କଙ୍ଗନାଙ୍କର ବଡ଼ ଦାବି, ମାସିକୁ ଆସୁଛି ୧ ଲକ୍ଷ ଟଙ୍କା ବିଦ୍ୟୁତ୍ ବିଲ୍ !

Kangana Ranaut: କଙ୍ଗନା ରଣାୱତଙ୍କର ମାସିକ ବିଦ୍ୟୁତ୍ ବିଲ୍ ୧ ଲକ୍ଷ ଟଙ୍କା ଆସୁଛି, ତାହା ବି ସେହି ଘରେ ଯେଉଁଠି ସେ ରହୁ ନାହାଁନ୍ତି । ଏନେଇ କଙ୍ଗନା ନିଜେ ସୂଚନା ଦେଇଛନ୍ତି । ବିଜେପି ସାଂସଦଙ୍କ ଏହି ଦାବି ପରେ ରାଜନୈତିକ ମାହୋଲରେ ଚର୍ଚ୍ଚା ଆରମ୍ଭ ଜୋର ଧରିଛି । ଯାହାକୁ ନେଇ ବର୍ତ୍ତମାନ ହିମାଚଳ ପ୍ରଦେଶ ରାଜ୍ୟ ବିଦ୍ୟୁତ୍ ବୋର୍ଡ ଲିମିଟେଡ୍ (HPSEBL) ବଲିଉଡ୍ ଅଭିନେତ୍ରୀ ଏବଂ ସାଂସଦଙ୍କ ଏହି ଦାବିକୁ ପ୍ରତ୍ୟାଖ୍ୟାନ କରି ପ୍ରତିକ୍ରିୟା କରି ଦେଇଛନ୍ତି ।

HPSEBL କଙ୍ଗନାଙ୍କ ଏହି ଦାବିକୁ ଖାରଜ କରିଦେଇଛି ଯେ ମନାଲିରେ ଥିବା ତାଙ୍କ 'ଖାଲି' ଘରକୁ ୧ ଲକ୍ଷ ଟଙ୍କାର ବିଦ୍ୟୁତ୍ ବିଲ୍ ଆସିଛି। HPSEBL କହିଛି ଯେ ଜାନୁଆରୀ ଏବଂ ଫେବୃଆରୀ ମାସର ମିଳିତ ବିଲ୍ ୯୦,୩୮୪ ଟଙ୍କା ଆସିଛି। ଲୋକସଭା ସଦସ୍ୟ କଙ୍ଗନା ରାଣାୱତ ବୁଧବାର ଦିନ ମଣ୍ଡି ସଂସଦୀୟ କ୍ଷେତ୍ର ଗସ୍ତରେ ଥିଲେ। ଏହି ସମୟରେ, ଜନସାଧାରଣଙ୍କ ସହ କଥାବାର୍ତ୍ତା କରିବା ସମୟରେ, ସେ ତାଙ୍କର 'ବର୍ଦ୍ଧିତ ବିଦ୍ୟୁତ୍ ବିଲ୍' ବିଷୟରେ ଉଲ୍ଲେଖ କରିଥିଲେ। ଏହା ସହିତ ହିମାଚଳର ସୁଖବିନ୍ଦର ସିଂହ ସୁଖୁ ସରକାରଙ୍କୁ ଟାର୍ଗେଟ କରାଯାଇଥିଲା। କଙ୍ଗନା ରାଣାୱତଙ୍କ ଏହି ଦାବିର ଭିଡିଓ ସୋସିଆଲ ମିଡିଆରେ ଅଧିକ ଭାଇରାଲ ହେବାରେ ଲାଗିଛି ।

ଭିଡିଓରେ କଙ୍ଗନା ରଣାୱତ କହିଛନ୍ତି, "ମୁଁ ମନାଲିରେ ମୋ ଘର ପାଇଁ ଗୋଟିଏ ମାସର ୧ ଲକ୍ଷ ଟଙ୍କାର ବିଦ୍ୟୁତ୍ ବିଲ୍ ପାଇଛି। ମୁଁ ସେଠାରେ ରହେ ନାହିଁ। ଏହା କେତେ ଖରାପ ପରିସ୍ଥିତି । କଙ୍ଗନାଙ୍କ ଦାବିକୁ "ସମ୍ପୂର୍ଣ୍ଣ ମିଥ୍ୟା ଏବଂ ଭ୍ରାମକ" ବୋଲି ଦର୍ଶାଇ HPSEBL କହିଛି ଯେ ୯୦,୩୮୪ ଟଙ୍କାର ବିଲ୍ ଦୁଇ ମାସ (ଜାନୁଆରୀ ଏବଂ ଫେବୃଆରୀ 2025) ପାଇଁ ଥିଲା, ଯେଉଁଥିରେ ପୂର୍ବ ବକେୟା ୩୨,୨୮୭ ଟଙ୍କା ମଧ୍ୟ ଅନ୍ତର୍ଭୁକ୍ତ ଥିଲା।

ନ୍ୟୁଜ୍ ଏଜେନ୍ସି ପିଟିଆଇର ରିପୋର୍ଟ ଅନୁଯାୟୀ, HPSEBL ଏହା ମଧ୍ୟ କହିଛି ଯେ କଙ୍ଗନା ରାଣାୱତ ଅକ୍ଟୋବରରୁ ଡିସେମ୍ବର ପର୍ଯ୍ୟନ୍ତ ତାଙ୍କର ବିଲ୍ ଠିକ୍ ସମୟରେ ଦେଇ ନଥିଲେ। କଙ୍ଗନାଙ୍କ ବାସଭବନର ଅକ୍ଟୋବର, ନଭେମ୍ବର ଏବଂ ଡିସେମ୍ବର ୨୦୨୪ ପାଇଁ ମୋଟ ବିଦ୍ୟୁତ୍ ବିଲ୍ ୮୨,୦୬୧ ଟଙ୍କା ଥିଲା ।