କୋଟାରେ ପୁଣି ଜୀବନ ହାରିଲେ ଛାତ୍ରୀ: ଗତବର୍ଷ ଏହି ସ୍ଥାନରେ ୧୫ ଜଣ କରିଥିଲେ ଆତ୍ମହତ୍ୟା

Published: Wednesday, September 13, 2023, 13:53 [IST]

Kota Breaking: କୋଟାରେ ଥମୁନି ଆତ୍ମହତ୍ୟା ଧାରା । ପୁଣି ଗଲା ଜଣେ ମେଧାମୀ ଛାତ୍ରୀଙ୍କ ଜୀବନ । ମୃତକ ଛାତ୍ରୀଙ୍କୁ ମାତ୍ର ୧୬ ବର୍ଷ ବୟସ ହୋଇଥିଲା । ସେ ୫ ମାସ ତଳୁ ବିବାହର ଝାରଖଣ୍ତରୁ କୋଚିଂ ନେବା ପାଇଁ ଏଠାକୁ ଆସିଥିଲେ । ସେ ନିଟ୍ ପାଇଁ ପ୍ରସ୍ତୁତ ହେଉଥିବା ନେଇ ସୂଚନା ରହିଛି । ଗର୍ଲସ ହଷ୍ଟେଲରୁ ତାଙ୍କର ମୃତ ଦେବ ଉଦ୍ଧାର କରାଯାଇଛି ।

ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ, ଛାତ୍ରୀ ଜଣକ ରାଞ୍ଚିରୁ କୋଟ କୋଚିଂ ନେବା ପାଇଁ ଆସିଥିଲେ । ସେ ଇଲେକ୍ଟ୍ରୋନିକ୍ସ କମ୍ପେକ୍ଲ ସ୍ଥିତ ହଷ୍ଟେଲରେ ରହୁଥିଲେ । ହେଲେ ଗତକାଲି ସନ୍ଧ୍ୟାରେ ସେ ଘରୁ ବାହାରି ନଥିଲେ । ଦୀର୍ଘ ସମୟ ପର୍ଯ୍ୟନ୍ତ ତାଙ୍କ ରୁମ୍ କମାଟ ଭିତରୁ ବନ୍ଦ ରହିଥିଲା । ପରବର୍ତ୍ତୀ ସମୟରେ ପୋଲିସକୁ ସୂଚନା ଦିଆଯାଇଥିଲା ଏବଂ ତାଙ୍କ ରୁମ କମାଟ୍ ଭାଙ୍ଗି ପରେ ଜଣାପଡିଥିଲା ଯେ, ଛାତ୍ରୀ ଜଣ ଫାଶି ଲଗାଇ ଆତ୍ମହତ୍ୟା କରିଛନ୍ତି । ପୋଲିସ ଘଟଣାର ଯାଞ୍ଚ୍ ଆରମ୍ଭ କରିଛି ଏବଂ ଶବ ବ୍ୟବଚ୍ଛେଦ ପାଇଁ ପଠାଇଛି ।

ସୂଚନା ଅନୁସାରେ, ଚଳିତ ବର୍ଷ କୋଟାରେ ୨୪ ଜଣ ଛାତ୍ରଛାତ୍ରୀ ଆତ୍ମହତ୍ୟା କଲେଣି । କୋଟାରେ ବଢୁଥିବା ଆତ୍ମହତ୍ୟା ଘଟଣା ଏବେ ଚିନ୍ତାର ବିଷୟ ପାଲଟିଛି । ତେବେ ଆତ୍ମହତ୍ୟା ରୋକିବା ପାଇଁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଏକ ରାଜ୍ୟ ସ୍ତରୀୟ କମିଟି ଗଠନ କରାଯାଇଛି । ହେଲେ ଆତ୍ମହତ୍ୟା ସଂଖ୍ୟା ଦିନକୁ ଦିନ ବଢିବାରେ ଲାଗିଛି ।

ସୂଚନାଥାଉ ଯେ, ୨୦୧୫ ରେ ୧୮ ଜଣ ଛାତ୍ର ଆତ୍ମହତ୍ୟା କରିଥିବା ବେଳେ, ୨୦୧୬ରେ ୧୭ ଜଣ, ୧୦୧୮ରେ ୨୦ ଜଣ, ୨୦୧୯ରେ ୧୮ ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଥିଲେ ଏବଂ ୨୦୨୨ରେ ୧୫ ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଥିଲେ । ତେବେ ୨୦୨୦ ଏବଂ ୨୧ରେ କରୋନା ପାଇଁ କୋଚିଂ ସେଣ୍ଟର ବନ୍ଦ ଥିଲା ଯେଉଁଥି ପାଇଁ କୌଣସି ଆତ୍ମହତ୍ୟା ମାମଲା ରେଜିଷ୍ଟର ହୋଇ ନାହିଁ । ତେବେ ବଢୁଥିବା ଆତ୍ମହତ୍ୟାର କାରଣ ଏବେ ବି ସ୍ପଷ୍ଟ ହୋଇପାରୁ ନାହିଁ ।

Published On September 13, 2023