ସାରା ଦେଶରେ ଗତ ଦଶନ୍ଧିରେ କୃଷକମାନଙ୍କୁ ବଣ୍ଟନ ହୋଇଛି ୨୫ କୋଟିରୁ ଊର୍ଦ୍ଧ୍ୱ ମୃତ୍ତିକା ସ୍ୱାସ୍ଥ୍ୟକାର୍ଡ

ସମଗ୍ର ଦେଶରେ ଗତ ଦଶନ୍ଧିରେ କୃଷକମାନଙ୍କୁ ୨୫ କୋଟିରୁ ଊର୍ଦ୍ଧ୍ୱ ମୃତ୍ତିକା ସ୍ୱାସ୍ଥ୍ୟକାର୍ଡ ବଣ୍ଟନ କରାଯାଇଛି । ୨୦୧୫ ମସିହାରେ ସରକାରଙ୍କ ପକ୍ଷରୁ ମୃତ୍ତିକା ସ୍ୱାସ୍ଥ୍ୟକାର୍ଡ ଯୋଜନା ଆରମ୍ଭ କରାଯାଇଥିଲା । ଗତବର୍ଷ ଜୁଲାଇ ସୁଦ୍ଧା ଏହି ଯୋଜନା ଅଧୀନରେ ୯୩ ହଜାରରୁ ଊର୍ଦ୍ଧ୍ୱ କୃଷକଙ୍କୁ ପ୍ରଶିକ୍ଷଣ କାର୍ଯ୍ୟକ୍ରମ, ୬ ଲକ୍ଷରୁ ଊର୍ଦ୍ଧ୍ୱ କ୍ଷେତ୍ର ପ୍ରଦର୍ଶନ ଏବଂ ବହୁସଂଖ୍ୟାରେ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ଉର୍ବର ମୃତ୍ତିକା ପରିଚାଳନାରେ ସମତୁଲ ବଜାୟ ରଖିବା ଲାଗି ସରକାରଙ୍କ ପକ୍ଷରୁ ଏହି ଯୋଜନା କାର୍ଯ୍ୟକାରୀ କରାଯାଉଛି । ପ୍ରତି ଦୁଇବର୍ଷରେ ଥରେ କୃଷକମାନଙ୍କୁ ମୃତ୍ତିକା ସ୍ୱାସ୍ଥ୍ୟକାର୍ଡ ଜାରି କରାଯାଉଛି । ଏହା ଦ୍ୱାରା ଚାଷୀମାନେ ମୃତ୍ତିକାର ଉର୍ବରତାର ସ୍ଥିତି ଏବଂ ରସାୟନ ପରିସ୍ଥିତି ସଂପର୍କରେ ସବିଶେଷ ତଥ୍ୟ ଜାଣିପାରିବେ । ଫଳରେ ସେମାନେ ଚାଷରେ ଉପଯୁକ୍ତ ରସାୟନ ସାର, ଜୈବସାର ଏବଂ ମୃତ୍ତିକାର ଉପଯୁକ୍ତ ଯତ୍ନ ନେଇପାରିବେ ।