ଶାନ୍ତିରକ୍ଷା ଅଭିଯାନରେ ମହିଳାମାନଙ୍କ ସମ୍ପୃକ୍ତି ଅଧିକ ଅନ୍ତର୍ଭୁକ୍ତ ପ୍ରଦାନ କରିଛି : ରାଷ୍ଟ୍ରପତି

ଶାନ୍ତିରକ୍ଷା ଅଭିଯାନରେ ମହିଳାମାନଙ୍କ ସମ୍ପୃକ୍ତି ଏହାକୁ ଅଧିକ ଅନ୍ତର୍ଭୁକ୍ତି ପ୍ରଦାନ କରିଛି ବୋଲି ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଛନ୍ତି । ଆଜି ଗ୍ଲୋବାଲ୍ ସାଉଥର ମହିଳା ଶାନ୍ତରକ୍ଷକ ସମ୍ମିଳନୀରେ ଯୋଗଦେଇଥିବା ପ୍ରତିଯୋଗୀମାନେ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଛନ୍ତି । ଏହି ଅବସରରେ ରାଷ୍ଟ୍ରପତି କହିଛନ୍ତି, ମହିଳା ଶାନ୍ତରକ୍ଷକମାନେ ସାଧାରଣ ଲୋକମାନଙ୍କ ଅଧିକ ନିକଟତର ହୋଇପାରିବେ ଏବଂ ମହିଳା ଓ ଶିଶୁମାନଙ୍କ ପାଇଁ କର୍ତ୍ତବ୍ୟ ସମ୍ପାଦନ କ୍ଷେତ୍ରରେ ଆଦର୍ଶ ପ୍ରତିପାଦିତ କରିପାରିବେ । ରାଷ୍ଟ୍ରପତି ମୁର୍ମୁ କହିଛନ୍ତି, ମହିଳା ଶାନ୍ତରକ୍ଷକମାନେ ଲିଙ୍ଗଗତ ହିଂସାକୁ ବୁଝିବା ସହ ସେମାନଙ୍କ ମଧ୍ୟରେ ଭରସା ବୃଦ୍ଧି କରିବା ଏବଂ ବିଭିନ୍ନ ପ୍ରସଙ୍ଗରେ ଆଲୋଚନା କରିପାରିବେ ।

ଦୀର୍ଘମିଆଦି ଶାନ୍ତି ବୁଝାମଣା ଓ ହିଂସା ହ୍ରାସ କରିବା କ୍ଷେତ୍ରରେ ଶାନ୍ତରକ୍ଷା ଅଭିଯାନ ଗୁଡ଼ିକରେ ଅଧିକ ସଂଖ୍ୟାରେ ମହିଳାଙ୍କ ଭାଗିଦାରିତା ସଫଳ ସାବ୍ୟସ୍ତ ହେବ ବୋଲି ରାଷ୍ଟ୍ରପତି କହିଛନ୍ତି । ସେ କହିଛନ୍ତି, ଜାତିସଂଘ ଶାନ୍ତିରକ୍ଷା ଅଭିଯାନ ଗୁଡ଼ିକରେ ଅଧିକ ସଂଖ୍ୟାରେ ମହିଳାମାନଙ୍କୁ ସାମିଲ କରିବାର ଆବଶ୍ୟକତା ରହିଛି ।

ଜାତିସଂଘ ଶାନ୍ତିରକ୍ଷା ଅଭିଯାନ ଗୁଡ଼ିକରେ ଭାରତର ଗୌରବମୟ ଇତିହାସ ବିଷୟକୁ ସ୍ମରଣ କରି ରାଷ୍ଟ୍ରପତି କହିଛନ୍ତି, ପ୍ରାୟ ୫୦ରୁ ଅଧିକ ଶାନ୍ତିରକ୍ଷା ଅଭିଯାନରେ ଭାରତର ୨ ଲକ୍ଷ ୯୦ ହଜାରରୁ ଅଧିକ ଶାନ୍ତରକ୍ଷକ କାର୍ଯ୍ୟ କରିଛନ୍ତି । ବିଭିନ୍ନ ଦେଶ ମଧ୍ୟରେ ଯୁଦ୍ଧ, ହିଂସାତ୍ମକ କାର୍ଯ୍ୟକଳାପ ସମୟରେ ଶାନ୍ତି ଓ ସୁରକ୍ଷା ଫେରାଇ ଆଣିବା ଲାଗି ଏବେ ୯ଟି ସକ୍ରିୟ ଅଭିଯାନରେ ୫ ହଜାରରୁ ଅଧିକ ଶାନ୍ତରକ୍ଷକ କାର୍ଯ୍ୟ କରୁଛନ୍ତି । ସେମାନଙ୍କ ମଧ୍ୟରେ ଭାରତୀୟ ମହିଳା ଶାନ୍ତରକ୍ଷକମାନେ ଆଗରେ ରହି ସଫଳତା ସହ କର୍ତ୍ତବ୍ୟ ସମ୍ପାଦନ କରୁଛନ୍ତି ।

ସୂଚନା ଯୋଗ୍ୟ ନୂଆଦିଲ୍ଲୀରେ ହେବାକୁ ଥିବା 'ୱିମେନ୍ ଇନ୍ ପିସ୍‌କିପିଙ୍ଗ୍‌, ଏ ଗ୍ଲୋବାଲ୍ ସାଉଥ୍ ପ୍ରସ୍ପେକ୍ଟିଭ୍‌' ସମ୍ମିଳନୀରେ ମହିଳା ଶାନ୍ତରକ୍ଷକମାନେ ଯୋଗଦେବେ । ବୈଦେଶିକ ମନ୍ତ୍ରଣାଳୟ ସହ ପ୍ରତିରକ୍ଷା ମନ୍ତ୍ରଣାଳୟ ଓ ଜାତିସଂଘ ଶାନ୍ତରକ୍ଷା ଅଭିଯାନର ମିଳିତ ଉଦ୍ୟମରେ ଏହି କାର୍ଯ୍ୟକ୍ରମ ଆୟୋଜିତ ହେଉଛି ।