ଲେବାନନ-ଇସ୍ରାଏଲ ସୀମାରେ ମୂତୟନ ହେଲେ ୬୦୦ ଭାରତୀୟ ସୈନିକ , ଜାଣନ୍ତୁ କାହିଁକି ?

ମଧ୍ୟପ୍ରାଚ୍ୟର ସୁଇଜରଲ୍ୟାଣ୍ଡ କୁହାଯାଉଥିବା ଲେବାନନ ଏବେ ପୂରା ଛାରଖାର ହୋଇଯାଇଛି। ଦକ୍ଷିଣ ଲେବାନନରେ ଇସ୍ରାଏଲ କରିଛି ସବୁଠାରୁ ବଡ଼ ହମଲା। ବିଦ୍ରୋହୀ ସଂଗଠନ ହେଜବୁଲ୍ଲାକୁ ଟାର୍ଗେଟ କରି ଇସ୍ରାଏଲ କରିଥିବା ଘନଘନ ରକେଟ ଓ ବୋମା ମାଡ଼ରେ ସବୁ କିଛି ମାଟିରେ ମିଶି ଯାଇଛି। ଇସ୍ରାଏଲର ହମଲାରେ ୫୫୮ ଜଣଙ୍କ ମୃତ୍ୟୁ ହୋଇଛି।

ଏମାନଙ୍କ ମଧ୍ୟରେ ୫୦ ଜଣ ଛୋଟ ପିଲା ଓ ୯୪ ଜଣ ମହିଳା ରହିଛନ୍ତି।ଗତବର୍ଷ ଅକ୍ଟୋବର ୭ ତାରିଖରେ ଗାଜା ଯୁଦ୍ଧ ଆରମ୍ଭ ହେବା ପରଠାରୁ ଇସ୍ରାଏଲ-ହେଜବୁଲ୍ଲା ମଧ୍ୟରେ ଚାଲିଥିବା ସଂଘର୍ଷ ଏହି ଅଞ୍ଚଳରେ ପୂର୍ଣ୍ଣାଙ୍ଗ ଯୁଦ୍ଧର ଆଶଙ୍କା ସୃଷ୍ଟି କରିଛି। ଇସ୍ରାଏଲ ଆକ୍ରମଣର ଜବାବରେ ହେଜବୁଲ୍ଲା ଇସ୍ରାଏଲ ବାୟୁସେନାର ୨ଟି ଘାଟି ଉପରେ କ୍ଷେପଣାସ୍ତ୍ର ମାଡ଼ କରିଛି।

ଏହି ଉତ୍ତେଜନା ମଧ୍ୟରେ ଶାନ୍ତି ବଜାୟ ରଖିବାରେ ଭାରତୀୟ ସେନା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ମିଳିତ ଜାତିସଂଘର ଶାନ୍ତି ରକ୍ଷା ମିଶନ ଅଧୀନରେ ଥିବା ଅସୁବିଧାଜନକ ଇସ୍ରାଏଲ୍‌-ଲେବାନନ୍ ସୀମାରେ ଭାରତୀୟ ସେନା ନିଜର ଦୃଢ଼ ଉପସ୍ଥିତି ଜାରି ରଖିଛି। ଇସ୍ରାଏଲର ଲେବାନନରୁ ପ୍ରତ୍ୟାହାର ପରେ ୨୦୦୦ ରେ ସ୍ଥାପିତ ହୋଇଥିବା ବ୍ଲୁ ଲାଇନରେ ବର୍ତ୍ତମାନ ୬୦୦ ଭାରତୀୟ ସୈନିକ ନିୟୋଜିତ ହୋଇଛନ୍ତି।

ଏହି ବଳ ମିଳିତ ଜାତିସଂଘର ମଧ୍ୟବର୍ତ୍ତୀ ଫୋର୍ସର ଲେବାନନ୍ (ୟୁଏନଆଇଏଫଆଇଏଲ) ର ଏକ ଅଂଶ, ଯାହା ଦ୍ୱାରା ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରଖିବା ପାଇଁ ଉତ୍ସର୍ଗୀକୃତ। ଏମାନେ ସିଧା ସଂଘର୍ଷରେ ସାମିଲ ହେବେ ନାହିଁ। ପ୍ରତିରକ୍ଷା ସୂତ୍ର ଅନୁସାରେ ଭାରତୀୟ ସେନା ସେଠାରେ ତୀକ୍ଷ୍ଣ ନଜର ରଖି ରହିଛି। ବ୍ଲୁ ଲାଇନ ଏକ ଶାନ୍ତିରକ୍ଷା କ୍ଷେତ୍ର ରୂପେ କାର୍ଯ୍ୟ କରୁଛି ଓ ଜାତିସଂଘ ଫୋର୍ସ ସେଠାରେ ଇସ୍ରାଏଲ ଓ ଲେବାନନ ମଧ୍ୟରେ ଯୁଦ୍ଧକୁ ସୀମିତ କରିବାକୁ ଚେଷ୍ଟା କରୁଛି।

ଯଦିଓ ଭାରତୀୟ ସେନା ପ୍ରତ୍ୟକ୍ଷ ଯୁଦ୍ଧରେ ସାମିଲ ନୁହନ୍ତି ତେବେ ଅତ୍ୟଧିକ ସମ୍ବେଦନଶୀଳ କ୍ଷେତ୍ରରେ ସ୍ଥିରତା କାୟମ ରଖିବା ଦାୟିତ୍ୱରେ ଅଛନ୍ତି। ସେମାନଙ୍କ ପ୍ରାଥମିକ ମିସନ ଜାତିସଂଘ କର୍ମଚାରୀ ଓ ଶାନ୍ତିରକ୍ଷା କାର୍ଯ୍ୟକୁ ସୁରକ୍ଷିତ କରିବା ଓ ସୀମାରେ ହିଂସାର ପ୍ରକୋପ କୁ କମ କରିବା।