ସଂସଦର ମିଳିତ ଅଧିବେଶନକୁ ଆଜି ସମ୍ବୋଧିତ କରିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ

Published: Thursday, June 27, 2024, 8:50 [IST]

ସଂସଦର ମିଳିତ ଅଧିବେଶନକୁ ଆଜି ସମ୍ବୋଧିତ କରିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଅଷ୍ଟାଦଶ ଲୋକସଭା ଏବଂ ୨୬୪ତମ ରାଜ୍ୟସଭାର ମିଳିତ ଅଧିବେଶନରେ ଉଦବୋଧନ ରଖିବେ ମହାମହିମ୍ ।

ଆଗାମୀ ବର୍ଷ ପାଇଁ ଏନଡିଏ ସରକାରର ପ୍ରାଥମିକତା, କାର୍ଯ୍ୟକ୍ରମ ଓ ନୀତିର ରୂପରେଖ ସଂସଦରେ ରଖିବେ ରାଷ୍ଟ୍ରପତି । ଗତ ସରକାର ନେଇଥିବା ପଦକ୍ଷେପ ସଂପର୍କରେ ମଧ୍ୟ ଆଲୋକପାତ କରିବେ । ରାଷ୍ଟ୍ରପତି ଭବନରୁ ଦ୍ରୌପଦୀ ମୁର୍ମୁ ଅଶ୍ୱାରୋହୀ ଅଙ୍ଗରକ୍ଷକଙ୍କ ସହ ସଂସଦ ଭବନରେ ପହଂଚିବେ । ପ୍ରଧାନମନ୍ତ୍ରୀ ମୋଦୀ, ଲୋକସଭା ଓ ରାଜ୍ୟସଭାର ଅଧିକାରୀ ତାଙ୍କୁ ସଂସଦର ଗଜଦ୍ୱାରରେ ସ୍ୱାଗତ କରିବେ ।

ସମ୍ବିଧାନର ଧାରା ୧୮ ଅନୁସାରେ ପ୍ରତ୍ୟେକ ଲୋକସଭା ନିର୍ବାଚନ ପରେ ସଂସଦର ମିଳିତ ଅଧିବେଶନ କୁ ରାଷ୍ଟ୍ରପତି ସମ୍ବୋଧିତ କରିବାର ନିୟମ ରହିଛି। ଦୁଇ ଦିନ ହେବ ଲୋକସଭାର ସ୍ଵତନ୍ତ୍ର ଅଧିବେଶନ ଆରମ୍ଭ ହୋଇସାରିଥିବାବେଳେ ଆଜିଠୁ ଆରମ୍ଭ ହେବ ରାଜ୍ୟସଭାର ଗୃହକାର୍ଯ୍ୟ। ସେପଟେ ଜୁଲାଇ ୨ ଏବଂ ୩ ତାରିଖରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଗତ ହେବ।

ପାରମ୍ପରିକ ରାଜ ଦଣ୍ଡ ସେଙ୍ଗଲର ନେତୃତ୍ୱରେ ରାଜ୍ୟସଭାକୁ ଅଣାଯିବ । ଏହାପରେ ରାଷ୍ଟ୍ରପତି ସଂସଦର ମିଳିତ ଅଧିବେଶନକୁ ସମ୍ବୋଧନ କରିବେ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ପରେ ଶାସକ ଦଳ ପକ୍ଷରୁ ସଂସଦର ଉଭୟ ଗୃହରେ ଧନ୍ୟବାଦ ପ୍ରସ୍ତାବ ଆଗତ କରିବେ, ଯାହା ଉପରେ ଲୋକସଭା ଓ ରାଜ୍ୟସଭାର ସଦସ୍ୟ ଆଲୋଚନା କରିବେ ।

ରାଷ୍ଟ୍ରପତି ନିଜ ଅଭିଭାଷଣରେ ମୋଦୀ ସରକାରଙ୍କ ୧୦ ବର୍ଷର କାର୍ଯ୍ୟକାଳର ଉପଲବ୍ଧି ବାବଦରେ ଉଲ୍ଲେଖ କରିପାରନ୍ତି । ଅନ୍ୟପଟେ ବିରୋଧୀ ନିଟ-ୟୁଜିରେ କଥିତ ଅନିୟମିତତା, ୟୁଜିସି-ନେଟ ପରୀକ୍ଷା ରଦ୍ଦ, ଜମ୍ମୁକାଶ୍ମୀରରେ ଆତଙ୍କବାଦୀ ଆକ୍ରମଣ, ପଶ୍ଚିମବଙ୍ଗରେ ଟ୍ରେନ ଦୁର୍ଘଟଣା, ଦେଶରେ ମହଙ୍ଗା ମାଡ ପ୍ରସଙ୍ଗରେ ସରକାରଙ୍କୁ ଘେରିବାକୁ ରଣନୀତି କରିଛନ୍ତି ।

। ଲୋକସଭା ବାଚସ୍ପତି ଭାବେ ଓମ ବିର୍ଲା ନିର୍ବାଚିତ ହୋଇଥିବାବେଳେ ଉପବାଚସ୍ପତି ପଦବୀ ଲାଗି ପ୍ରକ୍ରିୟା ଆରମ୍ଭ ହେବ । ବର୍ତ୍ତମାନ ଏନଡିଏରେ ୨୯୩ ସଦସ୍ୟ ଥିବାବେଳେ ଇଣ୍ଡିଆ ମେଣ୍ଟର ସଦସ୍ୟ ସଂଖ୍ୟା ରହିଛି ୨୩୪ । କେବଳ ବିଜେପିର ୨୪୦ ସଦସ୍ୟ ଥିବାବେଳେ କେବଳ କଂଗ୍ରେସର ସଦସ୍ୟ ସଂଖ୍ୟା ରହିଛନ୍ତି ୯୯ ।

Published On June 27, 2024