ବାଘ ମୁହଁରୁ ପୁଅକୁ ରକ୍ଷା କଲା ସାହାସୀ ମାଆ

ବାଘ ମୁହଁରୁ ରକ୍ଷା କଲା ମାଆ। ମଧ୍ୟପ୍ରଦେଶର ଚର୍ଚ୍ଚରେ ସାହାସୀ ମାଆ ଅର୍ଚ୍ଚନା ।

Published: Monday, September 5, 2022, 16:14 [IST]

ଭୋପାଳ: ମାଆ ଶବ୍ଦରେ ହିଁ ଭରି ରହିଛି ସାହାସ। ଯାହାର ମାଆ ଅଛି ତାର ସବୁକିଛି ଅଛି ବୋଲି କୁହାଯାଏ। ନିଜ ସନ୍ତାନ ଉପରେ କାହାର ବି ଖରାପ ନଜର ବରଦାସ୍ତ କରିପାରେନି ମାଆ। ମଧ୍ୟପ୍ରଦେଶର ଉମାରିଆ ଜିଲ୍ଳାର ଏକ ଘଟଣା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି ।

ବାନ୍ଧବଗଡ ଟାଇଗର ରିଜର୍ଭ ଅଞ୍ଚଳକୁ ଲାଗି ରୋହନିୟା ଜ୍ୱାଳାମୁଖୀ ଗାଁ । ତେବେ ଏହି ଗାଁରେ ନିଜ ପରିବାର ଧରି ବାସ କରନ୍ତି କିଛି ପରିବାର । ରବିବାର ଦିନ ଏକ ବାଘ ଗାଁ ଭିତରେ ପଶି ଦେଢ ବର୍ଷର ଶିଶୁ ରାଜବୀରକୁ ପାଟିରେ ଧରି ନେଇ ପଳାଉଥିଲା । କିନ୍ତୁ ଏଭଳି ଭୟାନକ ଦୃଶ୍ୟ ରାଜବୀରଙ୍କ ମାଆ ଅର୍ଚ୍ଚନା ଦେଖିବାକୁ ପାଇଥିଲେ । ବାଘ ମୁହଁରେ ନିଜ ପୁଅକୁ ଦେଖି ତାକୁ ବଞ୍ଚାଇବା ପାଇଁ ଧାଇଁ ଯାଇଥିଲେ । ଦୀର୍ଘ ସମୟ ଧରି ବାଘ ସହିତ ଲଢି ରକ୍ତାକ୍ତ ହୋଇଥିଲେ ସତ, କିନ୍ତୁ ପୁଅକୁ ମୃତ୍ୟୁ ମୁହଁରୁ ରକ୍ଷା କରିଥିଲେ ।

ଲଢେଇ ବେଳେ ଅର୍ଚ୍ଚନାଙ୍କ ଶରୀରରେ ବାଘ ନଖ ଏବଂ ଦାନ୍ତରେ ଆକ୍ରମଣ କରିଥିଲା । କିନ୍ତୁ ମାଆର ମମତା ଆଗରେ ବାଘର ବଳ କମ୍ ପଡିଯାଇଥିଲା। ଶେଷରେ ପିଲାକୁ ମୁହଁରୁ ଫିଙ୍ଗି ଦେଇ ଜଙ୍ଗଲକୁ ପଳାଇ ଥିଲା ବାଘ । ଏହି ଘଟଣା ବିଷୟରେ ଖବର ପାଇବା କ୍ଷଣି ଗ୍ରାମବାସୀ ଧାଇଁ ଆସିଥିଲେ । ଉଭୟ ମାଆ ପୁଅଙ୍କୁ ଉଦ୍ଧାର କରି ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ । ଡାକ୍ତର ପରୀକ୍ଷା କରି ଉଭୟ ସୁସ୍ଥ ଥିବା କହିଛନ୍ତି ।

Published On September 5, 2022