Ahmedabad plane crash: ଏୟାରଇଣ୍ଡିଆ ନାଁରେ ବଡ଼ ଅଭିଯୋଗ

ଅହମ୍ମଦାବାଦ ବିମାନ ଦୁର୍ଘଟଣାରେ ମୃତ୍ୟୁବରଣ କରିଥିବା ଯାତ୍ରୀଙ୍କ ପରିବାର ଏବେ ଏୟାରଇଣ୍ଡିଆ ଏୟାରଲାଇନ୍ସ ଉପରେ ବଡ଼ ଅଭିଯୋଗ ଆଣିଛନ୍ତି । ମୃତକଙ୍କ ପରିବାର ଅଭିଯୋଗ କରିଛନ୍ତି କି କ୍ଷତିପୂରଣ ଦେବାକୁ ଏୟାରଲାଇନ୍ସ ପକ୍ଷରୁ ସଠିକ ଭାବେ କାର୍ଯ୍ୟ କରାଯାଉନି । କ୍ଷତିପୂରଣ ରାଶି ଦେବାକୁ ଏୟାରଇଣ୍ଡିଆ ପକ୍ଷରୁ ଏଭଳି କିଛି ପ୍ରଶ୍ନର ଉତ୍ତର ଦେବାକୁ କୁହାଯାଉଛି ଯାହା ଆଦୌ ଗ୍ରହଣନୀୟ ନୁହେଁ ।

ବ୍ୟକ୍ତିଗତ ଓ ଆର୍ଥିକ ତଥ୍ୟ ରଖିବାକୁ ବାଧ୍ୟ କରାଯାଉଛି । ଏୟାରଲାଇନ୍ସ ମୁତାବକ ଯଦି ଫର୍ମରେ ତଥ୍ୟ ପୂରଣ କରାନଯାଏ ତେବେ କ୍ଷତିପୂରଣ ନଦେବାକୁ ଧମକ ମଧ୍ୟ ଦିଆଯାଉଛି । କେବଳ ସେତିକି ନୁହେଁ ଏଭଳି କିଛି ଦସ୍ତାବିଜ ଉପରେ ହସ୍ତାକ୍ଷର କରିବାକୁ କୁହାଯାଇଛି ଯେଉଁଥିରେ କିଛି ସତ୍ୟତା ନାହିଁ । ତେବେ ଘଟଣାକୁ ନେଇ ପ୍ରତିକ୍ରିୟା ରଖିଛି ଏୟାରଇଣ୍ଡିଆ ଏୟାରଲାଇନ୍ସ । ଯେଉଁ ଅଭିଯୋଗ ଆସିଛି ସେଥିରେ କୌଣସି ସତ୍ୟତା ନାହିଁ । ମୃତକଙ୍କ ପରିବାରକୁ ଘୋଷଣା ମୁତାବକ କ୍ଷତିପୂରଣ ରାଶି ଯଥାଶିଘ୍ର ଦେବାକୁ ଏୟାରଲାଇନ୍ସ ପକ୍ଷରୁ କୁହାଯାଇଛି ।

ଏକ ଆଇନଜୀବୀଙ୍କ ଦାବି ଅନୁଯାୟୀ, ଏୟାର ଇଣ୍ଡିଆ କ୍ଷତିପୂରଣ ଦେବା ପାଇଁ ମୃତକଙ୍କ ପରିବାରଙ୍କ ଆର୍ଥିକ ବିବରଣୀ ମାଗୁଛି, ଯାହା ଦ୍ୱାରା ସେମାନେ ପ୍ରାୟ ୧,୦୫୦ କୋଟି ଟଙ୍କା ବଞ୍ଚାଇବାକୁ ଚେଷ୍ଟା କରୁଛନ୍ତି। ପରିବାରବର୍ଗ ଖୋଲାଖୋଲି ଭାବରେ ଏୟାର ଇଣ୍ଡିଆ ଉପରେ ଅଭିଯୋଗ କରିଛନ୍ତି ଯେ ଏୟାରଲାଇନ୍ସ ସେମାନଙ୍କୁ ଆର୍ଥିକ ନିର୍ଭରଶୀଳତା ସମ୍ବନ୍ଧୀୟ କାଗଜପତ୍ରରେ ଦସ୍ତଖତ କରିବାକୁ ବାଧ୍ୟ କରୁଛି, ଯାହା ଦ୍ୱାରା କ୍ଷତିପୂରଣ ପରିମାଣ ହ୍ରାସ କରାଯାଇପାରିବ। ଅନ୍ୟପକ୍ଷରେ, ଏୟାର ଇଣ୍ଡିଆ ଏହି ଅଭିଯୋଗକୁ ମିଥ୍ୟା ଏବଂ ଭିତ୍ତିହୀନ ବୋଲି କହି ଖଣ୍ଡନ କରିଛି। ଏୟାର ଇଣ୍ଡିଆ କହିଛି ଯେ ସେମାନେ ମୃତକଙ୍କ ପରିବାରଙ୍କୁ ୨୫ ଲକ୍ଷ ଟଙ୍କାର ଅନ୍ତରୀଣ କ୍ଷତିପୂରଣ ଏବଂ ଟାଟା ସନ୍ସ ପକ୍ଷରୁ ଘୋଷିତ ୧ କୋଟି ଟଙ୍କାର ସହାୟତା ପ୍ରଦାନ କରୁଛନ୍ତି। ଏୟାର ଇଣ୍ଡିଆ ସୂତ୍ର ଅନୁଯାୟୀ, ସେମାନଙ୍କ ଦ୍ୱାରା ପଠାଯାଇଥିବା ପ୍ରଶ୍ନାବଳୀର ଉଦ୍ଦେଶ୍ୟ କେବଳ ପାରିବାରିକ ସମ୍ପର୍କ ନିଶ୍ଚିତ କରିବା, ଯାହା ଦ୍ଵାରା କ୍ଷତିପୂରଣ ବଣ୍ଟନ ସଠିକ୍ ହିତାଧିକାରୀଙ୍କୁ ସୁନିଶ୍ଚିତ କରାଯାଇପାରିବ। ସେମାନେ କହିଛନ୍ତି ଯେ, ଏହା ଏକ ଆନୁଷ୍ଠାନିକ ପ୍ରକ୍ରିୟା, ଯାହାକୁ ଅନୁସରଣ କରିବା ଆବଶ୍ୟକ।

