PF Money: ପିଏଫ୍ ଟଙ୍କା ସଞ୍ଚୟ କରିବା କାହିଁକି ଜରୁରୀ?

ଯଦି ଆପଣ ଚାକିରି କରୁଛନ୍ତି, ତେବେ ଆପଣଙ୍କ ଦରମାର କିଛି ଅଂଶ ପ୍ରତି ମାସରେ ଏମ୍‌ପ୍ଲୟୀ ପ୍ରୋଭିଡେଣ୍ଟ ଫଣ୍ଡ (ଇପିଏଫ୍‌)ରେ ଜମା ହୋଇଥାଏ। ଏହି ଟଙ୍କା ଆପଣଙ୍କ ଅବସର ସମୟରେ ଆର୍ଥିକ ସହାୟତା ଯୋଗାଇଥାଏ। କିନ୍ତୁ ଅନେକ ଲୋକଙ୍କର ଅଭ୍ୟାସ ରହିଛି ଯେ ସେମାନେ ସମୟ ସମୟରେ ନିଜ ପିଏଫ୍ ଖାତାରୁ ଟଙ୍କା ଉଠାଇଥା'ନ୍ତି।

ପିଏଫ୍ ଟଙ୍କା ସଞ୍ଚୟ କରିବା କାହିଁକି ଜରୁରୀ?
ପିଏଫ୍ ହେଉଛି ଅବସର ସମୟ ପାଇଁ ଏକ ଲାଭଦାୟକ ସଞ୍ଚୟ ଯୋଜନା। ଏଥିରେ ଆପଣଙ୍କୁ ୮.୨୫% ହାରରେ ସୁଧ ମିଳିଥାଏ। ଯଦି ଆପଣ ବାରମ୍ବାର ଟଙ୍କା ଉଠାଉଛନ୍ତି, ତେବେ ଏହି ସୁଧର ଲାଭ ହରାଇବାର ଆଶଙ୍କା ରହିଛି। ପିଏଫ୍ ଖାତାରେ ଜମା ହେଉଥିବା ଟଙ୍କା ଉପରେ ସୁଧ ସମୟ ସହ ବଢ଼ିଥାଏ, କିନ୍ତୁ ବାରମ୍ବାର ଉଠାଇବା ଦ୍ୱାରା ଏହି ସୁଧ ଓ ମୋଟ ସଞ୍ଚୟ ପରିମାଣ କମିଯାଇଥାଏ।

ଟିକସ ଛାଡ଼ର ସୁବିଧା
ଯଦି ଆପଣ ପିଏଫ୍‌ରୁ ପାଞ୍ଚ ବର୍ଷରୁ କମ୍ ସମୟ ମଧ୍ୟରେ ଟଙ୍କା ଉଠାନ୍ତି, ତେବେ ଏହା ଉପରେ ଟିକସ ଲାଗିପାରେ। ଏହା ଆପଣଙ୍କ ମୋଟ ସଞ୍ଚୟ ଉପରେ ଟିକସର ବୋଝ ବଢ଼ାଇଥାଏ। ଅନ୍ୟପକ୍ଷରେ, ପିଏଫ୍‌ରୁ ମିଳୁଥିବା ସୁଧ ଟିକସ ମୁକ୍ତ ହୋଇଥାଏ, କିନ୍ତୁ ଏହାର ନିୟମ ହେଉଛି ଯେ ଆପଣଙ୍କୁ ଅତିକମ୍‌ରେ ପାଞ୍ଚ ବର୍ଷ ପର୍ଯ୍ୟନ୍ତ ଟଙ୍କା ଉଠାଇବାକୁ ନ ପଡେ ।

ଅବସର ଫଣ୍ଡରେ କମିଯିବ
ପିଏଫ୍‌ର ମୁଖ୍ୟ ଉଦ୍ଦେଶ୍ୟ ହେଉଛି ଅବସର ପରେ ଆର୍ଥିକ ସହାୟତା ଯୋଗାଇବା। ବାରମ୍ବାର ଟଙ୍କା ଉଠାଇବା ଦ୍ୱାରା ଅବସର ସମୟରେ ଉପଲବ୍ଧ ରାଶି କମିଯାଇଥାଏ, ଯାହା ଜୀବନଧାରଣକୁ କଷ୍ଟକର କରିପାରେ। ଏହା ଆପଣଙ୍କ ଆର୍ଥିକ ସ୍ଥିରତାକୁ ପ୍ରଭାବିତ କରିଥାଏ।

ଅବସର ସମୟରେ ସମସ୍ୟା
ବାରମ୍ବାର ପିଏଫ୍‌ରୁ ଟଙ୍କା ଉଠାଇବା ଅବସର ସମୟରେ ଅନେକ ସମସ୍ୟା ସୃଷ୍ଟି କରିପାରେ। ଅବସର ପରେ ନିୟମିତ ଆୟର ଉତ୍ସ ବନ୍ଦ ହୋଇଯାଇଥାଏ। ଯଦି ପିଏଫ୍‌ରେ ପର୍ଯ୍ୟାପ୍ତ ଟଙ୍କା ନଥାଏ, ତେବେ ଦୈନନ୍ଦିନ ଖର୍ଚ ଚଳାଇବା କଷ୍ଟକର ହୋଇପଡ଼ିଥାଏ। ଏହାସହ, ବୟସ ବଢ଼ିବା ସହ ସ୍ୱାସ୍ଥ୍ୟ ସମସ୍ୟା ବଢ଼ିଥାଏ, ଯାହାର ଚିକିତ୍ସା ପାଇଁ ବହୁତ ଖର୍ଚ ହୋଇଥାଏ। ପିଏଫ୍‌ରେ ଯଥେଷ୍ଟ ସଞ୍ଚୟ ନଥିଲେ, ଏହି ଖର୍ଚ ବହନ କରିବା କଷ୍ଟକର ହୋଇପଡ଼ିଥାଏ।

ଅବସର ପରେ ପିଏଫ୍‌ ହିଁ ଆସିବ କାମ
ପିଏଫ୍‌ର ମୂଳ ଉଦ୍ଦେଶ୍ୟ ହେଉଛି ଆପଣଙ୍କ ଆୟ ବନ୍ଦ ହେବା ପରେ ଏକ ମଜବୁତ ଆର୍ଥିକ ସହାୟତା ଯୋଗାଇବା। ଏହି ସଞ୍ଚୟ ଆପଣଙ୍କୁ ବୃଦ୍ଧାବସ୍ଥାରେ ଆରାମଦାୟକ ଜୀବନଯାପନ କରିବାରେ ସାହାଯ୍ୟ କରିଥାଏ। ବର୍ତ୍ତମାନର ବଢୁଥିବା ମୁଦ୍ରାସ୍ଫୀତିର ଯୁଗରେ ସଞ୍ଚୟର ଆବଶ୍ୟକତା ଆହୁରି ବଢ଼ିଛି। ତେଣୁ ବାରମ୍ବାର ପିଏଫ୍‌ରୁ ଟଙ୍କା ଉଠାଇବାକୁ ଏଡ଼ାଇ ଦେଇ ଏହାକୁ ଦୀର୍ଘକାଳୀନ ସଞ୍ଚୟ ଭାବେ ବ୍ୟବହାର କରନ୍ତୁ, ଯାହା ଆପଣଙ୍କ ଅବସର ଜୀବନକୁ ସୁରକ୍ଷିତ ଓ ସୁଖମୟ କରିବ।