କୋଲକାତା ବଳାତ୍କାର ହତ୍ୟା ମାମଲା: ସାମ୍ନାକୁ ଆସିଲା ସେହି ରାତିର ସତ!

କୋଲକାତା: ଗତ କିଛି ଦିନ ହେବ କୋଲକାତାର ଆରଜି କର ମେଡିକାଲ୍ ଓ ହସ୍ପିଟାଲ୍‌ର ଟ୍ରେନି ଡାକ୍ତରଙ୍କ ହତ୍ୟା ଓ ଦୁଷ୍କର୍ମ ଘଟଣା ସମଗ୍ର ଦେଶକୁ ଦୋହଲାି ରଖିଛି । ଏହି ମାମଲାକୁ ନେଇ ଏବେ ତଦନ୍ତ ଜୋରଦାର ଧରିଥିବା ବେଳେ ପ୍ରତିଦିନ ନୂଆ ନୂଆ ତଥ୍ୟ ହସ୍ତଗତ ହେବାରେ ଲାଗିଛି। ବର୍ତ୍ତମାନ ତଦନ୍ତରେ ଏବେ ଘଟଣା ଦିନ ଅର୍ଥାତ୍ ସେହି କାଳରାତିର ଏକ ସିସିଟିଭି ଫୁଟେଜ୍ ସାମ୍ନାକୁ ଆସିଛି । ଏଥିରେ ଅଭିଯୁକ୍ତ ସଞ୍ଜୟ ରୟ ହସ୍ପିଟାଲର ଚତୁର୍ଥ ମହଲାରେ ଚେଷ୍ଟ ବିଭାଗର ସେମିନାର ହଲକୁ ଯାଉଥିବାର ନଜର ଆସିଛନ୍ତି।

କୋଲକାତା ପୁଲିସ ଓ ସିବିଆଇ ତଦନ୍ତରୁ ମିଳିଥିବା ତଥ୍ୟ ଅନୁଯାୟୀ, ସେଦିନ ରାତିରେ ସେମିନାର୍ ହଲ୍‌କୁ ଯାଇଥିଲେ ମୋଟ୍ ୬ ଜଣ। ପୀଡ଼ିତା ଅଭୟା, ଅଭିଯୁକ୍ତ ସଞ୍ଜୟଙ୍କ ବ୍ୟତୀତ ଆଉ ୪ ଜଣ ଥିଲେ। ରାତିରେ ଡ୍ୟୁଟି ପରେ ସେମିନାର୍ ହଲରେ ହିଁ ପୀଡ଼ିତାଙ୍କ ସହ ଏମାନେ ଡିନର କରିଥିଲେ। ଡିନର୍ ପରେ ୪ ଜଣ ସେମିନାର ହଲରୁ ବାହାରି ଆସିଥିଲେ।

ଏମାନଙ୍କ ମଧ୍ୟରେ ଜଣେ ଜୁନିୟର ଡାକ୍ତର ଓ ଆଉ ଜଣେ ସେମିନାର୍ ହଲ୍ ସାମ୍ନାରେ ଡାକ୍ତର ପାଇଁ ଥିବା ସ୍ଲିପ୍ ରୁମ୍ ଯାଇଥିଲେ। ଆଉ ଜଣେ ଇଣ୍ଟନ୍ ଡାକ୍ତର ସେହି ତୃତୀୟ ମହଲାରେ ଇଣ୍ଟର୍ଣ୍ଣଙ୍କ ପାଇଁ ଥିବା ରେଷ୍ଟ ରୁମକୁ ଯାଇଥିଲେ। ଏବଂ ହାଉସ୍ ଷ୍ଟାଫ ଜଣକ ପ୍ରଥମ ମହଲାକୁ ପଳେଇ ଥିଲେ। ସିସିଟିଭି ଫୁଟେଜ୍ ଅନୁଯାୟୀ, ସଞ୍ଜୟ ଭୋର ୪.୦୩ରେ କରିଡର ଦେଇ କ୍ରାଇମସିନରେ ପହଞ୍ଚିଛନ୍ତି ଏବଂ ପ୍ରାୟ ୪.୩୨ ସମୟରେ ସେଠାରୁ ବାହାରକୁ ଆସିଛନ୍ତି।

କିଛି ଗଣମାଧ୍ୟମ ରିପୋର୍ଟରେ କୁହାଯାଇଛି ଯେ ସେ ୪୦ମିନିଟ ଧରି ସେମିନାର ହଲରେ ଥିଲେ। ଯେତେବେଳେ ସେ ବାହାରକୁ ଆସିଥିଲେ, ସେତେବେଳେ ସେ ନର୍ଭସ ଦେଖାଯାଉଥିଲେ। ତା'ପରେ ସେ ପୁଣିଥରେ ସେମିନାର ହଲକୁ ଯାଇଥିଲେ ଆଉ ଯେତେବେଳେ ସେ ବାହାରକୁ ଆସିଲେ, ତାଙ୍କ ବେକରୁ 'ହେଡଫୋନ' ନ ଥିଲା।

ଡାକ୍ତରଙ୍କ ମୃତଦେହ ନିକଟରୁ ହେଡଫୋନ ଉଦ୍ଧାର କରାଯାଇଛି, ଯାହାଫଳରେ ସଞ୍ଜୟ ରୟଙ୍କୁ ଗିରଫ କରାଯାଇଥିଲା ବୋଲି ପୁଲିସ କହିଛି। ସଞ୍ଜୟଙ୍କ ଭିତରକୁ ଯାଉଥିବା ଏହି ସିସିଟିଭି ଫୁଟେଜ ଜାରି ହୋଇଛି, କିନ୍ତୁ ତାଙ୍କ ବାହାରିବା ବେଳର ଫୁଟେଜ ଏପର୍ଯ୍ୟନ୍ତ ପ୍ରକାଶ ପାଇନାହିଁ।