ନୀତିଶ ହେବେ ଇଣ୍ଡିଆ ମେଣ୍ଟର ସଂଯୋଜକ !

Published: Tuesday, January 2, 2024, 12:21 [IST]

ନୂଆଦିଲ୍ଲୀ: ଇଣ୍ଡିଆ ମେଣ୍ଟର ବଡ ଦାୟିତ୍ଵ ନେଇପାରନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ସୂଚନାନୁସାରେ, ନୀତୀଶ ଏବଂ କଂଗ୍ରେସ ସମେତ ଇଣ୍ଡିଆ ମେଣ୍ଟର ନେତାମାନେ ଆସନ୍ତାକାଲି ଜୁମ୍ ଆପ୍ ଆଲୋଚନା କରିବେ । ଇଣ୍ଡିଆ ମେଣ୍ଟରେ ନୀତୀଶଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ବିଚାର କରି କଂଗ୍ରେସର ବରିଷ୍ଠ ନେତାମାନେ ତାଙ୍କୁ ସଂଯୋଜକ କରିବାକୁ ପ୍ରସ୍ତାବ ଦେଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।

ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଆରଜେଡି ନେତା ତେଜସ୍ୱୀ ଯାଦବ ଏବଂ ସମାଜବାଦୀ ପାର୍ଟି ନେତା ଅଖିଳେଶ ଯାଦବଙ୍କ ଠାରୁ କଂଗ୍ରେସ ମଧ୍ୟ ସମ୍ମତି ନେଇଛି । ଶରଦ ପାୱାର ଏବଂ ଉଦ୍ଧବ ଠାକରେଙ୍କ ସହ ମଧ୍ୟ ଆଲୋଚନା ହୋଇଛି । ଦକ୍ଷିଣ ଭାରତୀୟ ଦଳ ଏବଂ ବାମପନ୍ଥୀ ନେତାଙ୍କ ସହ ମଧ୍ୟ ଆଲୋଚନା ହୋଇଛି। ସୂଚନା ଅନୁଯାୟୀ, କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେଙ୍କ ସମେତ ବହୁ ବଡ କଂଗ୍ରେସ ନେତା ଜୁମ୍ ଆପରେ ରହିବେ ।

ନୀତୀଶ କୁମାରଙ୍କୁ ମେଣ୍ଟର ସଂଯୋଜକ କରିବା ପଛରେ ମଧ୍ୟ ଅନେକ କାରଣ ରହିଛି । ପ୍ରଥମେ ସେ ବିରୋଧୀଦଳମାନଙ୍କ ଏକଜୁଟ୍ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ । ଗତବର୍ଷ ସେ ଭିନ୍ନ ଭିନ୍ନ ରାଜ୍ୟ ଗସ୍ତ କରି ବିରୋଧୀଦଳର ନେତାମାନଙ୍କୁ ଏକାଠି କରିଥିଲେ । ଏଣୁ ନୀତୀଶ କୁମାରଙ୍କୁ ଇଣ୍ଡିଆ ମେଣ୍ଟର ସୂତ୍ରଧର ବୋଲି ମଧ୍ୟ କୁହାଯାଇପାରିବ । ୨୦୨୩ ଜୁନ ମାସରେ ସେ ୧୫ଟି ଅଣ ବିଜେପି ଦଳଙ୍କୁ ଗୋଟିଏ ମଞ୍ଚରେ ବସାଇବାରେ ସକ୍ଷମ ହୋଇଥିଲେ । ତେବେ ଅସନ୍ତାକାଲିର ଜୁମ୍‌ ମିଟିଂ ପରେ ନୀତୀଶ ଇଣ୍ଡିଆ ମେଣ୍ଟର ସଂଯୋଜକ ହେବେ ନା ନାହିଁ ତାହା ସ୍ପଷ୍ଟ ହେବ ।

Published On January 2, 2024