ଅଧିକାଂଶ ଛାଡପତ୍ର ମାମଲା ପ୍ରେମ ବିବାହରୁ ଆସୁଛି: ସୁପ୍ରିମକୋର୍ଟ

Updated: Wednesday, May 17, 2023, 17:01 [IST]

Supreme Court on Divorce Case: ଅଧିକାଂଶ ଛାଡପତ୍ର ମାମଲା ପ୍ରେମ ବିବାହରୁ ଆସୁଛି । ଏକଥା ବୁଧବାର ସୁପ୍ରିମକୋର୍ଟ ଏକ ମାମଲାର ଶୁଣାଣି ବେଳେ କହିଛନ୍ତି ।

ସୁପ୍ରିମ୍‌କୋର୍ଟ ସିଧାସିଧା କହିଛନ୍ତି ଯେ, ଅଧିକାଂଶ ଛାଡପତ୍ର ମାମଲା ପ୍ରେମ ବିବାହରୁ ଆସୁଛି । ଜଷ୍ଟିସ୍ ବି.ଆର ଗୱାଇ ଏବଂ ସଞ୍ଜୟ କାରୋଲଙ୍କ ଖଣ୍ଡପିଠ ଏକ ବିବାହ ବିବାଦକୁ ନେଇ ଟ୍ରାନ୍ସଫର ଆବେଦନର ଶୁଣାଣି ବେଳେ ଏହି ଟିପ୍ପଣି ଦେଇଛନ୍ତି ।

ବାର ଆଣ୍ଡ ବେଞ୍ଚର ରିପୋର୍ଟ ଅନୁଯାୟୀ ଜଷ୍ଟିସ୍ ଗୱାଇ କହିଛନ୍ତି, ଅଧିକାଂଶ ଛାଡପତ୍ର ମାମଳା କେବଳ ପ୍ରେମ ବିବାହରୁ ହିଁ ଆସୁଛି । ସେମାନେ କିଛି ଦିନ ଏକାଠି ରହିବା ପରେ ଅଲଗା ହୋଇ ଯାଉଛନ୍ତି । ତେବେ କୋର୍ଟ ମଧ୍ୟସ୍ଥତା ପ୍ରସ୍ତାବ ଦେଇଥିଲେ । ଯାହାକୁ ସ୍ୱାମୀ ବିରୋଧ କରିଥିଲେ। ତେବେ କୋର୍ଟ କହିଛନ୍ତି ଯେ ନିକଟରେ ହୋଇଥିବା ଏକ ବିଚାରକୁ ଦୃଷ୍ଟିରେ ରଖି ସାମ୍ନା ବ୍ୟକ୍ତିର ବିନା ଅନୁମତିରେ ଛାଡପତ୍ର ଦେଇ ହେବ ବୋଲି ରାୟ ପ୍ରକାଶ ପାଇଥିଲା ।

ସୁପ୍ରିମକୋର୍ଟ ଚଳିତ ମାସ ଆରମ୍ଭରୁ ଏକ ମାମଲାର ଶୁଣାଣି କରି କହିଥିଲେ ଯେ, ଜୀବନସାଥିଙ୍କ ମଧ୍ୟରେ ସୃଷ୍ଟି ହୋଇଥିବା ଫାଟ ଯଦି ପୁରଣ ନହୋଇପାରେ ତେବେ ସେମାନଙ୍କ ଛାଡ଼ପତ୍ର ଆବେଦନ ତୁରନ୍ତ ଗ୍ରହଣ କରିବା ଉଚିତ୍ । କାରଣ ଏହା ସେମାନଙ୍କର ଅଧିକାର ନୁହେଁ ବିଶେଷାଧିକାର । ଏଥିରେ କୋର୍ଟ ଆହୁରି ମଧ୍ୟ କହିଥିଲେ ଯେ, ଏଭଳି ମାମଲାର ତୁରନ୍ତ ସମାଧାନ ହେବା ଆବଶ୍ୟକ ।

ଖାଲି ସେତିକି ନୁହେଁ, ଉଭୟ ପକ୍ଷ ଯେଭଳି ନ୍ୟାୟ ପାଇବେ ସେହିଭଳି ରାୟ ସୁଣାଇବାକୁ ହେବ ବୋଲି କୋର୍ଟ କହିଥିଲେ । ଏହାସହ ପାରିପାର୍ଶ୍ୱିକ ପରିସ୍ଥିତି ତଥା ତଥ୍ୟ ପ୍ରମାଣକୁ ଆଧାର କରି ଏହି ରାୟ ଶୁଣାଇବାକୁ ହୋଇଥାଏ ।