ଭୟଙ୍କର ହେଉଛି ଇସ୍ରାଏଲ୍-ଇରାନ୍ ଯୁଦ୍ଧ, ସୃଷ୍ଟି ହେବ ତୈଳ ସଙ୍କଟ

ଭୟଙ୍କର ହେଉଛି ଇସ୍ରାଏଲ୍-ଇରାନ୍ ଯୁଦ୍ଧ ସ୍ଥିତି । ଦୁଇ ଦେଶ ମଧ୍ୟରେ ଚାଲିଥିବା ସଂଘର୍ଷ ୧୧ତମ ଦିନରେ ପହଞ୍ଚିଛି । ଆମେରିକା ଆକ୍ରମଣ ପରେ ପରିସ୍ଥିତି ଅଧିକ ଉତ୍ତେଜନାପୂର୍ଣ୍ଣ ହୋଇଛି । ଇସ୍ରାଏଲ ଉପରେ କ୍ଷେପଣାସ୍ତ୍ର ମାଡ଼ କରିଛି ଇରାନ । ତେଲ ଅଭିଭ ଏବଂ କେନ୍ଦ୍ରୀୟ ଇସ୍ରାଏଲର ଆଖପାଖ ଅଞ୍ଚଳରେ ସାଇରନ୍ ବାଜିବା ପରେ କ୍ଷେପଣାସ୍ତ୍ରକୁ ପ୍ରତିରୋଧ କରାଯାଇଥିଲା । ଇସ୍ରାଏଲୀ ଆକ୍ରମଣରେ ଇରାନରେ ଏବେ ସୁଦ୍ଧା ୯୫୦ ଜଣଙ୍କ ମୃତ୍ୟୁ ହୋଇଛି ଏବଂ ୩ ହଜାର ୪୫୦ରୁ ଅଧିକ ଆହତ ହୋଇଛନ୍ତି ।

ସେପଟେ UNSCରେ ଇରାନ ଉପରେ ଆମେରିକା ଆକ୍ରମଣକୁ ନିନ୍ଦା କରାଯାଇଛି । ଅନ୍ୟପଟେ ଏକ ଲମ୍ବା ଯୁଦ୍ଧ ଏଡାଇବା ପାଇଁ ଇରାନ ସହ ପୁଣି ଆଲୋଚନା କରିବାକୁ ଆମେରିକା ପ୍ରସ୍ତୁତ ବୋଲି ସୂଚାଇ ଦେଇଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର ରାତିରେ ଦେଶକୁ ସମ୍ବୋଧିତ କରିଥିଲେ । ତେବେ ଇରାନ୍ ଉପରେ ଆମେରିକା ଆକ୍ରମଣର ଜବାବରେ ଇରାନ ସମର୍ଥିତ ମିଲିସିଆ ଗୋଷ୍ଠୀଗୁଡ଼ିକ ଆମେରିକୀୟ ଘାଟି ଉପରେ ଆକ୍ରମଣ କରିପାରନ୍ତି ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।

ମଧ୍ୟ ଏସିଆରେ ଇସ୍ରାଏଲ ଓ ଇରାନ ମଧ୍ୟରେ ମୁହାଁମୁହିଁ ସ୍ଥିତି ପରେ ଏହାର ବଡ ପ୍ରଭାବ ମାର୍କେଟ୍ ଉପରେ ପଡିଛି। ଏସିଆର ଷ୍ଟକ ମାର୍କେଟରେ କାରବାର ହ୍ରାସ ପାଇଛି । ଏଥିସହ ତେଲଦର ବୃଦ୍ଧି ପାଇଛି । ଆନ୍ତର୍ଜାତିକ ବଜାରରେ ଅଶୌଧିତ ତୈଳ ଦର ତିନି ପ୍ରତିଶ୍ ବଢି ୭୯ ଡଲାର ପାର ହୋଇଛି । ଇରାନ ହେଉଛି ବିଶ୍ବର ନବମ ବୃହତ୍ ତେଲ ପ୍ରସ୍ତୁତକାରୀ ଦେଶ । ଏଠାରେ ଦୈନିକ ପ୍ରାୟ ୩.୩ ମିଲିୟନ ବ୍ୟାରେଲ ତେଲ ପ୍ରସ୍ତୁତ ହୁଏ । ଏଥିର ଅର୍ଦ୍ଧାଧିକ ବିଦେଶକୁ ରପ୍ତାନୀ କରାଯାଇଥାଏ । ସେପଟେ ଇସ୍ରାଏଲ- ଇରାନ ଯୁଦ୍ଧର ପ୍ରଭାବ ଏସିଆ ଷ୍ଟକ ମାର୍କେଟ ଉପରେ ପଡିଛି । ନିବେଶକ ମାନେ ଷ୍ଟକ ମାର୍କେଟରୁ ପୁଞ୍ଜି ପ୍ରତ୍ୟାହାର କରୁଛନ୍ତି ।