କୁହାଳିଆ ଦଳୀୟ ନେତାଙ୍କୁ ପ୍ରଧାନମନ୍ତ୍ରୀଙ୍କ ଚେତାବନୀ, ଅନାବଶ୍ୟକ ବୟାନବାଜିରୁ ଦୂରେଇ ରହିବାକୁ ପରାମର୍ଶ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 'ଅପରେଶନ ସିନ୍ଦୂର' ଉପରେ ଅନାବଶ୍ୟକ ବୟାନ ଦେଇ ଭାଜପାର ଭାବମୂର୍ତ୍ତି ନଷ୍ଟ କରୁଥିବା ନେତାମାନଙ୍କୁ ଏକ ବିଶେଷ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ, ନେତାମାନେ ସେମାନଙ୍କର ଭାଷଣକୁ ନିୟନ୍ତ୍ରଣ କରିବା ଉଚିତ ଏବଂ ଅନାବଶ୍ୟକ ବୟାନଠାରୁ ଦୂରେଇ ରହିବା ଉଚିତ। କୌଣସି ସ୍ଥାନରେ କିଛି କହିବାରୁ ଦୂରେଇ ରୁହନ୍ତୁ। ଏନ୍ଡିଏ ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀମାନଙ୍କ ବୈଠକ ସମୟରେ ଭାଜପା ନେତାମାନଙ୍କୁ ନିର୍ଦ୍ଦେଶ ଜାରି କରି ପ୍ରଧାନମନ୍ତ୍ରୀ ଏହା କହିଛନ୍ତି।
ଜାତୀୟ ଗଣତାନ୍ତ୍ରିକ ମେଣ୍ଟ (NDA)ର ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀମାନଙ୍କ ବୈଠକରେ ସଶସ୍ତ୍ର ବାହିନୀର ବୀରତ୍ୱ ଏବଂ ପ୍ରଧାନମନ୍ତ୍ରୀଙ୍କ ସାହସିକ ନେତୃତ୍ୱକୁ ପ୍ରଶଂସା କରି ଏକ ପ୍ରସ୍ତାବ ଗୃହୀତ ହୋଇଥିଲା। ସୂତ୍ର ଅନୁସାରେ ଶିବସେନା ନେତା ଏବଂ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଦ୍ୱାରା ଉପସ୍ଥାପିତ ପ୍ରସ୍ତାବରେ କୁହାଯାଇଛି ଯେ 'ଅପରେଶନ ସିନ୍ଦୂର' ଭାରତୀୟଙ୍କ ଆତ୍ମବିଶ୍ୱାସ ବୃଦ୍ଧି କରିଛି। ପ୍ରସ୍ତାବରେ ମୋଦିଙ୍କ ନେତୃତ୍ୱକୁ ପ୍ରଶଂସା କରାଯାଇ କୁହାଯାଇଛି ଯେ, ସେ ସର୍ବଦା ସଶସ୍ତ୍ର ବାହିନୀକୁ ସମର୍ଥନ କରିଛନ୍ତି ଏବଂ 'ଅପରେଶନ ସିନ୍ଦୂର' ଆତଙ୍କବାଦୀ ଏବଂ ସେମାନଙ୍କ ପ୍ରାୟୋଜକଙ୍କୁ ଉପଯୁକ୍ତ ଜବାବ ଦେଇଛି। ବୈଠକରେ ୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ଲୋକଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଦିଆଯାଇଥିଲା।
ସମ୍ପ୍ରତି, ମଧ୍ୟପ୍ରଦେଶ ଏବଂ ହରିୟାଣାର ଭାଜପା ନେତାମାନେ ସେମାନଙ୍କ ବୟାନ ଦେଇ ଦଳକୁ ବଦନାମ କରିଛନ୍ତି। ହରିୟାଣାର ଭାଜାପା ଏମ୍ପି ରାମଚନ୍ଦ୍ର ଜାଙ୍ଗ୍ଡା, ବିଜୟ ଶାହା ଏବଂ ମଧ୍ୟପ୍ରଦେଶର ଜଗଦୀଶ ଦେବଡ଼ା ଏହି ପ୍ରସଙ୍ଗରେ ନିନ୍ଦନୀୟ ମନ୍ତବ୍ୟ ଦେଇଛନ୍ତି। ଏହି ମାମଲାରେ ପ୍ରଧାନମନ୍ତ୍ରୀଙ୍କଠାରୁ କ୍ଷମା ମାଗିବାକୁ କଂଗ୍ରେସ ଦାବି କରିଛି। ବିରୋଧୀ ଦଳ କହିଛି ଯେ, ପ୍ରଧାନମନ୍ତ୍ରୀ ଏବଂ ଭାଜପା ନେତୃତ୍ୱଙ୍କ ନୀରବତାକୁ ଏହି ବକ୍ତବ୍ୟଗୁଡ଼ିକର ନୀରବ ଅନୁମୋଦନ ଭାବରେ ଦେଖାଯିବା ଉଚିତ୍। କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡ୍ଗେ ଦାବି କରିଛନ୍ତି ଯେ, ପହଲଗାମ ପୀଡ଼ିତ ଏବଂ ସଶସ୍ତ୍ର ବାହିନୀଙ୍କୁ ବଦନାମ କରିବା ପାଇଁ ଭାଜପା ନେତାମାନେ ପରସ୍ପର ସହିତ ପ୍ରତିଯୋଗିତା କରୁଛନ୍ତି।
Click it and Unblock the Notifications
Sign in with Google