78ତମ ବିଶ୍ୱ ସ୍ୱାସ୍ଥ୍ୟ ଅଧିବେଶନକୁ ପ୍ରଧାନମନ୍ତ୍ରୀଙ୍କ ସମ୍ବୋଧନ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଜେନେଭାରେ 'ୱାନ୍ ୱାର୍ଲଡ ଫର୍ ହେଲ୍ଥ' ବିଷୟବସ୍ତୁ ଉପରେ ବିଶ୍ୱ ସ୍ୱାସ୍ଥ୍ୟ ପରିଷଦର 78ତମ ଅଧିବେଶନକୁ ସମ୍ବୋଧିତ କରିଛନ୍ତି। ଏହା ବିଶ୍ୱ ସ୍ୱାସ୍ଥ୍ୟ ପ୍ରତି ଭାରତର ଆଭିମୁଖ୍ୟ ସହିତ ସମାନ। ଏହି ସମୟରେ ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ଯେତେବେଳେ ସେ 2023 ମସିହାରେ ଏହି ସମାବେଶକୁ ସମ୍ବୋଧିତ କରିଥିଲେ, ସେତେବେଳେ ସେ 'ୱାନ୍ ଆର୍ଥ, ୱାନ୍ ହେଲ୍ଥ' ବିଷୟରେ କହିଥିଲେ।

ପ୍ରଧାନମନ୍ତ୍ରୀ କହିଛନ୍ତି, "ଏକ ସୁସ୍ଥ ବିଶ୍ୱର ଭବିଷ୍ୟତ ଅନ୍ତର୍ଭୁକ୍ତିକରଣ, ଏକ ସମନ୍ୱିତ ଆଭିମୁଖ୍ୟ ଏବଂ ସହଯୋଗ ଉପରେ ନିର୍ଭର କରେ। ଅନ୍ତର୍ଭୁକ୍ତିକରଣ ଭାରତର ସ୍ୱାସ୍ଥ୍ୟ ସଂସ୍କାରର ମୂଳରେ ଅଛି। ଆମେ ବିଶ୍ୱର ସର୍ବବୃହତ ସ୍ୱାସ୍ଥ୍ୟ ବୀମା ଯୋଜନା- ଆୟୁଷ୍ମାନ ଭାରତ ଚଳାଉଛୁ। ଏହା 50 କୋଟି 80 ଲକ୍ଷ ଲୋକଙ୍କୁ କଭର କରେ ଏବଂ ମାଗଣା ଚିକିତ୍ସା ପ୍ରଦାନ କରେ। ଏହି କାର୍ଯ୍ୟକ୍ରମକୁ ସମ୍ପ୍ରତି 70 ବର୍ଷରୁ ଅଧିକ ବୟସର ସମସ୍ତ ଭାରତୀୟଙ୍କୁ ଅନ୍ତର୍ଭୁକ୍ତ କରିବା ପାଇଁ ବିସ୍ତାର କରାଯାଇଛି।"

ପ୍ରଧାନମନ୍ତ୍ରୀ କହିଥିଲେ ଯେ, ଆମର ହଜାର ହଜାର ସ୍ୱାସ୍ଥ୍ୟ ଏବଂ କଲ୍ୟାଣ କେନ୍ଦ୍ରର ନେଟୱାର୍କ ଅଛି। ସେମାନେ କର୍କଟ, ରକ୍ତଚାପ ଏବଂ ମଧୁମେହ ଭଳି ରୋଗ ପରୀକ୍ଷା ଏବଂ ଚିହ୍ନଟ କରନ୍ତି। ହଜାର ହଜାର ସରକାରୀ ଔଷଧ ବିକ୍ରେତା ବଜାର ମୂଲ୍ୟଠାରୁ ବହୁତ କମ୍ ମୂଲ୍ୟରେ ଉଚ୍ଚମାନର ଔଷଧ ଯୋଗାଇଥାନ୍ତି।"

ବିଶ୍ୱ ସ୍ୱାସ୍ଥ୍ୟ ପରିଷଦର 78ତମ ଅଧିବେଶନରେ ଭାଷଣ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, "ସ୍ୱାସ୍ଥ୍ୟ ଫଳାଫଳରେ ଉନ୍ନତି ଆଣିବା ପାଇଁ ପ୍ରଯୁକ୍ତିବିଦ୍ୟା ଏକ ଗୁରୁତ୍ୱପୂର୍ଣ୍ଣ ଭୁମିକା ନିର୍ବାହ କରିଥାଏ। ଗର୍ଭବତୀ ମହିଳା ଏବଂ ପିଲାମାନଙ୍କ ଟୀକାକରଣ ଟ୍ରାକ୍ କରିବା ପାଇଁ ଆମର ଏକ ଡିଜିଟାଲ ପ୍ଲାଟଫର୍ମ ଅଛି। ଲକ୍ଷ ଲକ୍ଷ ଲୋକଙ୍କର ଏକ ଅନନ୍ୟ ଡିଜିଟାଲ ସ୍ୱାସ୍ଥ୍ୟ ପରିଚୟ ଅଛି। ଏହା ଆମକୁ ଲାଭ, ବୀମା, ରେକର୍ଡ ଏବଂ ସୂଚନାକୁ ଏକୀକୃତ କରିବାରେ ସାହାଯ୍ୟ କରୁଛି। ଆମର ମାଗଣା ଟେଲିମେଡିସିନ୍ ସେବା 30 କୋଟି 40 ଲକ୍ଷରୁ ଅଧିକ ପରାମର୍ଶକୁ ସକ୍ଷମ କରିଛି।"

ପ୍ରଧାନମନ୍ତ୍ରୀ ମୋଦି ଆହୁରି କହିଛନ୍ତି, "ଆମେ ସବୁଠାରୁ ଦୁର୍ବଳ ଲୋକଙ୍କର କେତେ ଭଲ ଭାବେ ଯତ୍ନ ନେଉଛୁ ତାହା ଉପରେ ବିଶ୍ୱର ସ୍ୱାସ୍ଥ୍ୟ ନିର୍ଭର କରେ। ବିଶ୍ୱ ଦକ୍ଷିଣ ବିଶେଷ ଭାବେ ସ୍ୱାସ୍ଥ୍ୟ ଚ୍ୟାଲେଞ୍ଜ ଦ୍ୱାରା ପ୍ରଭାବିତ। ଭାରତର ଆଭିମୁଖ୍ୟ ଏକ ଅନୁକରଣୀୟ, ସ୍କେଲେବଲ୍ ଏବଂ ସ୍ଥାୟୀ ମଡେଲ୍ ପ୍ରଦାନ କରେ। ଆମେ ଆମର ଶିକ୍ଷା ଏବଂ ସର୍ବୋତ୍ତମ ଅଭ୍ୟାସଗୁଡ଼ିକୁ ବିଶ୍ୱ ସହିତ, ବିଶେଷକରି ବିଶ୍ୱ ଦକ୍ଷିଣ ସହିତ ବାଣ୍ଟିବାକୁ ଖୁସି ହେବୁ।"