ଜାତୀୟ ରାଜପଥ ଉପରେ ଗଡକରୀଙ୍କ ବଡ଼ ବୟାନ, କହିଲେ ଗତ ବର୍ଷ.....

ଦେଶରେ ଅଙ୍ଗାରକାମ୍ଳ ନିର୍ଗମନ ହ୍ରାସ କରିବା ଏବଂ ଜାତୀୟ ରାଜପଥ ଗୁଡ଼ିକୁ ପରିବେଶ ଅନୁକୂଳ କରିବା ପାଇଁ ସରକାର ବହୁବିଧ ପଦକ୍ଷେପ ଗ୍ରହଣ କରୁଛନ୍ତି ବୋଲି ସଡ଼କ ପରିବହନ ଓ ଜାତୀୟ ରାଜପଥ ମନ୍ତ୍ରୀ ନିତିନ ଗଡ଼କରୀ କହିଛନ୍ତି । ଫରିଦାବାଦ୍‍ ନୋଏଡ଼ା ଆନ୍ତର୍ଜାତିକ ବିମାନ ବନ୍ଦର କରିଡ଼ରରେ 'ଏକ୍‍ ପେଡ୍‍ ମା କେ ନାମ୍‍' ଦ୍ୱିତୀୟ ପର୍ଯ୍ୟାୟ ଅଭିଯାନ ଅନ୍ତର୍ଗତ ଚାରାରୋପଣ କାର୍ଯ୍ୟକ୍ରମରେ ଯୋଗ ଦେଇ ମନ୍ତ୍ରୀ ଶ୍ରୀ ଗଡ଼କରୀ ଏହା କହିଛନ୍ତି ।

ଦେଶ ବ୍ୟାପି ଜାତୀୟ ରାଜପଥରେ ଏ ପର୍ଯ୍ୟନ୍ତ ୪ କୋଟି ୭୮ ଲକ୍ଷରୁ ଅଧିକ ଚାରା ରୋପଣ କରାଯାଇଛି ବୋଲି ସେ କହିଛନ୍ତି । ଗତବର୍ଷ ୬୦ ଲକ୍ଷ ଚାରାରୋପଣ ପାଇଁ ଲକ୍ଷ୍ୟ ରଖାଯାଇଥିବା ବେଳେ ୬୭ ଲକ୍ଷ ଚାରାରୋପଣ କରାଯାଇ ଏ କ୍ଷେତ୍ରରେ ୧୧୨ ପ୍ରତିଶତ ସଫଳତା ହାସଲ ହୋଇଛି ବୋଲି ସେ କହିଛନ୍ତି ।

ଏହି ଅବସରରେ ଶ୍ରୀ ଗଡ଼କରୀ ବାଉଁଶର ବ୍ୟବହାର ଉପରେ ଗୁରୁତ୍ୱପ୍ରଦାନ କରିଛନ୍ତି । ଏହାକୁ ଏକ ବହୁମୁଖୀ ଉଦ୍ୟୋଗ ଭାବେ ଶ୍ରୀଗଡ଼କରୀ ବର୍ଣ୍ଣନା କରିଛନ୍ତି । ଭାରତର ଅଟୋ ମୋବାଇଲ୍‍ ଶିଳ୍ପ ଜାପାନକୁ ପଛରେ ପକାଇ ବିଶ୍ୱର ତୃତୀୟ ବୃହତମ ଶିଳ୍ପର ମାନ୍ୟତା ହାସଲ କରିଛି ବୋଲି ମନ୍ତ୍ରୀ ଶ୍ରୀ ଗଡ଼କରୀ ସୂଚନା ଦେଇଛନ୍ତି ।