ପୀଡିତା ରାତି ୨.୪୫ ପର୍ଯ୍ୟନ୍ତ ଜୀବିତ ଥିଲେ, ତାଙ୍କ ସମ୍ପର୍କୀୟଙ୍କୁ ପଠାଇଥିଲେ ମେସେଜ.... ସେହି କାଳ ରାତିର ପୂରା କାହାଣୀ

କୋଲକାତା: କୋଲକାତା ହସ୍ପିଟାଲରେ ଜଣେ ମହିଳା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା ଘଟଣାରେ ଆଉ ଏକ ତଥ୍ୟ ଏବେ ସାମ୍ନାକୁ ଆସିଛି। ସୂଚନାନୁସାରେ, ପୀଡିତା ଡାକ୍ତର ଅଗଷ୍ଟ ୯ ରେ ରାତି ୨ଟା ୪୫ ପର୍ଯ୍ୟନ୍ତ ଜୀବିତ ଥିଲେ। ଏଜେନ୍ସିଗୁଡ଼ିକ ସହିତ ଉପଲବ୍ଧ ବୈଷୟିକ ପ୍ରମାଣ ଦ୍ୱାରା ଏହା ସ୍ପଷ୍ଟ ହୋଇଛି । ପ୍ରକୃତରେ, ସେହି ରାତିରେ ପୀଡିତାଙ୍କ ସମ୍ପର୍କୀୟ ତାଙ୍କୁ ଏକ ମେସେଜ ପଠାଇଥିଲେ, ଯାହାକୁ ପୀଡିତା ରାତି ପ୍ରାୟ ୨: ୪୫ ରେ ଉତ୍ତର ଦେଇଥିଲେ। ବୈଷୟିକ ପ୍ରମାଣ ଅନୁଯାୟୀ, ସେହି ସମୟରେ ପୀଡ଼ିତାଙ୍କ ମୋବାଇଲ୍ ଫୋନରୁ ଏକ ମେସେଜ୍ ପଠାଯାଇଥିଲା, ଯାହା ସୂଚାଏ ଯେ ସେ ଜୀବିତ ଥିଲେ । ଏଜେନ୍ସିମାନେ ଏହି ମେସେଜକୁ ଏକ ତ୍ତ୍ୱପୂର୍ଣ୍ଣ ସୂତ୍ର ଭାବରେ ବିବେଚନା କରିଛନ୍ତି, ଯାହା ପୀଡିତାର ଶେଷ ମୁହୂର୍ତ୍ତ ବିଷୟରେ ସୂଚନା ପ୍ରଦାନ କରିପାରିବ ।

ପୀଡିତା ହିଁ ବାର୍ତ୍ତା ପଠାଇଥିଲେ କି?

ଏହା ବ୍ୟତୀତ ସୂତ୍ରରୁ ପ୍ରକାଶ ଯେ ଏହି ବାର୍ତ୍ତା ପୀଡିତା ନିଜେ ପଠାଇଛନ୍ତି ନା ଅନ୍ୟ କେହି ତାଙ୍କ ଫୋନ୍ ବ୍ୟବହାର କରିଛନ୍ତି ତାହା ଏଜେନ୍ସିଗୁଡ଼ିକ ମଧ୍ୟ ଅନୁସନ୍ଧାନ କରୁଛନ୍ତି। ତେବେ ପ୍ରାଥମିକ ଅନୁସନ୍ଧାନରେ ଏହା ସ୍ପଷ୍ଟ ହୋଇଛି ଯେ ମେସେଜ କେବଳ ତାଙ୍କ ଫୋନରୁ ପଠାଯାଇଛି। ଏହି ପରିପ୍ରେକ୍ଷୀରେ, ବୈଷୟିକ ପ୍ରମାଣ ଏଜେନ୍ସିଗୁଡିକ ଦ୍ୱାରା ପୁଙ୍ଖାନୁପୁଙ୍ଖ ଅନୁସନ୍ଧାନ କରାଯାଉଛି ଯାହା ଦ୍ୱାରା ଘଟଣାର ପ୍ରକୃତ ସମୟ ସୀମା ଏବଂ ପରିସ୍ଥିତି ଜାଣିହେବ। ଏହି ପ୍ରମାଣକୁ ଭିତ୍ତିକରି, ଏଜେନ୍ସିଗୁଡ଼ିକ ବର୍ତ୍ତମାନ ଅଧିକ ଯାଞ୍ଚ କରୁଛନ୍ତି । ଯେଉଁଥିରେ ଏହି ବାର୍ତ୍ତା ସମୟରେ ଏବଂ ପରେ କାର୍ଯ୍ୟକଳାପ ବିଶ୍ଳେଷଣ କରାଯାଉଛି ।

