ରାଜଧାନୀରେ ପୁଣି ବୋମା ଧମକ; ସ୍କୁଲ ପରେ ଏବେ ୨୦ରୁ ଅଧିକ କଲେଜ୍‌କୁ ଧମକପୂର୍ଣ୍ଣ ଇମେଲ

ସ୍କୁଲ ପରେ ଏବେ କଲେଜରେ ବୋମା ଆତଙ୍କ। ଦିଲ୍ଲୀର ୨୦ଟି ମହାବିଦ୍ୟାଳୟକୁ ମିଳିଛି ଧମକପୂର୍ଣ୍ଣ ଇ-ମେଲ । ଏନେଇ ପୁଲିସ କଣ୍ଟ୍ରୋଲ ରୁମକୁ ସୂଚନା ମିଳିବା ପରେ ତଦନ୍ତ କରିଛି ପୁଲିସ । ସର୍ଚ୍ଚ ଅପରେସନ୍ ସମୟରେ କଲେଜ ଭିତରେ କୌଣସି ସନ୍ଦେହଜନକ ବସ୍ତୁ କିମ୍ବା ବିସ୍ଫୋରକ ସାମଗ୍ରୀ ମିଳିନାହିଁ । ତେବେ ଇମେଲ୍ ପଠାଇଥିବା ବ୍ୟକ୍ତି ଭିପିଏନ୍ ବ୍ୟବହାର କରିଥିବା ନେଇ ପୁଲିସ ସନ୍ଦେହ କରୁଛି ।

ଗତ ୫ଦିନ ମଧ୍ୟରେ ୧୦୦ରୁ ଅଧିକ ସ୍କୁଲକୁ ବୋମା ଧମକ ମିଳିଛି । ଏବେ କଲେଜ ଏବଂ ହସ୍ପିଟାଲକୁ ବାରମ୍ବାର ଧମକ ମିିଳିବା ଘଟଣା ଏକ ଗମ୍ଭୀର ପ୍ରସଙ୍ଗ ପାଲଟିଛି । ଅଗଷ୍ଟ ୨୦ ତାରିଖରେ ମଧ୍ୟ ଦିଲ୍ଲୀର ୫୦ଟି ସ୍କୁଲକୁ ଧମକପୂର୍ଣ୍ଣ ଇମେଲ୍ ମିଳିଥିଲା। ନଜଫଗଡ଼, ମାଲବ୍ୟ ନଗର, ପ୍ରସାଦ ନଗର, କାରୋଲ ବାଗ ସମେତ ଅନେକ ଅଞ୍ଚଳର ସ୍କୁଲରେ ଧମକପୂର୍ଣ୍ଣ ଇମେଲ୍ ମିଳିଥିଲା, ଯାହା ଉପରେ ଦିଲ୍ଲୀ ପୁଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।ସେହିପରି ୨୧ ଅଗଷ୍ଟରେ ଦିଲ୍ଲୀର ୬ଟି ସ୍କୁଲକୁ ବୋମା ଧମକ ମିଳିଥିଲା।

ପ୍ରସାଦ ନଗରର ଆନ୍ଧ୍ର ଏଜୁକେସନ୍ ସୋସାଇଟି ସିନିୟର ସେକେଣ୍ଡାରୀ ସ୍କୁଲ, ଦ୍ୱାରକା ସେକ୍ଟର-୫ରେ ଥିବା ବିଜିଏସ୍ ଇଣ୍ଟରନ୍ୟାସନାଲ ପବ୍ଲିକ୍ ସ୍କୁଲ, ଛାୱଲାର ରାଓ ମାନ ସିଂହ ସିନିୟର ସେକେଣ୍ଡାରୀ ସ୍କୁଲ, ଦ୍ୱାରକା ସେକ୍ଟର-୧ରେ ଥିବା ମ୍ୟାକ୍ସଫୋର୍ଟ ସ୍କୁଲ ଏବଂ ଦ୍ୱାରକା ସେକ୍ଟର-୧୦ରେ ଥିବା ଇନ୍ଦ୍ରପ୍ରସ୍ଥ ଇଣ୍ଟରନ୍ୟାସନାଲ ସ୍କୁଲକୁ ଧମକପୂର୍ଣ୍ଣ ଇମେଲ୍ ମିଳିଥିଲା। ସେହିପରି ପରଦିନ ଅର୍ଥାତ୍ ୨୨ ଅଗଷ୍ଟରେ, ଦିଲ୍ଲୀର ଦ୍ୱାରକା ସେକ୍ଟର-୭ ସମେତ ଅନ୍ୟୂନ ୧୦୦ ସ୍କୁଲକୁ ବିସ୍ଫୋରଣ କରି ଉଡ଼ାଇ ଦେବାକୁ ଧମକପୂର୍ଣ୍ଣ ଇମେଲ୍ ଆସିଥିଲା ।