ସେମାନେ କହିଛନ୍ତି ଯେ ଏୟାରଲାଇନ୍ସ ପୀଡିତ ପରିବାରକୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ ପ୍ରତିବଦ୍ଧ। ପ୍ରଶ୍ନାବଳୀ ଇ-ମେଲ୍ ମାଧ୍ୟମରେ କିମ୍ବା ବ୍ୟକ୍ତିଗତ ଭାବରେ ଦାଖଲ କରାଯାଇପାରିବ ଏବଂ ଅନୁମତି ବିନା ପୀଡିତ କିମ୍ବା ତାଙ୍କ ସମ୍ପର୍କୀୟଙ୍କ ଘରକୁ କୌଣସି ଗସ୍ତ କରାଯିବ ନାହିଁ। ଏୟାର ଇଣ୍ଡିଆ ସୂତ୍ର ଅନୁଯାୟୀ, ଏଥିପାଇଁ ପୃଥକ ଦଳ ଗଠନ କରାଯାଇଛି, ଯାହା ପରିବାରକୁ ଅନ୍ତିମ ସଂସ୍କାର, ବାସସ୍ଥାନ ଏବଂ ଅନ୍ୟାନ୍ୟ ବ୍ୟବସ୍ଥାରେ ସାହାଯ୍ୟ କରୁଛି। ଏପର୍ଯ୍ୟନ୍ତ ୪୭ ପରିବାରକୁ ଆଗୁଆ ଦେୟ ଦିଆଯାଇଛି ଏବଂ ୫୫ ପରିବାର ପାଇଁ ଦେୟ ପ୍ରକ୍ରିୟା ଚାଲିଛି।

ଗତ ଜୁନ ୧୨ ତାରିଖରେ ଅହମ୍ମଦାବାଦ ଏୟାରପୋର୍ଟରୁ ଲଣ୍ଡନ ଅଭିମୁଖେ ଉଡ଼ାଣ ଭରିଥିଲା ଏୟାର ଇଣ୍ଡିଆର ବିମାନ । ତେବେ ଉଡ଼ାଣ ଭରିବାର କିଛି ସମୟ ପରେ ହିଁ ସ୍ଥାନୀୟ ଏକ ମେଡିକାଲ୍‌ କଲେଜ ହଷ୍ଟେଲ୍ ଛାତ ଉପରେ ଖସି ପଡ଼ିଥିଲା ବିମାନ । ଫଳରେ କ୍ର୍ୟୁ ମେମ୍ବରଙ୍କ ସହ ମୋଟ ୨୪୧ ଜଣଙ୍କ ମୃତ୍ୟୁ ହୋଇଛି । କେବଳ ଜଣଙ୍କ ଜୀବନ କୌଣସି ମତେ ଏହି ଦୁର୍ଘଟଣାରେ ବଞ୍ଚି ଯାଇଥିଲା । ସାରା ବିଶ୍ୱକୁ ଏହି ଦୁର୍ଘଟଣା ସ୍ତବ୍ଧ କରିଦେଇଥିଲା । ଏହାପରେ ଏୟାର ଇଣ୍ଡିଆ ପକ୍ଷରୁ ମୃତକଙ୍କ ପରିବାରକୁ କ୍ଷତିପୂରଣ ରାଶି ଯୋଗାଇ ଦେବାକୁ ଘୋଷଣା କରିଥିଲା । ଏବେ ଏହି କ୍ଷତିପୂରଣ ରାଶି ଦେବାକୁ ନେଇ ସଙ୍ଗିନ ଅଭିଯୋଗ ଆଣିଛନ୍ତି ମୃତକଙ୍କ ପରିବାର