ମିଛରୁ ପାକିସ୍ତାନର ସୃଷ୍ଟି ;ବୈଦେଶିକ ସଚିବ

ଅପରେସନ ସିନ୍ଦୂର ପରେ, ପାକିସ୍ତାନ ଭାରତୀୟ ସାମରିକ ଘାଟି ଉପରେ ଆକ୍ରମଣ କରିବାକୁ ଏକ ବିଫଳ ପ୍ରୟାସ କରିଥିଲା, ଯାହାର ଭାରତୀୟ ସେନା ଉପଯୁକ୍ତ ଜବାବ ଦେଇଥିଲା। ବୈଦେଶିକ ମନ୍ତ୍ରଣାଳୟ ଦୁଇ ଜଣ ସେନା ଅଧିକାରୀଙ୍କ ସହିତ ଏକ ସାମ୍ବାଦିକ ସମ୍ମିଳନୀ କରି ପ୍ରମାଣ ସହିତ ପାକିସ୍ତାନର ପର୍ଦ୍ଦାଫାସ କରିଛନ୍ତି । ବୈଦେଶିକ ମନ୍ତ୍ରଣାଳୟ ଏହା ମଧ୍ୟ କହିଛି ଯେ ପାକିସ୍ତାନ ସୀମାରେ ଗୁଳିଚାଳନା କରୁଛି, ଯେଉଁଥିରେ ୧୬ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଛି ।

ସାମ୍ବାଦିକ ସମ୍ମିଳନୀରେ ବୈଦେଶିକ ସଚିବ ବିକ୍ରମ ମିସ୍ରି କହିଛନ୍ତି ଯେ ଅପରେସନ ସିନ୍ଦୂରର ପ୍ରଥମ ଦିନରେ ପାକସ୍ତାନକୁ ସତର୍କ କରାଇ ଦିଆଯାଇଥିଲା ଯେ ଭାରତ କେବଳ ଆତଙ୍କବାଦୀଙ୍କ ଆଡ୍ଡାକୁ ଟାର୍ଗେଟ କରିଥିଲା, କିନ୍ତୁ କୌଣସି ସାମରିକ ଲକ୍ଷ୍ୟ ଉପରେ ଆକ୍ରମଣ କରାଯାଇନଥିଲା। ଏହା ସତ୍ତ୍ବେ ପାକିସ୍ତାନ ଭାରତର କେତେକ ସାମରିକ ପ୍ରତିଷ୍ଠାନକୁ ଟାର୍ଗେଟ କରିଥିଲା। ସେହିପରି ଏଲଓସିରେ ବି ପାକିସ୍ତାନ ପକ୍ଷରୁ ଗୋଳାବର୍ଷଣ କରାଯାଉଛି। ଏଣୁ ପୂର୍ବ ଚେତାବନୀ ଅନୁସାରେ ଭାରତ ତାହାର ଦୃଢ ଜବାବ ଦେଇଥିଲା । ଭାରତର ଆକ୍ରମଣରେ ଲାହୋରର ଏୟାର ଡିଫେନ୍ସ ସିଷ୍ଟମ ଧ୍ବଂସ ପାଇଯାଇଛି।

ବିକ୍ରମ ମିସ୍ରି କହିଛନ୍ତି, "ସୀମାପାରରୁ ଭୁଲ ସୂଚନା ପ୍ରସାର କରାଯାଉଛି। ପାକିସ୍ତାନର ଖ୍ୟାତି ହେଉଛି ଯେ ବିଶ୍ୱ ଆତଙ୍କବାଦର କେନ୍ଦ୍ର ସେଠାରେ ରହିଛି। ସାରା ବିଶ୍ୱରେ ଆତଙ୍କବାଦୀ ଆକ୍ରମଣ ପାଇଁ ପାକିସ୍ତାନକୁ ନିଶ୍ଚିତ ଭାବରେ ଦାୟୀ କରାଯାଇଛି। ଓସାମା ବିନ୍ ଲାଡେନ କେଉଁଠାରେ ଥିଲେ ତାହା କହିବାର ଆବଶ୍ୟକତା ନାହିଁ। ସମସ୍ତେ ଜାଣନ୍ତି ଯେ ପାକିସ୍ତାନ ସୀମାପାର ଆତଙ୍କବାଦକୁ ପ୍ରୋତ୍ସାହିତ କରେ। ପାକିସ୍ତାନରେ ଆତଙ୍କବାଦୀମାନଙ୍କୁ ରାଷ୍ଟ୍ରୀୟ ସମ୍ମାନ ଦିଆଯାଉଛି। ପାକିସ୍ତାନୀ ସେନା ଅଧିକାରୀମାନେ ଆତଙ୍କବାଦୀଙ୍କୁ ସମ୍ମାନିତ କରୁଛନ୍ତି।

ଉତ୍ତେଜନା ବିସ୍ତାର କରିବାର ପ୍ରୟାସ ପାକିସ୍ତାନ ଦ୍ୱାରା ଆରମ୍ଭ ହୋଇଥିଲା। ପହଲଗାମ ଆକ୍ରମଣ ମୂଳ ଉତ୍ତେଜନା ଥିଲା। ଟିଆରଏଫ ଏହି ଆକ୍ରମଣର ଦାୟିତ୍ୱ ନେଇଥିଲା। ତାପୂର୍ବରୁ ପାକିସ୍ତାନୀ ସେନା ମୁଖ୍ୟ ସାମ୍ପ୍ରଦାୟିକ ବୟାନ ଦେଇଥିଲେ। ପାକିସ୍ତାନୀ ମନ୍ତ୍ରୀମାନେ ଆତଙ୍କବାଦୀଙ୍କୁ ସମର୍ଥନ କରିବା ସ୍ୱୀକାର କରିଥିଲେ। ଜାତିସଂଘରେ ପାକିସ୍ତାନ ଟିଆରଏଫକୁ ସମର୍ଥନ କରିଥିଲା ।