ଦିଲ୍ଲୀ-ଦିମାପୁର ଇଣ୍ଡିଗୋ ବିମାନରେ ଲାଗିଲା ନିଆଁ , ଟଳିଲା ବଡ଼ ଦୁର୍ଘଟଣା

ଦିଲ୍ଲୀ ବିମାନବନ୍ଦରରେ ଟକ୍ସିଂ କରୁଥିବା ସମୟରେ ଘଟିଲା ଅଘଟଣ । ଇଣ୍ଡିଗୋ ବିମାନ ଦିମାପୁର ଅଭିମୁଖେ ଯାଉଥିବାବେଳେ ଜଣେ ଯାତ୍ରୀଙ୍କ ପାୱାର ବ୍ୟାଙ୍କରେ ନିଆଁ ଲାଗିଥିବା ସୂଚନା ମିଳୁଛି । କିନ୍ତୁ ଏହି ଅଘଟଣରୁ ଯାତ୍ରୀମାନେ ଅଳ୍ପକେ ବର୍ତ୍ତିଯାଇଥିଲେ । ଏହି ଘଟଣାରେ କୌଣସି ଆହତ ହୋଇଥିବାର ସୂଚନା ମିଳିନାହିଁ । ସୂଚନାନୁଯାୟୀ, ଦିଲ୍ଲୀରୁ ନାଗାଲାଣ୍ଡର ଦିମାପୁର ଯାଉଥିବାବେଳେ ଇଣ୍ଡିଗୋ ବିମାନରେ ଯାଉଥିବା ଜଣେ ଯାତ୍ରୀଙ୍କ ନିଜସ୍ବ ଇଇଲେକ୍ଟ୍ରୋନିକ୍ ଡିଭାଇସରେ ନିଆଁ ଲାଗିଥିଲା ।

ଏପରି ଘଟଣା ଗତକାଲି ଅର୍ଥାତ୍ ରବିବାର ଦିନ ଦେଖିବାକୁ ମିଳିଥିଲା । ବିମାନଟି ବିମାନବନ୍ଦରରେ ଟକ୍ସିଂ କରୁଥିବା ସମୟରେ ପାୱାର ବ୍ୟାଙ୍କରେ ନିଆଁ ଲାଗିଯାଇଥିଲା । କର୍ମଚାରୀମାନେ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓରି ଅନୁସରଣ କରି ତୁରନ୍ତ ପରିସ୍ଥିତିକୁ ନିୟନ୍ତ୍ରଣ କରିଥିଲେ । ଏହି ଘଟଣା ପରେ ସେହି ସ୍ଥାନରେ ଆତଙ୍କ ସୃଷ୍ଟି କରିଥିଲା ।

କିନ୍ତୁ ସମସ୍ତ ଯାତ୍ରୀ ସୁରକ୍ଷିତ ଥିବା ସହିତ ବିମାନଟି ଗନ୍ତବ୍ୟସ୍ଥଳରେ ପହଞ୍ଚିଛି ବୋଲି କୌଣସି ଏକ ସୂତ୍ରରୁ ପ୍ରକାଶ ପାଇଛି । ଅନ୍ୟପଟେ ଘଟଣାର ତଦନ୍ତ ଆରମ୍ଭ ହୋଇଛି । ଏହା ସହିତ ବିମାନରେ ଯାତ୍ରା କରୁଥିବା ସମୟରେ ଯାତ୍ରୀମାନଙ୍କୁ ସତର୍କତା ଅବଲମ୍ବନ କରି ଇଲେକ୍ଟ୍ରୋନିକ୍ ଜିନିଷ ବ୍ୟବହାର କରିବାକୁ ପରାମର୍ଶ ଦିଆଯାଇଛି ।