ଅନ୍ୟପକ୍ଷରେ, ୯ ଅଗଷ୍ଟ ରାତିରେ ଘଟିଥିବା ଏହି ଦୁଖଦ ଘଟଣା ପରେ ସଞ୍ଜୟ ରୟଙ୍କୁ ଗିରଫ ଓ ପଚରାଉଚରା ବେଳେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରକାଶ ପାଇଛି। ଏହି ଘଟଣା ପରେ ସଞ୍ଜୟ ରୟ ଯାହା କହିଥିଲେ ତାହା ଅନେକ ପ୍ରଶ୍ନରେ ପୋଲିସକୁ ଜଡ଼ିତ କରିଦେଇଛି। ଦୁଷ୍କର୍ମ ଓ ହତ୍ୟା ଘଟଣାରେ ପୁଲିସ୍ ତା'କୁ ଖୋଜୁଛି ବୋଲି ସଞ୍ଜୟ ଜାଣିବାକୁ ପାଇଥିଲେ ହେଁ ଆଦୌ ବିଚଳିତ ହୋଇ ନଥିଲା। ବରଂ ସେ ବେଶ ଆରାମରେ ମଦ ପିଇ ଚାଲିଥିଲା। ଖାଦ୍ୟ ବି ଖାଇ ନଥିଲା। ଅଗଷ୍ଟ ୮ ତାରିଖରୁ ଗିରଫ ହେବା ଯାଏ ସେ କେବଳ ପିଇଥିଲା ବୋଲି ଜଣାପଡ଼ିଛି।

ଅଗଷ୍ଟ ୯ରେ ମହିଳା ଡାକ୍ତରଙ୍କ କ୍ଷତାକ୍ତ ମୃତଦେହ ପୁଲିସ୍ ଆରଜି କର ମେଡିକାଲ କଲେଜ ଓ ହସ୍ପିଟାଲରୁ ଉଦ୍ଧାର କରିଥିଲା। ଏହାପରେ କୋଲକାତା ପୁଲିସ୍‌ରେ ସିଭିକ ସ୍ୱେଚ୍ଛାସେବୀ ଭାବେ କାମ କରୁଥିବା ସଞ୍ଜୟକୁ ପୁଲିସ ୧୦ ତାରିଖରେ ଗିରଫ କରିଥିଲା। ପ୍ରାରମ୍ଭିକ ଜେରା ବେଳେ ସଞ୍ଜୟ ନିୟମିତ ମଦ ପିଉଥିଲା ଓ ଅପରାଧ ବେଳେ ସେ ନିଶାରେ ଥିଲା ବୋଲି ସ୍ୱୀକାର କରିଥିଲା।

ଅଗଷ୍ଟ ୧୦ରେ ପୁଲିସ୍ ଅଗଷ୍ଟ ୯ର ସିସିଟିଭି ସ୍କାନ କରିଥିଲା। ଅପରାଧ ଘଟିଥିବା ସେମିନାର ହଲ ସିସିଟିଭି ଫୁଟେଜ ଆଧାରରେ ପୁଲିସ୍ ସଞ୍ଜୟ ସମେତ ୧୫ ଜଣଙ୍କୁ ଚିହ୍ନଟ କରିଥିଲେ। ସଞ୍ଜୟର ସାଙ୍ଗ ସୌରଭର ଭାଇ ହସ୍ପିଟାଲରେ ଆଡମିଟ ହୋଇଥିଲା। ସଞ୍ଜୟକୁ ସେ ହିଁ ଚିହ୍ନଟ କରିଥିଲେ। ଅପରାଧ ଘଟାଇବା ପରେ ସଞ୍ଜୟ କୋଲକାତା ଆର୍ମଡ ପୁଲିସର ୪ର୍ଥ ବାଟାଲିୟନ ବାରାକକୁ ଯାଇଥିଲା। ସେଠାରେ ସବ ଇନସପେକ୍ଟର ଅନୂପ ଦତ୍ତା ତା' ପାଇଁ ରହିବାର ବ୍ୟବସ୍ଥା କରିଥିଲା। ଅଗଷ୍ଟ ୧୦ରେ ସେ ଯେତେବେଳେ ଉଠିଲା ସେତେବେଳେ ପୁଣି ମଦ ପିଇଥିଲା। ମଦ ପିଇବା ପରେ ସେ ଶୋଇ ପଡ଼ିଥିଲା।

