IRCTC ଦୁର୍ନୀତି ମାମଲା; ଲାଲୁଙ୍କ ବିରୋଧରେ ଚାର୍ଜ ଫ୍ରେମ୍

ବିହାର ବିଧାନସଭା ନିର୍ବାଚନର ପ୍ରସ୍ତୁତି ମଧ୍ୟରେ, IRCTC ଦୁର୍ନୀତି ମାମଲାରେ ଲାଲୁ ପ୍ରସାଦ ଯାଦବ ପରିବାରର ସମସ୍ୟା ବୃଦ୍ଧି ପାଇଛି। ଦିଲ୍ଲୀର ରାଉଜ ଆଭେନ୍ୟୁ କୋର୍ଟ RJD ସୁପ୍ରିମୋ ଲାଲୁ ପ୍ରସାଦ ଯାଦବ ଏବଂ ବିହାରର ବିରୋଧୀ ଦଳ ନେତା ତେଜସ୍ବୀ ଯାଦବଙ୍କ ସମେତ ସମସ୍ତ ଅଭିଯୁକ୍ତଙ୍କ ବିରୋଧରେ ଚାର୍ଜ ଫ୍ରେମ କରିଛି। ଅର୍ଥାତ୍‌ ସେମାନେ ଏବେ ଏହି ମାମଲାରେ ବିଚାରର ସମ୍ମୁଖୀନ ହେବେ।

ଯେଉଁ ଧାରା ଅନୁଯାୟୀ ଚାର୍ଜ ଫ୍ରେମ କରାଯାଇଛି ସେଥିରେ IPC 420, IPC 120B, ଏବଂ ଦୁର୍ନୀତି ନିବାରଣ ଆଇନର ଧାରା 13(2) ଏବଂ 13(1)(d) ଅନ୍ତର୍ଭୁକ୍ତ। ଦୁର୍ନୀତି ନିବାରଣ ଆଇନର ଧାରା 13(2) ଏବଂ 13(1)(d) କେବଳ ଲାଲୁ ଯାଦବଙ୍କ ପାଇଁ ପ୍ରଯୁଜ୍ୟ। କାରଣ ସେ ସରକାରୀ ପଦବୀରେ ରହି ତାଙ୍କ ପଦବୀର ଅପବ୍ୟବହାର କରିଥିଲେ।

ଏହି ମାମଲାରେ ଲାଲୁ ଯାଦବ, ରାବ୍ରୀ ଦେବୀ ଏବଂ ତେଜସ୍ବୀ ଯାଦବ ସେମାନଙ୍କର ଦୋଷ ସ୍ବୀକାର କରିବାକୁ ମନା କରିଦେଲେ। ଲାଲୁ ପରିବାର କୋର୍ଟରେ କହିଛନ୍ତି, ସେମାନେ ମାମଲାର ସମ୍ମୁଖୀନ ହେବେ। ରାବ୍ରୀ ଯାଦବ କହିଛନ୍ତି, ଏହା ଏକ ମିଥ୍ୟା ମାମଲା।

କୋର୍ଟ କହିଛନ୍ତି, ଏହି ଠକେଇ ଲାଲୁ ଯାଦବଙ୍କ ଜ୍ଞାତସାରରେ ଷଡ଼ଯନ୍ତ୍ର କରାଯାଇଥିଲା। ଏହି ମାମଲାର ଅଭିଯୁକ୍ତମାନେ ଏକ ବୃହତ ଷଡ଼ଯନ୍ତ୍ରରେ ସାମିଲ ଥିଲେ। ଲାଲୁ ପରିବାର ଏହି ମାମଲାରୁ ଲାଭ ପାଇଛି। ଚୁକ୍ତିନାମା ବଦଳରେ, ରାବ୍ରୀ ଏବଂ ତେଜସ୍ବୀ ବହୁତ କମ ମୂଲ୍ୟରେ ଜମି ପାଇଥିଲେ।

ଆରଜେଡି ସୁପ୍ରିମୋ ଲାଲୁ ଯାଦବ ହ୍ବିଲ ଚେୟାରରେ କୋର୍ଟରେ ପହଞ୍ଚିଥିଲେ। ତାଙ୍କ ସହିତ ରାବ୍ରୀ ଦେବୀ, ତେଜସ୍ବୀ ଯାଦବ ଏବଂ ପ୍ରେମଚାନ୍ଦ ଗୁପ୍ତା ମଧ୍ୟ ଥିଲେ।

ସିବିଆଇ ଏହାର ଚାର୍ଜସିଟରେ ଅଭିଯୋଗ କରିଛି ଯେ, ୨୦୦୪ ରୁ ୨୦୧୪ ମଧ୍ୟରେ, ଏକ ଷଡ଼ଯନ୍ତ୍ରର ଅଂଶସ୍‌ସ୍ବରୂପ, ପୁରୀ ଏବଂ ରାଞ୍ଚିରେ ଥିବା ଭାରତୀୟ ରେଳବାଇର BNR ହୋଟେଲଗୁଡ଼ିକୁ ପ୍ରଥମେ IRCTCକୁ ସ୍ଥାନାନ୍ତର କରାଯାଇଥିଲା ଏବଂ ପରେ ପରିଚାଳନା ଏବଂ ରକ୍ଷଣାବେକ୍ଷଣ ପାଇଁ ବିହାରର ସୁଜାତା ହୋଟେଲ ପ୍ରାଇଭେଟ ଲିମିଟେଡକୁ ଲିଜ ଦିଆଯାଇଥିଲା। ଏଜେନ୍ସି ଅଭିଯୋଗ କରିଛି ଯେ, ଟେଣ୍ଡର ପ୍ରକ୍ରିୟାରେ ଜାଲିଆତି ଏବଂ ହେରଫେର କରାଯାଇଥିଲା। ସୁଜାତା ହୋଟେଲକୁ ସପକ୍ଷରେ ଆଣିବା ପାଇଁ ସର୍ତ୍ତାବଳୀକୁ ପରିବର୍ତ୍ତନ କରାଯାଇଥିଲା। ଚାର୍ଜସିଟରେ ତତ୍କାଳୀନ IRCTC ମହାପ୍ରବନ୍ଧକ ଭିକେ ଆସ୍ଥାନା ଏବଂ ଆରକେ ଗୋୟଲଙ୍କ ସହିତ ସୁଜାତା ହୋଟେଲ ନିର୍ଦ୍ଦେଶକ ବିଜୟ କୋଚ୍ଚର ଏବଂ ବିନୟ କୋଚ୍ଚର, ଚାଣକ୍ୟ ହୋଟେଲର ମାଲିକଙ୍କ ନାମ ମଧ୍ୟ ରହିଛି।