରତୀୟ ଜନତା ପାର୍ଟି (ବିଜେପି) ସଭାପତି ନୀତିନ ଗଡକରୀ କହିଛନ୍ତି ଯେ ଦଳ ନିଜ କର୍ମୀଙ୍କ ପାଇଁ ଦାୟିତ୍ୱ ନିର୍ଣ୍ଣୟ କରେ ଏବଂ ବିଜେପି ତାଙ୍କ ପାଇଁ ଯେ କୌଣସି ଦାୟିତ୍ୱ ଦେବ ସେ ତାହାକୁ ପୂରଣ କରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାରଙ୍କ ୧୧ ବର୍ଷ ପୂର୍ତ୍ତି ଉପରେ ଏକ ସାକ୍ଷାତକାରରେ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡକରୀ କହିଛନ୍ତି, "ଏବେ ପର୍ଯ୍ୟନ୍ତ ଯାହା ଘଟିଛି ତାହା କେବଳ ଏକ ଖବର ରିଲ୍ ଥିଲା, ପ୍ରକୃତ ସିନେମା ଆରମ୍ଭ ହେବା ବାକି ଅଛି।"

ସେ କହିଛନ୍ତି, "ଜଣେ କର୍ମୀଙ୍କ ଦାୟିତ୍ୱ କ'ଣ ହେବ ଏବଂ ସେ କେଉଁ କାମ କରିବେ, ତାହା ଦଳ ଦ୍ୱାରା ସ୍ଥିର କରାଯାଏ। ମୋତେ ଯେକୌଣସି ଦାୟିତ୍ୱ ଦିଆଗଲେ, ମୁଁ ତାହା ପୂରଣ କରିବି।" ସେ ଜୋର ଦେଇ କହିଛନ୍ତି ଯେ ସେ କେବେ ତାଙ୍କର ରାଜନୈତିକ ଜୀବନୀ ପ୍ରକାଶ କରିନାହାଁନ୍ତି କିମ୍ବା ବିମାନବନ୍ଦରରେ ତାଙ୍କ ପାଇଁ ଭବ୍ୟ ସ୍ୱାଗତ କାର୍ଯ୍ୟକ୍ରମ ଆୟୋଜନ କରିବାକୁ ସମର୍ଥକମାନଙ୍କୁ କହିନାହାନ୍ତି।ପୂର୍ବତନ ବିଜେପି ଅଧ୍ୟକ୍ଷ କହିଛନ୍ତି ଯେ ତାଙ୍କର ବ୍ୟକ୍ତିଗତ ଇଚ୍ଛା ହେଉଛି ବିଦର୍ଭରେ ଚାଷୀ ଆତ୍ମହତ୍ୟା ରୋକିବା ପାଇଁ କାମ କରିବା। ଆଜିକାଲି ମୁଁ ରାସ୍ତା ନିର୍ମାଣ ଅପେକ୍ଷା କୃଷି ଏବଂ ଅନ୍ୟାନ୍ୟ ସାମାଜିକ ପଦକ୍ଷେପ ଉପରେ ଅଧିକ କାମ କରୁଛି।

ଭାରତର ମୁଣ୍ଡପିଛା ଆୟ ବିଶ୍ୱର ଶ୍ରେଷ୍ଠ ୧୦ଟି ଦେଶ ମଧ୍ୟରେ କାହିଁକି ନାହିଁ ? ଏହି ପ୍ରଶ୍ନର ଉତ୍ତରରେ କେନ୍ଦ୍ରମନ୍ତ୍ରୀ କହିଥିଲେ ଯେ ଦେଶର ଜନସଂଖ୍ୟା ଏଥିପାଇଁ ଦାୟୀ। ଜନସଂଖ୍ୟା ନିୟନ୍ତ୍ରଣ ବିଲ୍‌କୁ ସମର୍ଥନ କରି ସେ କହିଥିଲେ, "ଏହା କୌଣସି ଧାର୍ମିକ କିମ୍ବା ଭାଷାଗତ ପ୍ରସଙ୍ଗ ନୁହେଁ। ଏହା ଏକ ଆର୍ଥିକ ପ୍ରସଙ୍ଗ। ଏତେ ବିକାଶ ସତ୍ତ୍ୱେ, ଫଳାଫଳ ଦୃଶ୍ୟମାନ ହେଉନାହିଁ। ଏହାର କାରଣ ହେଉଛି ବର୍ଦ୍ଧିତ ଜନସଂଖ୍ୟା।" ତଥାପି, ଏହି ସମୟ ମଧ୍ୟରେ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡ଼କରୀ ମଧ୍ୟ ୨୦୧୪ ପରଠାରୁ କ୍ଷମତାରେ ଥିବା ମୋଦି ସରକାରଙ୍କ ବିଭିନ୍ନ ସଫଳତା ଉପରେ ଆଲୋକପାତ କରିଥିଲେ।