ମଧ୍ୟାହ୍ନ ସମୟରେ ତା'ର ବନ୍ଧୁ ସୌରଭ ଫୋନ କରି ଲଞ୍ଚ କରିବାକୁ ଡାକିଥିଲା। ଘଟଣା ଦିନ ରାତିରେ ସୌରଭକୁ ନେଇ ସଞ୍ଜୟ ରେଡ ଲାଇଟ ଅଞ୍ଚଳକୁ ଯାଇଥିଲା। ଅଗଷ୍ଟ ୧୦ ତାରିଖରେ ସୌରଭ ପ୍ରଥମେ ସଞ୍ଜୟକୁ ଆରଜି କର ହସ୍ପିଟାଲ ଘଟଣା ସମ୍ପର୍କରେ ଜଣାଇଥିଲେ। ଏଥିସହ ପୁଲିସ୍ ତା'କୁ ଖୋଜୁଛି ବୋଲି କହିଥିଲେ। ପୁଲିସ୍ ଖୋଜୁ ଥିଲେ ହେଁ ସଞ୍ଜୟ ଆଦୌ ବିଚଳିତ ହୋଇ ନଥିଲା। ଏକଥା ଶୁଣିବା ପରେ ସେ ଖାଇ ନଥିଲା। ମୁଁ ପରେ ଦେଖା ହେଉଛି କହି ବାରାକ ଭିତରକୁ ଚାଲି ଯାଇଥିଲା। ସେଠାରେ ସେ ବେଶ ଆରାମରେ ବଶି ପୁଣି ମଦ ପିଇଥିଲା।

ସଞ୍ଜୟକୁ ଖୋଜୁ ଥିବା ପୁଲିସ୍ ଟିମ ବାରାକରେ ପହଞ୍ଚି ତା'କୁ ଗିରଫ କରିଥିଲା। ଏହି ସମୟରେ ସେ ପ୍ରବଳ ନିଶାରେ ରହିଥିଲା। ମେଡିକାଲ ଟେଷ୍ଟରୁ ସ୍ପଷ୍ଟ ହୋଇଛି ଯେ ସଞ୍ଜୟର ହାତ, ପିଠି ଓ ଜଙ୍ଘରେ ଆମ୍ପୁଡା ଦାଗ ରହିଛି। ଘଟଣା ବେଳେ ମହିଳା ଡାକ୍ତର ଜଣଙ୍କ ସଂଘର୍ଷ କରିଥିଲେ ବୋଲି ସଞ୍ଜୟର କ୍ଷତ ଚିହ୍ନରୁ ସ୍ପଷ୍ଟ ହେଉଛି।

ଗିରଫ ପରେ ସିସିଟିଭିରୁ ଚିହ୍ନଟ ହୋଇଥିବା ସଞ୍ଜୟ ସମେତ ୧୫ ଅଭିଯୁକ୍ତଙ୍କୁ ଧରି ପୁଲିସ୍ ହସ୍ପିଟାଲରେ ପହଞ୍ଚିଥିଲା। ଜେରା ବେଳେ ପୁଲିସ୍ ସମସ୍ତଙ୍କର ମୋବାଇଲ ଫୋନ ଜବତ କରି ନେଇଥିଲା। ଟ୍ରେନି ଡାକ୍ତରଙ୍କ ମୃତଦେହ ନିକଟକରୁ ପୁଲିସ୍ ଗୋଟିଏ ଛିଣ୍ଡା ବ୍ଲୁଥୁଟ ହ୍ୟାଣ୍ଡସେଟ୍ ପାଇଥିଲା। ସିସିଟିଭି ଫୁଟେଜରୁ ମଧ୍ୟ ଜଣାପଡ଼ିଥିଲା ଯେ ସେମିନାର ରୁମକୁ ସଞ୍ଜୟ ଭୋର ୪ଟାରେ ବ୍ଲୁଥୁଟ ହ୍ୟାଣ୍ଡସେଟ୍ ସହ ଯାଇଥିଲା। କିନ୍ତୁ ୪୦ ମିନିଟ ପରେ ସେ ବିଲଡିଂରୁ ବାହାରିବା ବେଳେ ତା' ବେକରେ ଉକ୍ତ ବ୍ଲୁଥୁଟ ହ୍ୟାଣ୍ଡସେଟ୍ ନଥିଲା।

ଉକ୍ତ ବ୍ଲୁଥୁଟ ହ୍ୟାଣ୍ଡସେଟ୍‌କୁ ପୁଲିସ୍ ସଞ୍ଜୟର ମୋବାଇଲ ସହ ଯୋଡ଼ିବାରୁ ଏହା ଆପେଆପେ କନେକ୍ଟ ହୋଇଯାଇଥିଲା। ସେ ହିଁ ୩୧ ବର୍ଷୀୟ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା କରିଥିବା ପୁଲିସ ନିଶ୍ଚିତ ହୋଇଥିଲା। ସଞ୍ଜୟ ମଧ୍ୟ ଜେରା ବେଳେ କାନ୍ଦି କାନ୍ଦି ନିଜ ଅପରାଧକୁ ସ୍ୱୀକାର କରିଥିଲା। ଏଥିସହ ଫାଶୀ ଖୁଣ୍ଟରେ ଝୁଲାଇ ଦେବାକୁ କହିଥିଲା।