ରାଜସ୍ଥାନରେ ୧୫୦ ଫୁଟ୍ ବୋରୱେଲ୍‌କୁ ଖସି ପଡ଼ିଲା କୁନି ଝିଅ; ଉଦ୍ଧାର କାର୍ଯ୍ୟରେ NDRF ଓ SDRF ନିୟୋଜିତ

ରାଜସ୍ଥାନରେ ୧୫୦ ଫୁଟ୍ ବୋରୱେଲ୍‌କୁ ଖସି ପଡ଼ିଲା କୁନି ଝିଅ । କୋଟପୁତଳୀ କିତରପୁରାରେ ୩ ବର୍ଷର ଝିଅ ବୋରୱେଲ୍‌ରେ ଫସିଛି। ପାଇପ୍ ମାଧ୍ୟମରେ ନାବାଳିକାକୁ ଦିଆଯାଉଛି ଅକ୍ସିଜେନ୍ । ଉଦ୍ଧାର କାର୍ଯ୍ୟରେ NDRF ଓ SDRF ନିୟୋଜିତ।

ସୋମବାର ଅପରାହ୍ନ ସମୟରେ ଶିଶୁ କନ୍ୟା ଘର ବାହାରେ ଖେଳୁଥିଲା । ଏହି ସମୟରେ ପାଖରେ ଥିବା ଏକ ୧୫୦ ଫୁଟ ଗଭୀର ବୋରୱେଲରେ ସେ ଖସି ପଡ଼ିଥିଲା । ପିଲାଟିର ଚିତ୍କାର ଶୁଣି ତା' ପରିବାର ଲୋକେ ସେଠାରେ ପହଞ୍ଚିଥିଲେ। ଆଉ ସେମାନେ ପୁଲିସ୍‌ ଓ ପ୍ରଶାସନକୁ ଖବର ଦେଇଥିଲେ । ପ୍ରାୟ ୮ ଘଣ୍ଟା ହେଲାଣି ଏନଡିଆରଏଫ, ଏସଡିଆରଏଫ, ଜିଲ୍ଲା ପ୍ରଶାସନ ଓ ପୁଲିସ୍‌ ଟିମ୍‌ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । ମାତ୍ର ଚେତନାକୁ ଉଦ୍ଧାର କରାଯାଇ ପାରି ନାହିଁ ।

ଚେତନାର ଗତିବିଧି ନିରିକ୍ଷଣ କରିବାକୁ ବୋରୱେଲ ଭିତରକୁ କ୍ୟାମେରା ପଠାଯିବା ସହ ପ୍ଲାଷ୍ଟିକ୍‌ ପାଇପ୍‌ ଯୋଗେ ଅକ୍ସିଜେନ ଯୋଗାଇ ଦିଆଯାଉଛି। ଏଥିସହ ପିଲାଟି ପାଇଁ ଖାଦ୍ୟ ସାମଗ୍ରୀ ଓ ପାଣି ବି ପଠାଯାଉଛି।

ଉକ୍ତ ବୋରୱେଲ ନିକଟରେ ଆଉ ଏକ ଗାତ ଖୋଳାଯାଇ ପିଲାଟିକୁ ବାହାର କରିବାକୁ ପ୍ରୟାସ ଜାରି ରହିଛି। ବରିଷ୍ଠ ଅଧିକାରୀମାନେ ସମଗ୍ର ଘଟଣା ଉପରେ ନଜର ରଖିଛନ୍ତି । ଚେତନାଙ୍କ ପିତା ଉକ୍ତ ବୋରୱେଲରେ ଥିବା ପ୍ଲାଷ୍ଟିକ୍‌ ପାଇପ୍‌କୁ ଦୁଇ ଦିନ ତଳେ ବାହାର କରିଥିଲେ। ଏହାପରେ ଏହି ଅଘଟଣ ଘଟିଛି।