Sanjay Singh Bail: ଆପ୍ ନେତା ସଞ୍ଜୟ ସିଂହଙ୍କୁ ସୁପ୍ରିମକୋର୍ଟରୁ ବଡ଼ ଆଶ୍ୱସ୍ତି, ମିଳିଲା ଜାମିନ

Updated: Tuesday, April 2, 2024, 15:47 [IST]

Sanjay Singh Bail: ଆମ୍ ଆଦମୀ ପାର୍ଟି ରାଜ୍ୟସଭା ସାଂସଦ ସଞ୍ଜୟ ସିଂହଙ୍କୁ ସୁପ୍ରିମକୋର୍ଟ ଜାମିନ ପ୍ରଦାନ କରିଛନ୍ତି । ସୁପ୍ରିମକୋର୍ଟ ମଙ୍ଗଳବାର ସଞ୍ଜୟ ସିଂହଙ୍କ ଜାମିନ ଆବେଦନ ଶୁଣାଣି ବେଳେ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି) କୁ ଅନେକ ପ୍ରଶ୍ନ ପଚାରିଥିଲେ। ସୁପ୍ରିମକୋର୍ଟ ଇଡିକୁ ପ୍ରଶ୍ନ କରିଥିଲେ, ସଞ୍ଜୟ ସିଂହ ୬ ମାସ ହେବ ଜେଲରେ ଅଛନ୍ତି ଏବଂ ତାଙ୍କଠାରୁ ଏପର୍ଯ୍ୟନ୍ତ କିଛି ଟଙ୍କା ମିଳିନାହିଁ । ତେବେ ଏବେ ଇଡି ତାଙ୍କୁ ଜେଲରେ ରଖିବା ପାଇଁ ଚାହୁଁଛି କି ? ତାଙ୍କୁ ଜେଲରେ ରଖିବା କାହିଁକି ଆବଶ୍ୟକ ରହିଛି ।

ସୂଚନା ଅନୁସାରେ, ଦିଲ୍ଲା ମଦ ଦୁର୍ନୀତି ମାମଲାରେ ଗତ ବର୍ଷ ଅକ୍ଟୋବର ମାସରେ ଆପ୍ ସାଂସଦ ସଞ୍ଜୟ ସିଂହ ଗିରଫ ହୋଇଥିଲେ । ଆଜି ଆବଶ୍ୟକ ସର୍ତ୍ତାବଳୀ ସହିତ ତଳ କୋର୍ଟ ତାଙ୍କୁ ଜାମିନ ପ୍ରଦାନ କରିବେ ବୋଲି ସୁପ୍ରିମକୋର୍ଟ କହିଛନ୍ତି । ସେହିପରି ସୁପ୍ରିମକୋର୍ଟରେ ତାଙ୍କ ଜାମିନ ଆବେଦନର ଶୁଣାଣି ବେଳେ ଇଡି ପକ୍ଷରୁ କୌଣସି ପ୍ରତିବାଦ କରାଯାଇ ନଥିଲା ।

ଅନ୍ୟପଟେ ମଦ ଦୁର୍ନୀତି ମାମଲାରେ କେଜ୍ରିୱାଲଙ୍କ ଗିରଫ ପରେ ଦଳକୁ ଝଟକା ଲାଗିଥିଲା, ହେଲେ ଏବେ ୨୦୨୪ ସାଧାରଣ ନିର୍ବାଚନ ପୂର୍ବରୁ ଦଳର ବରିଷ୍ଠ ନେତା ସଞ୍ଜୟ ସିଂହଙ୍କୁ ଜାମିନ୍ ମିଳିବା ଦଳର ମନୋବଳ ନିଶ୍ଚୟ ବଢିଥିବ ବୋଲି ଚର୍ଚ୍ଚା ହେଉଛି ।