Railway Budget 2024: ରେଲଓ୍ବେକୁ ୨.୬୨ ଲକ୍ଷ କୋଟି, ଅଶ୍ୱିନୀ ବୈଷ୍ଣବ କହିଲେ ରେଳ ମନ୍ତ୍ରଣାଳୟକୁ ଐତିହାସିକ ଅର୍ଥ ଆବଣ୍ଟନ

ବିଭିନ୍ନ ସ୍ଥାନରେ ରେଳ ଦୁର୍ଘଟଣା ପରେ ରେଳ ଭିତ୍ତିଭୂମି ତଥା ନୂତନ ଟ୍ରେନକୁ ମଜଭୁତ କରିବା ପାଇଁ ବଜେଟରେ କିଛି ବଡ଼ ଘୋଷଣା ହୋଇଛି । କେନ୍ଦ୍ର ବଜେଟ ୨୦୨୪-୨୫ ଉପରେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, କେନ୍ଦ୍ର ବଜେଟରେ ରେଳ ମନ୍ତ୍ରଣାଳୟକୁ ଏକ ଐତିହାସିକ ଅର୍ଥ ଆବଣ୍ଟନ କରାଯାଇଛି ।

ରେଳପଥ ବଜେଟରେ ୨.୬୨ ଲକ୍ଷ କୋଟି ଟଙ୍କା ପାଇଛି। ଏହା ଆବଣ୍ଟନର ସବୁଠାରୁ ବଡ଼ ଅଂଶ । ଏଥିରୁ ୧.୮ ଲକ୍ଷ ହଜାର କୋଟି ଟଙ୍କା ସୁରକ୍ଷା ପାଇଁ ଖର୍ଚ୍ଚ ହେବ । ପୁରୁଣା ଟ୍ରାକ ସ୍ଥାନରେ ନୂତନ ଟ୍ରାକ ସଂସ୍ଥାପନ, ନୂତନ ଟେକ୍ନୋଲୋଜି ସହିତ ସିଗ୍‌ନାଲ ସିଷ୍ଟମ ବିକାଶ ଏବଂ ଫ୍ଲାଏ ଓଭର-ଅଣ୍ଡରପାସ ନିର୍ମାଣ ଏବଂ ଟ୍ରେନରେ କବଚ ସ୍ଥାପନ ପାଇଁ ଏହି ଅର୍ଥ ଖର୍ଚ୍ଚ ହେବ ।

ରେଳମନ୍ତ୍ରୀ ବୈଷ୍ଣବ କହିଛନ୍ତି ଯେ ଗତ ଦଶ ବର୍ଷ ମଧ୍ୟରେ ମୋଦି ସରକାର ଯେଉଁ ସବୁ କାର୍ଯ୍ୟ କରିଛନ୍ତି, ଆମେ ତୃତୀୟ ପର୍ଯ୍ୟାୟରେ ଦୁଇଗୁଣ ବେଗରେ ସେହି ପ୍ରକଳ୍ପଗୁଡ଼ିକୁ ଆଗକୁ ବଢ଼ାଇବୁ । ଆଗାମୀ ଦିନରେ ଆମେ ରେଳ ଭିତ୍ତିଭୂମିକୁ ମଜଭୁତ କରିବୁ, ରେଳ ଇଞ୍ଜିନ ଏବଂ କୋଚ ଉତ୍ପାଦନ ବୃଦ୍ଧି କରିବୁ । ସାଧାରଣତଃ ନିମ୍ନଶ୍ରେଣୀ ଏବଂ ମଧ୍ୟବିତ୍ତ ଲୋକମାନେ ଯାତ୍ରା ପାଇଁ ରେଳ ବ୍ୟବହାର କରନ୍ତି । ପୂର୍ବ ତୁଳନାରେ ସାଧାରଣ କୋଚରେ ଯାତ୍ରୀଙ୍କ ସଂଖ୍ୟା ବୃଦ୍ଧି ପାଉଛି । ଗତ ଆର୍ଥିକ ବର୍ଷରେ ୭୦୦ କୋଟି ଲୋକ ରେଳପଥରେ ଯାତ୍ରା କରିଛନ୍ତି । ତେଣୁ ନିକଟରେ ରେଳପଥ ୨୫୦୦ ଜେନେରାଲ କୋଚ ସ୍ଥାପନ କରିବାକୁ ନିଷ୍ପତ୍ତି ନିଆଯାଇଥିବା ବୈଷ୍ଣବ ସୂଚନା ଦେଇଛନ୍ତି ।

ବଜେଟ ୨୦୨୪ରେ ସେମାନଙ୍କ ଅନୁମୋଦନ ଗ୍ରହଣ କରାଯାଇଛି। କିଛି ଦିନ ପୂର୍ବରୁ କବଚ ସିଷ୍ଟମ୍‌ ୪.୦ ଲାଗୁ ହୋଇଛି। ଏହାକୁ ଟ୍ରେନରେ ସ୍ଥାପନ କରିବାର ପ୍ରକ୍ରିୟା ଶୀଘ୍ର ଆରମ୍ଭ ହେବ ବୋଲି ସେ କହିଛନ୍ତି।

ସୂଚନା ଥାଉକି, ଅର୍ଥମନ୍ତ୍ରୀ ଚଳିତ ବର୍ଷ ଫେବୃଆରୀ ୧ ରେ ମଧ୍ୟବର୍ତ୍ତୀକାଳୀନ ବଜେଟ ଉପସ୍ଥାପନ କରିଥିଲେ। ରେଳପଥକୁ ୨.୫୨ ଲକ୍ଷ କୋଟି ଟଙ୍କା ଦେବାକୁ ଆଲୋଚନା ହୋଇଥିଲା।