ସାଇବର ଠକ କବଳରେ ଯୁବପିଢି, ଲୋନ ଆପରୁ ଦୁଇ ହଜାର ଋଣ ଆଣି ଗଣିଲେ 15 ଲକ୍ଷ

ବର୍ତ୍ତମାନ ଅନଲାଇନ ଲୋନ ଆପକୁ ନେଇ ହେଉଛି ଚର୍ଚ୍ଚା । ଲୋନ ଆପରୁ ଟଙ୍କା ନେଇ ଅନେକ ଅସୁବିଧାରେ ପଡୁଥିବା ଦେଖାଯାଇଛି । ତେବେ କର୍ଣ୍ଣାଟକର ଚିକାବାଲପୁର ଜିଲ୍ଲାର ଚିନ୍ତାମଣି ସହରର ଆଜମତ ଉଲ୍ଲା ଏହି ସାଇବର ଠକାମିର ଶିକାର ହୋଇଛନ୍ତି ।

ବେଙ୍ଗାଲୁରୁ: ବର୍ତ୍ତମାନ ଅନଲାଇନ ଲୋନ ଆପକୁ ନେଇ ହେଉଛି ଚର୍ଚ୍ଚା । ଲୋନ ଆପରୁ ଟଙ୍କା ନେଇ ଅନେକ ଅସୁବିଧାରେ ପଡୁଥିବା ଦେଖାଯାଇଛି । ଏଭଳି ଅନେକ ଖବର ଆସୁଥିବା ଆପଣ ଦେଖିଥିବେ । ତେବେ କର୍ଣ୍ଣାଟକର ଚିକାବାଲପୁର ଜିଲ୍ଲାର ଚିନ୍ତାମଣି ସହରର ଆଜମତ ଉଲ୍ଲା ଏହି ସାଇବର ଠକାମିର ଶିକାର ହୋଇଛନ୍ତି । ଲୋନ ଆପରୁ 2 ହଜାର ଟଙ୍କା ଋଣ ନେଇ ଏବେ ସେ ଠକଙ୍କୁ 15 ଲକ୍ଷ ଟଙ୍କା ଗଣିଛନ୍ତି ।

ଆଜମତ ଚିନ୍ତାମଣି ସହରର ଟିପୁନଗରରେ ରୁହନ୍ତି । ସେ ଏକ କମ୍ପାନୀରେ ସୁପରଭାଇଜର ଭାବେ କାର୍ଯ୍ୟ କରନ୍ତି । ଅର୍ଥର ଆବଶ୍ୟକତା ହେତୁ ଜଣେ ବନ୍ଧୁଙ୍କ ପରାମର୍ଶରେ ସେ ମ୍ୟାଜିକ ଲୋନ୍ ଆପ୍ ରୁ ଦୁଇ ହଜାର ଟଙ୍କା ଋଣ ନେଇଥିଲେ । ଏହା ପରେ ସୁଧ ହିସାବରେ ପ୍ରଥମେ 3ହଜାର 5ଶହ ଟଙ୍କା ଦେଇଥିଲେ । ଲୋନ ନେବା ସମୟରେ ଆଜମତ ଆପରେ ନିଜର ଆଧାରକାର୍ଡ ଓ ପାନକାର୍ଡ ନମ୍ବର ଦେଇଥିଲେ । ଫଳରେ ଠକମାନେ ଏହାକୁ ବ୍ୟବହାର କରି 20ରୁ ଅଧିକ ଲୋନ ଆପରେ ଲକ୍ଷାଧିକ ଟଙ୍କା ଠକେଇ କରିଥିଲେ ।

ଏହାପରେ ଆଜମତଙ୍କୁ ଲୋନ ଆପ ଚଳାଉଥିବା ସାଇବର ଠକ କଲ କରି ଆହୁରି ଟଙ୍କା ଦେବାକୁ ବାଧ୍ୟ କରିଥିଲେ । ଯଦି ଟଙ୍କା ନଦେବ ତାହେଲେ ତାଙ୍କ ଫଟୋ ଲଗାଇ ଅନ୍ୟ ଜଣେ ମହିଳାଙ୍କ ନ୍ୟୁଡ୍ ଭିଡିଓ ପରିବାର ଏବଂ ବନ୍ଧୁ ମାନଙ୍କ ପାଖକୁ ପଠାଇଦେବେ ବୋଲି ଧମକ ଦେଇଥିଲେ । ଏଥିରେ ଯୁବକ ଜଣଙ୍କ ଭୟଭୀତ ହୋଇ ଏସବିଆଇ ବ୍ୟାଙ୍କ ଆକାଉଣ୍ଟରୁ 14,43,799 ଟଙ୍କା ସହିତ, ବନ୍ଧୁମାନଙ୍କ ନିକଟରୁ ଧାରକରଜ କରି 15,56,731 ଲକ୍ଷ ଟଙ୍କା ଦେଇଥିଲେ । କିନ୍ତୁ ଠକଙ୍କର ଅତ୍ୟାଚାର କମିବା ପରିବର୍ତ୍ତେ ବଢି ଚାଲିଥିଲା । ଏହାପରେ ବାଧ୍ୟ ହୋଇ ଆଜମତ ଚିନ୍ତାମଣି ନଗର ପୋଲିସ ଷ୍ଟେସନରେ ଏନେଇ ଅଭିଯୋଗ କରିଛନ୍ତି । ପୋଲିସ ବର୍ତ୍ତମାନ ତଦନ୍ତ ଆରମ୍ଭ କରିଛି ।

English summary

Person borrows Rs 2000 from loan app, ends up paying Rs 15 lakh. This incident happend in karnataka.