ଦେଶରେ ୭ଲକ୍ଷରୁ ଊର୍ଦ୍ଧ୍ୱ ଛାତ୍ରୀ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ ପଢ଼ୁଛନ୍ତି; କେନ୍ଦ୍ର ଶିକ୍ଷାମନ୍ତ୍ରୀ

ଦେଶରେ ସଂପ୍ରତି ୭ଲକ୍ଷରୁ ଊର୍ଦ୍ଧ୍ୱ ଛାତ୍ରୀ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ ଅଧ୍ୟୟନ କରୁଥିବା ସରକାର କହିଛନ୍ତି । ଲୋକସଭାରେ ଆଜି ଏକ ଅତିରିକ୍ତ ପ୍ରଶ୍ନର ଉତ୍ତରରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ୨ ଲକ୍ଷରୁ ଊର୍ଦ୍ଧ୍ୱ ଅନୁସୂଚିତ ଜାତି, ୧ ଲକ୍ଷ ୭୭ ହଜାର ଅନୁସୂଚିତ ଜନଜାତି ଏବଂ ୨ ଲକ୍ଷ ୬୪ ହଜାର ଅନ୍ୟ ପଛୁଆବର୍ଗର ଛାତ୍ରୀ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ ସାମିଲ ଅଛନ୍ତି । ୨୦୦୪ ମସିହା ଜୁଲାଇ ମାସରେ ଏହି ଯୋଜନାର ଶୁଭାରମ୍ଭ କରାଯାଇଥିଲା । ଏହିସବୁ ସଂପ୍ରଦାୟର ବାଳିକାମାନଙ୍କ ପାଇଁ ପ୍ରାଥମିକ ସ୍ତରରେ ଆବାସିକବିଦ୍ୟାଳୟ ସ୍ଥାପନ ସହ ଶିକ୍ଷା ପ୍ରଦାନ ପାଇଁ ଏହି ଯୋଜନା କାର୍ଯ୍ୟକାରୀ କରାଯାଇଥିଲା ।

ଶ୍ରୀ ପ୍ରଧାନ କହିଛନ୍ତି, କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ ସ୍ଥାପନ ପଛରେ ଆବାସିକ ବିଦ୍ୟାଳୟ ମାଧ୍ୟମରେ ଏହିସବୁ ପଛୁଆବର୍ଗର କନ୍ୟା ସନ୍ତାନମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନର ଲକ୍ଷ୍ୟ ରହିଛି । କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟଗୁଡ଼ିକରେ ନୂତନ ଯୋଜନା କାର୍ଯ୍ୟକାରୀ ଫଳରେ କନ୍ୟାସନ୍ତାନ ମାନଙ୍କ ସଂଖ୍ୟା ଅନୁପାତ ବୃଦ୍ଧି ପାଇଛି, ଯାହାକି ଏକ ଭଲ ସୂଚନା ବୋଲି ସେ କହିଛନ୍ତି ।

ସରକାର କନ୍ୟା ସନ୍ତାନମାନଙ୍କୁ ଶିକ୍ଷା ପ୍ରଦାନ ପ୍ରୋତ୍ସାହିତ କରିବା ଏବଂ ସେମାନଙ୍କୁ ସଶକ୍ତ କରିବା ଲାଗି ଦୃଢ଼ ପ୍ରତିଶ୍ରୁତିବଦ୍ଧ ବୋଲି ଶ୍ରୀ ପ୍ରଧାନ କହିଛନ୍ତି । ୨୦୨୬-୨୭ କେନ୍ଦ୍ର ବଜେଟ୍‍ରେ ସରକାର ଦେଶର ପ୍ରତିଟି ଜିଲ୍ଲାରେ ବାଳିକା ହଷ୍ଟେଲ୍‍ ସ୍ଥାପନ ପାଇଁ ଘୋଷଣା କରିଥିବା ଶ୍ରୀ ପ୍ରଧାନ ସୂଚନା ଦେଇଛନ୍ତି ।