ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଚର୍ଚ୍ଚାରେ ପୂର୍ବତନ ମୁଖ୍ୟମନ୍ତ୍ରୀ

ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହେବୁବା ମୁଫତି ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ କର୍ନାଟକ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କୁ ଚିଠି ଲେଖି ବଢିଚାଲିଥିବା ବହୁସଂଖ୍ୟକବାଦି ରାଜନୈତିକ ପରିବେଶ ମଧ୍ୟରେ ଭାରତୀୟ ସମ୍ବିଧାନର ମୌଳିକ ମୂଲ୍ୟବୋଧ ପାଇଁ ଠିଆ ହେବାକୁ ଅନୁରୋଧ କରିଛନ୍ତି।

ମେହେବୁବା ତାଙ୍କ ବିବୃତ୍ତିରେ ଗତ ଦଶନ୍ଧିରେ ଦେଶରେ ବହୁସଂଖ୍ୟକବାଦର ବଢ଼ୁଥିବା ଲହର ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି। ସେ କହିଥିଲେ ଯେ ଏହି ଧାରା ଭାରତର ବହୁଳତା, ବିବିଧତା ଏବଂ ଧର୍ମନିରପେକ୍ଷତାର ମୌଳିକ ନୀତି ପ୍ରତି ଏକ ଗମ୍ଭୀର ବିପଦ। ସେ କହିଥିଲେ, 'ଯଦିଓ ଅଧିକାଂଶ ନାଗରିକ ଏହି ବିଭାଜନକାରୀ ଏଜେଣ୍ଡାକୁ ପ୍ରତ୍ୟାଖ୍ୟାନ କରିଚାଲିଛନ୍ତି, ଯେଉଁମାନେ ଘୃଣା ଏବଂ ବହିଷ୍କାର ପ୍ରଚାର କରନ୍ତି ସେମାନେ ଏବେ କ୍ଷମତାର ପଦରେ ଅଛନ୍ତି।'

ପିଡିପି ମୁଖ୍ୟ କହିଛନ୍ତି, 'ସେମାନେ ଯୋଜନାବଦ୍ଧ ଭାବରେ ଆମର ସମ୍ବିଧାନ, ଗଣତାନ୍ତ୍ରିକ ପ୍ରତିଷ୍ଠାନ ଏବଂ ଆମ ଦେଶର ଧର୍ମନିରପେକ୍ଷ ଗଠନକୁ ଟାର୍ଗେଟ କରୁଛନ୍ତି।' ସଂଖ୍ୟାଲଘୁ, ବିଶେଷକରି ମୁସଲମାନମାନେ ଏହି କାର୍ଯ୍ୟର ପ୍ରଭାବ ବହନ କରୁଛନ୍ତି - ଏହାର ସଦ୍ୟତମ ଉଦାହରଣ ହେଉଛି ନୂତନ ୱକଫ ଆଇନର ମନମୁଖୀ ପ୍ରୟୋଗ ଯାହା ଆମର ଧାର୍ମିକ ସ୍ବାଧୀନତାକୁ କ୍ଷୁର୍ଣ୍ଣ କରୁଛି।

ମୁଫତି ଆହୁରି କହିଛନ୍ତି ଯେ ଏହି ଘଟଣାଗୁଡ଼ିକ ପୃଥକ ନୁହେଁ ବରଂ ଧାରା ୩୭୦ ରଦ୍ଦ ଏବଂ ଜମ୍ମୁ ଓ କଶ୍ମୀରର ବିଭାଜନ ସମେତ ଅଧିକାରର ପଦ୍ଧତିଗତ କ୍ଷୟର ଏକ ବ୍ୟାପକ ଢାଞ୍ଚାର ଅଂଶ। ତିନି ମୁଖ୍ୟମନ୍ତ୍ରୀଙ୍କୁ ଲେଖିଥିବା ଚିଠିରେ, ସେ ଏପରି ଅନ୍ୟାୟ ବିରୁଦ୍ଧରେ ସେମାନଙ୍କର ନିରନ୍ତର ଏବଂ ସାହସିକ ପ୍ରତିବାଦକୁ ସ୍ବୀକାର କରିଥିଲେ।