ମୋବାଇଲ୍ ବ୍ୟବହାରୀଙ୍କ ପାଇଁ ଖୁସି ଖବର, କଲ୍, ମେସେଜ ପାଇଁ ସ୍ବତନ୍ତ୍ର ପ୍ଲାନ ଆଣିବାକୁ ସରକାରଙ୍କ ନିର୍ଦ୍ଦେଶ

ନୂଆଦିଲ୍ଲୀ : ମୋବାଇଲ୍ ଉପଭୋକ୍ତାଙ୍କ ପାଇଁ ବଡ଼ ଆଶ୍ବସ୍ତି । ଟାରିଫ୍ ନିୟମରେ ସଂଶୋଧନ ଆଣିଲା ଟ୍ରାଏ । ପୁଣି ଚାଲିବ ୧୦ ଟଙ୍କିଆ ରିଚାର୍ଜ କୁପନ୍। ଟେଲିକମ୍ କମ୍ପାନୀମାନଙ୍କୁ ଅତି କମରେ ୧୦ ଟଙ୍କିଆ ଟପ୍ ଅପ୍ ରିଚାର୍ଜ ଭାଉଚର ରଖିବାକୁ ପଡ଼ିବ । ଭଏସ୍ କଲ୍ ଓ ଏସଏମଏସ ପାଇଁ ସ୍ବତନ୍ତ୍ର ପ୍ଲାନ ଆଣିବାକୁ ନିର୍ଦ୍ଦେଶ ଦିଆଯାଇଛି । ଏହି ଖବର ପ୍ରକାଶ ପାଇବା ପରେ ଗ୍ରାହକଙ୍କ ମଧ୍ୟରେ ଖୁସିର ଲହରୀ ଦେଖିବାକୁ ମିଳିଛି ।

ସମ୍ପ୍ରତି, କମ୍ପାନୀଗୁଡିକ ଇଣ୍ଟରନେଟ୍ ଡାଟା, ଭଏସ୍ କଲ୍ ଏବଂ SMS ରିଚାର୍ଜ କୁପନ୍ ପ୍ରଦାନ କରୁଛନ୍ତି। ଟ୍ରାଇ ସ୍ୱତନ୍ତ୍ର ରିଚାର୍ଜ କୁପନ୍ ଉପରେ ୯୦ ଦିନର ସୀମା ହଟାଇ ଏହାକୁ ୩୬୫ ଦିନ କରିବାକୁ ନିର୍ଦ୍ଦେଶ ଦେଇଛି। ଟ୍ରାଇ ଟେଲିକମ୍ ଗ୍ରାହକ ସୁରକ୍ଷା (ଦ୍ୱାଦଶ ସଂଶୋଧନ) ନିୟମାବଳୀ, ୨୦୨୪ ରେ କହିଛି ଯେ ସେବା ପ୍ରଦାନକାରୀଙ୍କୁ ଅତି କମରେ ଏକ ସ୍ୱତନ୍ତ୍ର ଶୁଳ୍କ ଭାଉଚର କେବଳ ଭଏସ ଏବଂ SMS ପାଇଁ ପ୍ରଦାନ କରିବାକୁ ପଡିବ।

ଏହାର ବୈଧତା ଅବଧି ୩୬୫ ଦିନରୁ ଅଧିକ ହେବ ନାହିଁ। ଏହି ନିଷ୍ପତ୍ତି ସେହି ଗ୍ରାହକଙ୍କୁ ଉପକୃତ କରିବ ଯେଉଁମାନେ ଇଣ୍ଟରନେଟ୍ ଡାଟା ବ୍ୟବହାର କରନ୍ତି ନାହିଁ ଏବଂ କେବଳ ଭଏସ୍ କଲ୍ ଏବଂ SMS ବ୍ୟବହାର କରନ୍ତି। ଅତିକମରେ ୧୦ ଟଙ୍କିଆ ରିଚାର୍ଜ ଭାଉଚର ଦେବାକୁ ପଡିବ । ଏହି ନୂଆ ନିୟମରେ ଗ୍ରାହକଙ୍କୁ ଫାଇଦା ମିଳିବ । କାରଣ ଏବେ କେବଳ ସେମାନେ ଯେଉଁ ସେବା ଉପଭୋଗ କରିବେ ତାହାର ପଇସା ଦେବେ । କେବଳ କଲ୍ ଓ ଏସଏମଏସ୍ ପାଇଁ ଅଲଗା ପ୍ଲାନ କିଣିପାରିବେ । ପୂର୍ବରୁ ଏପରି ନଥିଲା ।

ନୂଆ ନିୟମରେ ମୋବାଇଲ୍ ଡାଟା ବ୍ୟବହାର କରୁ ନଥିବା ଉପଭୋକ୍ତାଙ୍କ ପାଇଁ କଲ୍ ଓ ଏସଏମଏସ୍ ପାଇଁ ସ୍ପେଶାଲ୍ ପ୍ଲାନ୍ ଆଣିବାକୁ ଟେଲିକମ୍ କମ୍ପାନୀଙ୍କୁ ନିର୍ଦ୍ଦେଶ ରହିଛି। ଏହାଦ୍ୱାରା ଡାଟା ବ୍ୟବହାର କରୁ ନଥିବା ବୟସ୍କ ଓ ବିଶେଷ କରି ଗ୍ରାମାଞ୍ଚଳରେ ସ୍ମାର୍ଟଫୋନ୍ ବ୍ୟବହାର ଜାଣି ନଥିବା ମୋବାଇଲ୍ ଉପଭୋକ୍ତା ଫାଇଦା ପାଇବେ। ସେହିପରି ସ୍ପେଶାଲ୍ ରିଚାର୍ଜ କୁପନ୍ ଅବଧିକୁ ୯୦ ଦିନରୁ ବର୍ଷେ ପାଇଁ ବୃଦ୍ଧି କରାଯାଇଛି।