ମେଘାଳୟର ଏକ ବେଆଇନ ଖଣିରେ ଭୟଙ୍କର ବିସ୍ଫୋରଣ ୧୬ ଶ୍ରମିକ ମୃତ

ମେଘାଳୟର ଏକ ବେଆଇନ ଖଣିରେ ବିସ୍ଫୋରଣ ଘଟି ୧୬ ଶ୍ରମିକ ମୃତ୍ୟୁବରଣ କରିଛନ୍ତି। ଗୁରୁବାର ସକାଳେ ଥାଙ୍ଗସ୍କୁ ଅଞ୍ଚଳରେ ଘଟିଥିବା ଏହି ଦୁର୍ଘଟଣାରେ ଏବେ ମଧ୍ୟ ଅନେକ ଶ୍ରମିକ ଖଣି ଭିତରେ ଫସି ରହିଥିବା ଆଶଙ୍କା କରାଯାଉଛି। ମେଘାଳୟର DGP ଆଇ. ନୋଙ୍ଗରାଙ୍ଗଙ୍କ ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା ଘଟଣାସ୍ଥଳରୁ ୧୬ଟି ମୃତଦେହ ଉଦ୍ଧାର କରାଯାଇଛି। ବିସ୍ଫୋରଣ ସମୟରେ ଖଣି ଭିତରେ ପ୍ରକୃତରେ କେତେ ଜଣ ଶ୍ରମିକ ଥିଲେ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଦୁର୍ଘଟଣାରେ ଗୁରୁତର ଆହତ ଜଣେ ବ୍ୟକ୍ତିଙ୍କୁ ଶିଲଂର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି।

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ଖଣିଟି ବେଆଇନ ଭାବେ ପରିଚାଳିତ ହେଉଥିଲା। ଖଣି ଖନନ କାର୍ଯ୍ୟ ଚାଲିଥିବା ସମୟରେ ହିଁ ଏହି ବିସ୍ଫୋରଣ ଘଟିଥିଲା। ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ସୂଚନାଯୋଗ୍ୟ ୨୦୧୪ ମସିହାରୁ ନ୍ୟାସନାଲ ଗ୍ରୀନ୍ ଟ୍ରିବ୍ୟୁନାଲ ପରିବେଶ ଏବଂ ସୁରକ୍ଷା ଦୃଷ୍ଟିରୁ ମେଘାଳୟରେ 'ରାଟ୍-ହୋଲ୍' କୋଇଲା ଖଣି ଖନନ ଉପରେ କଟକଣା ଜାରି କରିଛନ୍ତି।

କ'ଣ ଏହି 'ରାଟ୍-ହୋଲ୍' ମାଇନିଂ?

ଏହି ପଦ୍ଧତିରେ ଶ୍ରମିକମାନେ ମାତ୍ର ୩ ରୁ ୪ ଫୁଟ୍ ଉଚ୍ଚତାର ଅତି ସଂକୀର୍ଣ୍ଣ ଗାତ ବା ସୁଡ଼ଙ୍ଗ ଭିତରକୁ ପଶି କୋଇଲା ବାହାର କରିଥାନ୍ତି। ଏହି ସୁଡ଼ଙ୍ଗଗୁଡ଼ିକ ମୂଷା ଗାତ ଭଳି ଦେଖାଯାଉଥିବାରୁ ଏହାକୁ 'ରାଟ୍-ହୋଲ୍' କୁହାଯାଏ। ଏହା ଅତ୍ୟନ୍ତ ବିପଜ୍ଜନକ। ଉଦ୍ଧାର କାର୍ଯ୍ୟ ପାଇଁ SDRF ଏବଂ ଅଗ୍ନିଶମ ବାହିନୀକୁ ନିୟୋଜିତ କରାଯାଇଛି। ମୃତକଙ୍କ ମଧ୍ୟରୁ ଅଧିକାଂଶ ପଡ଼ୋଶୀ ଆସାମର ବୋଲି ସନ୍ଦେହ କରାଯାଉଛି।