ଇରାନ-ଆମେରିକା-ଇସ୍ରାଏଲ ଯୁଦ୍ଧ;'ସମସ୍ତ ବିଭାଗକୁ ରଖାଯାଇଛି ଆଲର୍ଟ ମୋ‌ଡ୍‌ରେ'

ମଧ୍ୟପ୍ରାଚ୍ୟରେ ଜାରି ରହିଥିବା ଇରାନ-ଆମେରିକା-ଇସ୍ରାଏଲ ଯୁଦ୍ଧ ମଧ୍ୟରେ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ସୋମବାର ରାଜ୍ୟ ସଭାରେ କହିଛନ୍ତି, ସରକାର ଏହି ଅଞ୍ଚଳରେ ରହୁଥିବା ଭାରତୀୟଙ୍କ ସୁରକ୍ଷାକୁ ପ୍ରାଥମିକତା ଦେଇଛନ୍ତି। ଭାରତ ଚାହେଁ ଯେ, ଏହି ସଙ୍କଟର ସମାଧାନ କୂଟନୀତି ଓ ଆଲୋଚନା ମାଧ୍ୟମରେ ହେଉ।

ଭାରତ କେବେ ଯୁଦ୍ଧକୁ ସମର୍ଥନ କରେ ନାହିଁ। ସେ କହିଛନ୍ତି, ଉପସାଗରୀୟ ଦେଶଗୁଡ଼ିକରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। ଭାରତ ସରକାର ପରିସ୍ଥିତି ଉପରେ ନଜର ରଖିଛନ୍ତି। ଏହି ସଂଘର୍ଷରେ ଘଟିଥିବା ଲୋକଙ୍କ ଜୀବନହାନି ଯୋଗୁଁ ଭାରତ ଦୁଃଖିତ। ଆମେ ସମସ୍ତ ପକ୍ଷଙ୍କୁ ଶାନ୍ତି ପାଇଁ ନିବେଦନ କରୁଛୁ। ଏହି ସଂଘର୍ଷ ସାଧାରଣ ଜୀବନ ଏବଂ ବ୍ୟବସାୟକୁ ପ୍ରଭାବିତ କରୁଛି। ଇରାନରେ ଫସି ରହିଥିବା ଭାରତୀୟମାନଙ୍କୁ ବାହାର କରିବା ପାଇଁ ତେହେରାନରେ ଥିବା ଭାରତୀୟ ଦୂତାବାସ କାର୍ଯ୍ୟ କରୁଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପରିସ୍ଥିତି ଉପରେ କଡ଼ା ନଜର ରଖିଛନ୍ତି। ଶକ୍ତି ଆବଶ୍ୟକତା ଉପରେ ଏହି ସଂଘର୍ଷର ପ୍ରଭାବ ବିଷୟରେ ଭାରତ ସତର୍କ ରହିଛି। ସମସ୍ତ ବିଭାଗ ଆଲର୍ଟ ମୋ‌ଡ୍‌ରେ ରଖାଯାଇଛି।

ଜୟଶଙ୍କର ଆହୁରି ମଧ୍ୟ କହିଛନ୍ତି, 'ପ୍ରଧାନମନ୍ତ୍ରୀ ନିରନ୍ତର ନୂତନ ଘଟଣାକ୍ରମ ଉପରେ ନଜର ରଖିଛନ୍ତି। ଏବଂ ସମ୍ପୃକ୍ତ ମନ୍ତ୍ରଣାଳୟଗୁଡ଼ିକ ପ୍ରଭାବଶାଳୀ ଭାବରେ ପ୍ରତିକ୍ରିୟା ଦେବା ପାଇଁ ସମନ୍ୱୟ କରୁଛନ୍ତି। ଲୋକସଭାରେ ଦିବଂଗତ ସାଂସଦମାନଙ୍କୁ ଶ୍ରଦ୍ଧାଞ୍ଜଳି ଦେବା ପରେ ଗୃହକୁ ଦିନ ୧୨ଟା ପର୍ଯ୍ୟନ୍ତ ମୁଲତବୀ ରଖାଯାଇଛି। ବୈଦେଶିକ ମନ୍ତ୍ରୀ ଏସ ଜୟଶଙ୍କର ଆଜି ଦିନ ୧୨ଟାରେ ପଶ୍ଚିମ ଏସିଆର ପରିସ୍ଥିତି ଏବଂ ଭାରତ ସପକ୍ଷରେ ଲୋକସଭାରେ ତାଙ୍କର ବିବୃତ୍ତି ଦେବେ।

ଏହି ସମୟରେ, ଲୋକସଭାରେ ବିରୋଧୀଙ୍କ ଦ୍ୱାରା ବାଚସ୍ପତି ଓମ ବିର୍ଲାଙ୍କୁ ହଟାଇବା ପାଇଁ ପ୍ରସ୍ତାବ ଉପରେ ଆଲୋଚନା ହେବ। ବିରୋଧୀ ଦଳଗୁଡ଼ିକ ଅଭିଯୋଗ କରିଛନ୍ତି ଯେ ବାଚସ୍ପତି ଗୃହ କାର୍ଯ୍ୟକାଳ ମଧ୍ୟରେ 'ସ୍ପଷ୍ଟ ଭାବରେ ପକ୍ଷପାତୀ ମନୋଭାବ' ଗ୍ରହଣ କରିଥିଲେ। ଏବଂ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସମେତ ବିରୋଧୀ ନେତାମାନଙ୍କୁ ଗୃହରେ କହିବାକୁ କମ୍ ସୁଯୋଗ ଦେଇଥିଲେ। ଅନାସ୍ଥା ପ୍ରସ୍ତାବ ସମ୍ପର୍କରେ ସୂଚନା ପାଇବା ପରେ, ଓମ୍ ବିର୍ଲା ଲୋକସଭା କାର୍ଯ୍ୟର ଅଧ୍ୟକ୍ଷତା କରିବାରୁ ଓହରି ଯାଇଥିଲେ। ପ୍ରସ୍ତାବ ଉପରେ ଚୂଡ଼ାନ୍ତ ନିଷ୍ପତ୍ତି ପରେ ସେ ପୁନର୍ବାର ଗୃହର କାର୍ଯ୍ୟର ଅଧ୍ୟକ୍ଷତା କରିବେ।