୧୪ ଦିନ ବଢ଼ିଲା କେଜ୍ରିୱାଲ ଏବଂ କବିତାଙ୍କ ନ୍ୟାୟିକ ହେପାଜତ , ଦିଲ୍ଲୀ ସିଏମ ତିହାରରେ ରହିବ ମେ ୭ ପର୍ଯ୍ୟନ୍ତ

Published: Tuesday, April 23, 2024, 14:59 [IST]

ନୂଆଦିଲ୍ଲୀ: ଦିଲ୍ଲୀର ରାଉସ ଆଭେନ୍ୟୁ କୋର୍ଟ ଆମ ଆଦମୀ ପାର୍ଟି (ଆପ୍‌) ମୁଖ୍ୟ ଅରବିନ୍ଦ କେଜ୍ରିୱାଲ, ଭାରତ ରାଷ୍ଟ୍ର ସମିତି (ବିଆରଏସ) ନେତା କେ କବିତା ଏବଂ ଚାନପ୍ରୀତ ସିଂଙ୍କ ନ୍ୟାୟିକ ହେପାଜତ ଆସନ୍ତା ମେ ୭ ପର୍ଯ୍ୟନ୍ତ ବୃଦ୍ଧି କରାଯାଇଛି । ଦିଲ୍ଲୀ ମଦ ନିତି ଦୁର୍ନିତ ମାମଲାରେ ଏହି ତିନିଜଣଙ୍କ ହେପାଜତକୁ ୧୪ ଦିନ ବୃଦ୍ଧି କରାଯାଇଛି । ଏହି ପରିପ୍ରେକ୍ଷୀରେ ଦିଲ୍ଲୀ ସିଏମ ଅରବିନ୍ଦ କେଜ୍ରିୱାଲ ବର୍ତ୍ତମାନ ତିହାର ଜେଲରେ ରହିବାକୁ ଯାଉଛନ୍ତି । କବିତାଙ୍କୁ ତିହାର ଜେଲରେ ମଧ୍ୟ ରଖାଯାଇଛି ।

ଦିଲ୍ଲୀ ମଦ ନତି ସହ ଜଡିତ ସିବିଆଇ ମାମଲାରେ ରାଉଜ ଆଭେନ୍ୟୁ କୋର୍ଟ କବିତାଙ୍କ ନ୍ୟାୟିକ ହେପାଜତକୁ ବୃଦ୍ଧି କରିଛନ୍ତି । କେଜ୍ରିୱାଲ, କବିତା ଏବଂ ଚାନପ୍ରୀତଙ୍କୁ ଭିଡିଓ କନଫରେନ୍ସ ମାଧ୍ୟମରେ କୋର୍ଟରେ ହାଜର କରାଯାଇଥିଲା । ଗତ ମାସରେ ମାର୍ଚ୍ଚ ୨୧ ରେ ଅରବିନ୍ଦ କେଜ୍ରିୱାଲଙ୍କୁ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଗିରଫ କରିଥିଲା । ସେହିଭଳି କେଜ୍ରିୱାଲ ଗିରଫ ହେବାର ପ୍ରାୟ ଏକ ସପ୍ତାହ ପୂର୍ବରୁ ଇଡି ମାର୍ଚ୍ଚ ୧୫ ରେ ହାଇଦ୍ରାବାଦରୁ କବିତାଙ୍କୁ ଗିରଫ କରିଥିଲା । ଚାନପ୍ରୀତଙ୍କୁ ୧୫ ଏପ୍ରିଲରେ ଗିରଫ କରାଯାଇଥିଲା ।

ଏଥି ସହିତ ନ୍ୟାୟିକ ହେପାଜତ ବୃଦ୍ଧି କରିବାର ନିଷ୍ପତ୍ତି ଏପରି ଏକ ସମୟରେ ଆସିଛି ଯେତେବେଳେ ଆମ୍ ଆଦମୀ ପାର୍ଟି ମୁଖ୍ୟଙ୍କ ଆବେଦନକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି । ଏଥିରେ କେଜ୍ରିୱାଲ ତାଙ୍କ ପତ୍ନୀ ସୁନୀତା କେଜ୍ରିୱାଲଙ୍କ ଉପସ୍ଥିତିରେ ଦୈନିକ୧୫ ମିନିଟ ପାଇଁ ଡାକ୍ତରଙ୍କ ସହ ପରାମର୍ଶ ନେବାକୁ ଅନୁମତି ଦେବାକୁ କହିଥିଲେ । ତେବେ କେଜ୍ରିୱାଲଙ୍କୁ ଆବଶ୍ୟକ ଚିକିତ୍ସା ଦିଆଯିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।

କୋର୍ଟ ଏହା ମଧ୍ୟ କହିଛନ୍ତି ଯେ ତିହାର ଜେଲ କର୍ତ୍ତୃପକ୍ଷ ଏମସ୍ ନିର୍ଦ୍ଦେଶକଙ୍କ ଦ୍ୱାରା ଗଠିତ ଏକ ମେଡିକାଲ ବୋର୍ଡ ନିଯୁକ୍ତ କରିବେ, ଯେଉଁଥିରେ ଜଣେ ଏଣ୍ଡୋକ୍ରାଇନୋଲୋଜିଷ୍ଟ ଏବଂ ମଧୁମେହ ବିଶେଷଜ୍ଞ ମଧ୍ୟ ସାମିଲ ହେବେ । କେଜ୍ରିୱାଲଙ୍କ ରକ୍ତରେ ଥିବା ଗ୍ଲୁକୋଜ ସ୍ତରକୁ ନିୟନ୍ତ୍ରଣ କରିବା ପାଇଁ ଇନସୁଲିନର ଆବଶ୍ୟକତା ଅଛି କି ନାହିଁ ତାହା ବୋର୍ଡ ସ୍ଥିର କରିବ । ଏହା ବ୍ୟତୀତ ବୋର୍ଡ ତାଙ୍କ ସ୍ୱାସ୍ଥ୍ୟ ସହ ଜଡିତ ଅନ୍ୟାନ୍ୟ ଦିଗ ଉପରେ ମଧ୍ୟ ଦୃଷ୍ଟି ଦେବ ।

Published On April 23, 2024