ଜାଣନ୍ତୁ, ନୂଆ ସଂସଦ ଭବନ କାର୍ଯ୍ୟକ୍ଷମ ହେବା ପରେ ପୁରୁଣା ସଂସଦ ଭବନରେ କଣ ହେବ ?

ନୂଆଦିଲ୍ଲୀ: ଆଜି ଅର୍ଥାତ ସେପ୍ଟେମ୍ବର 18 ରେ ପୁରୁଣା ସଂସଦ ଭବନରେ କାର୍ଯ୍ୟ ଶେଷ ହୋଇଛି । ଆସନ୍ତାକାଲିଠୁ (ସେପ୍ଟେମ୍ବର 19) ରୁ ସଂସଦର ପ୍ରକ୍ରିୟା ନୂତନ ବିଲ୍ଡିଂକୁ ସ୍ଥାନାନ୍ତରିତ ହେବ । ଆସନ୍ତାକାଲି ଠାରୁ ସଂସଦର ନୂଆ ବିଲଡିଂରେ ସାଂସଦମାନେ ବସିବେ । ଉଭୟ ଲୋକସଭା ଓ ରାଜ୍ୟସଭାର ସ୍ୱତନ୍ତ୍ର ଅଧିବେଶନ କାଲି ଠାରୁ 22 ତାରିଖ ଯାଏ ନୂଆ ବିଲଡିଂରେ ଚାଲିବ ।

ଏବେ ପ୍ରଶ୍ନ ଉଠୁଛି ନୂଆ ସଂସଦ ଭବନ କାର୍ଯ୍ୟକ୍ଷମ ହେବା ପରେ ପୁରୁଣା ସଂସଦ ଭବନରେ କଣ ହେବ ?

ସରକାରୀ ସୂତ୍ର ଅନୁସାରେ, ସଂସଦର ପୁରୁଣା ବିଲଡିଂକୁ ଆଦୌ ଭଙ୍ଗା ଯିବ ନାହିଁ । ଏହାକୁ ନବୀକରଣ କରାଯାଇ ସଂସଦୀୟ କାର୍ଯ୍ୟକ୍ରମ ପାଇଁ ପ୍ରସ୍ତୁତ କରାଯିବ । ଏହା ଦେଶର ଗୋଟିଏ ଐତିହ୍ୟ ସମ୍ପତ୍ତି ହୋଇଥିବାରୁ ସରକାର ଏହାର ସଂରକ୍ଷଣ କରିବେ ।

2021ରେ ତତ୍କାଳୀନ ସହରୀ ବିକାଶ ମନ୍ତ୍ରୀ ହରଦୀପ ସିଂହ ପୁରୀ ରାଜ୍ୟସଭାରେ କହିଥିଲେ ଯେ ପୁରୁଣା ବିଲଡିଂର ମରାମତି କରାଯିବ ଓ ଏହାକୁ ଅଲଗା କାର୍ଯ୍ୟକ୍ରମ ପାଇଁ ପ୍ରସ୍ତୁତ କରାଯିବ ।

ଜାତୀୟ ସ୍ମୃତିଗୁଡ଼ିକୁ ନୂଆ ବିଲଡିଂକୁ ସ୍ଥାନାନ୍ତର କରାଯିବ। ଫଳରେ ପୁରୁଣା ବିଲଡିଂରେ ଅଧିକ ସ୍ଥାନ ବିଭିନ୍ନ କାର୍ଯ୍ୟକ୍ରମ ପାଇଁ ଖାଲି ହୋଇ ରହିବ । ଦରକାର ପଡ଼ିଲେ ପୁରୁଣା ବିଲଡିଂକୁ ଗୋଟିଏ ସଂଗ୍ରହାଳୟରେ ମଧ୍ୟ ପ୍ରସ୍ତୁତ କରାଯାଇ ପାରେ ।

ନୂଆ ବିଲଡିଂ

ଚଳିତ ବର୍ଷ ମେ' ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦର ନୂଆ ବିଲଡିଂକୁ ଉଦଘାଟନ କରିଥିଲେ । ଲୋକସଭା ଚ୍ୟାମ୍ବରରେ ଏକାଥରେ 800 ଓ ରାଜ୍ୟସଭାରେ 300 ଜଣ ବସି ପାରିବେ । ଲୋକସଭା ଚ୍ୟାମ୍ବରରେ ଯୁଗ୍ମ ଅଧିବେଶନ ପାଇଁ 1280 ଜଣ ସାଂସଦ ବସିବାର ବ୍ୟବସ୍ଥା ମଧ୍ୟ କରାଯାଇ ପାରିବ ।

ତ୍ରିକୋଣ ଆକାରରେ ପ୍ରସ୍ତୁତ ଏହି ଭବ୍ୟ ବିଲଡିଂଟି ୬୪,୫୦୦ ବର୍ଗ ମିଟର ଅଞ୍ଚଳରେ ରହିଛି । ଜ୍ଞାନ ଦ୍ୱାର, ଶକ୍ତି ଦ୍ୱାର ଓ କର୍ମ ଦ୍ୱାର ନାଁରେ ୩ଟି ପ୍ରବେଶ ପଥ ଏଠାରେ ଅଛି । ସେହିପରି ଭିଆଇପି, ସାଂସଦ ଓ ଅତିଥିଙ୍କ ପାଇଁ ମଧ୍ୟ ସ୍ୱତନ୍ତ୍ର ଦ୍ୱାରର ବ୍ୟବସ୍ଥା ହୋଇଛି ।

English summary

Know What will Happen to Old Parliament Building ?